《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十三章

作者 巴克禮普世版小組 2014.12.07

Ho̍k-tsiông Tsìng-hú
1 Ta̍k-lâng lóng tio̍h khut-ho̍k tsìng-hú ê kuân-pìng, in-uī kuân-pìng lóng sī tuì Siōng-Tsú lâi. Tsiáng-kuân-tsiá ê kuân-pìng lóng sī Siōng-Tsú siat-li̍p-.ê. 2 Só͘-í huán-khòng kuân-pìng sī uî-puē Siōng-Tsú ê kài-bīng, uî-puē ê lâng ē siū sím-phuàⁿ. 3 Lí nā tsò-hó, m̄-bián kiaⁿ tsiáng-kuân-tsiá, tsí-ū tsò-pháiⁿ ê lâng tsiah tio̍h kiaⁿ in. Lí ài tsò tsi̍t-ê m̄-kiaⁿ tsiáng-kuân-tsiá á-bô? Nā ài, tio̍h tsò-hó, lí tsiū ē tit-tio̍h po-tsióng; 4 In-uī i sī Siōng-Tsú ê tshe-īng, beh hō͘ lí tit-tio̍h lī-ik, m̄-koh lí nā tsò-pháiⁿ, tio̍h kiaⁿ i. I tuà kiàm m̄-sī bô bo̍k-tik, i sī Siōng-Tsú ê tshe-īng, sī sin-uan-tsiá, beh hō͘ pháiⁿ-lâng tú-tio̍h hîng-hua̍t. 5 Só͘-í lín tio̍h ho̍k-tsiông tsiáng-kuân-tsiá, m̄-nā uī-tio̍h kiaⁿ Siōng-Tsú siū-khì, mā sī uī-tio̍h liông-sim ê iân-kò͘. 6 In-uī án-ne, lín mā teh la̍p-suè, in-uī in sī Siōng-Tsú ê tshe-īng, uī-tio̍h I teh tsip-hîng tsit-ê tsit-bū. 7 Tio̍h tuì tsìng-lâng tsīn lín ê gī-bū, lín khiàm lâng ê tio̍h hîng-tshing, ing-kai la̍p ê suè tio̍h la̍p, ing-kai kiaⁿ-uì ê tio̍h kiaⁿ-uì, ing-kai tsun-kìng ê tio̍h tsun-kìng.

Thiàⁿ-sim Sîng-tsuân Lu̍t-huat
8 Hō͘-siōng sio-thiàⁿ ê tsè í-guā m̄-thang khiàm lâng ê tsè. Tuì pa̍t-lâng ū thiàⁿ-sim, tsiū í-king uân-sîng lu̍t-huat ê iau-kiû. 9 Lu̍t-huat ê iau-kiû sī : “M̄-thang kan-îm, m̄-thang thâi-lâng, m̄-thang thau-the̍h, m̄-thang tham-sim.”( tsù: CAK20:13-15, 17; SBK 5:17-19, 21) Tsiah-ê kah kî-tha ê iau-kiû lóng pau-hâm tī “Tio̍h thiàⁿ tshù-piⁿ tshin-tshiūⁿ thiàⁿ ka-kī”( tsù: LBK 19:18)tsit-kù uē lāi-té. 10 Thiàⁿ tshù-piⁿ ê lâng bē tsò siong-hāi pa̍t-lâng ê tāi-tsì, só͘-í thiàⁿ sī sîng-tsuân lu̍t-huat. 11 Lín tio̍h án-ne tsò í-guā, tio̍h ē-kì-tit tsit-má sī kak-tshéⁿ ê sî-tsūn, in-uī tsit-má lán pí tú-tú tsiâⁿ-tsò sìn-tô͘ ê sî koh-khah tsiap-kīn Siōng-Tsú ê tsín-kiù. 12 O͘-àm-mê teh-beh kuè-khì, thiⁿ teh-beh kng ā, só͘-í lán tio̍h thuat-lī o͘-àm ê hîng-uî, tshīng kng-bîng ê bú-tsong. 13 Lán ê hîng-uî tio̍h tuan-tsiàⁿ, tshin-tshiūⁿ sing-ua̍h tī ji̍t-kng tiong. M̄-thang hòng-tshiòng, tsiú-tsuì; m̄-thang hò͘ⁿ-sik, hòng-tōng; m̄-thang sio-tseⁿ, uàn-tò͘. 14 Tio̍h īng Tsú Iâ-so͘ Ki-tok lâi tsong-pī ka-kī, m̄-thang uī-tio̍h buán-tsiok su-io̍k lâi tô͘-bô͘ jio̍k-thé ê tāi-tsì.