《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十二章

作者 巴克禮普世版小組 2014.11.30

Ho̍k-sāi Siōng-Tsú ê Sing-ua̍h
1 Hiaⁿ-tī tsí-muē ah, só͘-í guá uá-khò Siōng-Tsú ê liân-bín khǹg lín hiàn ka-kī ê sing-khu tsò tsè, sī ua̍h ê, sîn-sìng ê, Siōng-Tsú só͘ huaⁿ-hí-.ê. Tse sī lín sîng-sim sîng-ì ê ho̍k-sāi. 2 M̄-thang koh hō͘ sè-sio̍k tông-huà, tio̍h hō͘ Siōng-Tsú kā lín kái-tsō, sim-tsì tit-tio̍h king-sin, hō͘ lín thang bîng-pi̍k sím-mi̍h sī Siōng-Tsú ê tsí-ì, sím-mi̍h sī liông-siān, sûn-tsuân, Siōng-Tsú só͘ huaⁿ-hí-.ê. 3 Khò Siōng-Tsú ê un-sù, guá ē-tàng tuì lín ta̍k-lâng an-nē kóng, "M̄-thang kā ka-kī kó͘-kè siuⁿ kuân, tio̍h tsiàu Siōng-Tsú siúⁿ-sù hō͘ lín ê sìn-sim thîng-tō͘ lâi sīn-tiōng kó͘-kè ka-kī. 4 Tshin-tshiūⁿ tsi̍t-ê sing-khu ū tsin-tsē ki-thé, m̄-koh muí tsi̍t-ê ki-thé ū bô kāng-khuán ê kong-lîng. 5 Sui-jiân lán ū tsin-tsē lâng, lán kah Ki-tok kiat-liân tsiâⁿ-tsò tsi̍t-thé, ta̍k-ê lâng tsiū-sī muí tsi̍t-ê ki-thé. 6 Tsiàu Siōng-Tsú sù hō͘ lán ê un-tián, lán ta̍k-lâng lóng ū bô kāng-khuán ê un-sù. Nā-sī lí ū suan-káng sìn-sit ê un-sù, tio̍h tsiàu lí sìn ê thîng-tō͘ lâi suan-káng Siōng-Tsú ê sìn-sit. 7 Ho̍k-sāi ê lâng tio̍h tsuan-sim lâi ho̍k-sāi, kàu-tō ê lâng tio̍h tsuan-sim lâi kà-sī lâng. 8 Khuàn-bián ê lâng tio̍h tsuan-sim khuàn-bián, tsín-tsè ê lâng tio̍h khóng-khài, tsò tsú-kuán ê lâng tio̍h jia̍t-sim, tsò tsû-siān ê lâng tio̍h kam-sim lo̍k-ì. 9 Thiàⁿ lâng tio̍h sîng-sim sîng-ì, tio̍h thó-ià siâ-ok, tshin-kīn liông-siān. 10 Tio̍h sio-thiàⁿ tshin-tshiūⁿ tshin hiaⁿ-tī, tio̍h hō͘-siōng tsun-kìng. 11 Tio̍h in-khîn m̄-thang pîn-tuāⁿ, tio̍h jia̍t-sim ho̍k-sāi Tsú. 12 Tio̍h khǹg ǹg-bāng lâi huaⁿ-hí, tio̍h jím-siū huān-lān, tio̍h siông-siông kî-tó. 13 Tio̍h pang-tsō͘ lín tiong-kan sàn-tshiah ê sìn-tô͘, tio̍h hó-khuán-thāi tshut-guā-lâng. 14 Tio̍h tsiok-hok pik-hāi lín ê lâng, tio̍h kā in tsiok-hok, m̄-thang kā in tsiù-tsó͘. 15 Tio̍h kah huaⁿ-hí ê lâng tsò-hué huaⁿ-hí, kah pi-siong ê lâng tsò-hué pi-siong. 16 Tio̍h tâng-sim ha̍p-ì, m̄-thang kiau-ngō͘, tio̍h kah pi-bî ê lâng kau-puê tsò pîng-iú, m̄-thang lia̍h ka-kī pí pa̍t-lâng khah tshong-bîng. 17 M̄-thang īng pháiⁿ pò pháiⁿ, tio̍h tsò tsìng-lâng khuàⁿ-tsò hó ê tāi-tsì. 18 Tio̍h tsīn lí só͘-ē, ló͘-li̍k kah ta̍k-lâng hô-bo̍k tsò-hué. 19 Tshin-ài ê hiaⁿ-tī tsí-muē, m̄-thang uī-tio̍h ka-kī pò-uan-siû, tio̍h hō͘ Siōng-Tsú khì siū-khì thè lí sin-uan, in-uī Sìng-king ū kì-tsài, "Tsú kóng, sin-uan tsāi-tī Guá, Guá ē pò-ìng.”( tsù: SBK 32:35) 20 M̄-koh Sìng-king mā ū án-ne kóng, "Lí ê tuì-ti̍k nā iau, tio̍h hō͘ i tsia̍h, tshuì-ta, tio̍h hō͘ i lim, in-uī án-ne tsò sī tsiong jia̍t-jia̍t ê hué-thuàⁿ thia̍p tī i ê thâu-khak tíng, hō͘ i kiàn-siàu kah tòng bē-tiâu.”( tsù: TsG 25:21-22) 21 M̄-thang hō͘ pháiⁿ iâⁿ-kuè lín, tio̍h īng hó lâi iâⁿ-kuè pháiⁿ.