《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十二章

作者 巴克禮普世版小組 2011.06.19

1, Hit tong-sî, Iâ-so͘ tī an-hioh-ji̍t tuì be̍h-hn̂g king-kè; I ê bûn-tô͘ iau, tsiū tiah be̍h-suī lâi tsia̍h.
2, Tān-sī Huat-lī-sài-phài ê lâng khuàⁿ-tio̍h tsiū kā I kóng, Lí khuàⁿ, lí ê bûn-tô͘ kiâⁿ an-hioh-ji̍t só͘ m̄ ing-kai kiâⁿ ê sū.
3, Iâ-so͘ tsiū kā in kóng, Tāi-pi̍t kap kun-tè ê lâng iau ê sî só͘ kiâⁿ ê, lín bô tha̍k-tio̍h mah?
4, Tsiū-sī i ji̍p Siōng-tsú ê tshù, tsia̍h pâi-lia̍t ê piáⁿ; tse m̄-sī i kap kun-tè ê lâng só͘ thang tsia̍h ê, tsí-ū tsè-si thang nā-tiāⁿ.
5, Á-sī lín iā m̄ bat tha̍k lu̍t-huat só͘ kì-tsài, tng an-hioh-ji̍t tsè-si tī tiān-ni̍h huān-tio̍h an-hioh iā sī bô tsuē mah?
6, Tsí-ū guá kā lín kóng, tī tsia ū pí tiān khah tuā ê.
7, Tān-sī lín nā tsai, Guá ài lîn-bín, bô ài tsè-sū, tsit kù ê ì-gī, tsiū bô tsik-tsuē bô tsuē ê lâng.
8, In-uī Jîn-tsú sī an-hioh-ji̍t ê tsú.
9, Iâ-so͘ lī-khui hia, ji̍p in ê huē-tn̂g; tú-tn̄g ū lâng tsi̍t tshiú ko͘-tâ.
10, Lâng mn̄g I kóng, An-hioh-ji̍t hîng i, thang mah? ì-sù ài bueh kò I.
11, I tsiū kā in kóng, Lín tiong-kan sím-mi̍h lâng ū tsi̍t tsiah iûⁿ, nā tī an-hioh-ji̍t pua̍h-lo̍h khiⁿ, bô kā i lia̍h-khí-lâi mah?
12, Hô-hòng lâng pí iûⁿ ke juā kuì-khì ah! Só͘-í an-hioh-ji̍t kiâⁿ hó-sū sī thang.
13, Tsiū kā hit lâng kóng, Tshun lí ê tshiú. I tsiū tshun, suî-sî hó-hó, tshin-tshiūⁿ pa̍t ki tshiú.
14, Huat-lī-sài-phài ê lâng tshut-khì, saⁿ-kap kè-bô͘ kong-kik Iâ-so͘, khuàⁿ thang tsáiⁿ-iūⁿ bia̍t I.
15, Iâ-so͘ tsai, tsiū thè-khì, lī-khui hia; ū tsē-tsē lâng tè I, tsiū lóng kā in i;
16, ia̍h kíng-kài in bo̍h-tit tsiong I pò-iông;
17, sī bueh ìng-giām thok sian-ti Í-sài-a só͘ kóng ê, kóng,
18, Lí khuàⁿ, guá ê lô͘-po̍k, guá só͘ kíng ê, Guá só͘ thiàⁿ ê, guá ê sim só͘ huaⁿ-hí ê; Guá bueh tsiong guá ê Sîn hù-hō͘ I. I bueh īng phuàⁿ-tuàn thong-ti guā-pang.
19, I bô bueh saⁿ-tsiⁿ, bô bueh suan-jióng; Tī kue-tshī bô lâng thiaⁿ-tio̍h I ê siaⁿ.
20, Siū-siong ê lô͘-tik, I bô bueh at-tsi̍h, Beh hua ê hué-tsheⁿ, I bô phah-sit, Kàu hō͘ kong-gī ē tik-sìng.
21, Guā-pang iā bueh khò I ê miâ lâi ǹg-bāng.
22, Hit sî ū tshuā tsi̍t ê huān-tio̍h kuí, tshiⁿ-mî kuà é-káu ê lâi tsiū-kūn I. I tsiū i-hó i, hō͘ é-káu ê kóng uē, suà ē khuàⁿ-tio̍h.
23, Tsìng lâng lóng gông-ngia̍h, kóng, tsit-ê tsóng-bô sī Tāi-pi̍t ê kiáⁿ-sun o͘h?
24, Tān-sī Huat-lī-sài-phài ê lâng thiaⁿ-tio̍h tsiū kóng, Tsit-ê lâng kuáⁿ kuí bô m̄-sī khò kuí-ông Pia̍t-se-pok.
25, Iâ-so͘ tsai in ê ì-sù, tsiū kā in kóng, Kìⁿ-nā kok ka-kī tsing-piàⁿ, ē tì-kàu pha-hng; kìⁿ-nā siâⁿ á-sī ke ka-kī tsing-piàⁿ, tik-khak khiā bē tiâu.
26, Nā Sat-tàn kuáⁿ Sat-tàn, sī ka-kī tsing-piàⁿ, i ê kok thài-thó khiā ē tiâu?
27, Siat-sú guá khò Pia̍t-se-pok kuáⁿ kuí, lín ê tsú-tē kuáⁿ kuí tsiū uá-khò siáⁿ-lâng ah? Án-ne in bueh gí-tuàn lín.
28, Tsí-ū guá nā khò Siōng-tsú ê Sîn kuáⁿ kuí, tsiū Siōng-tsú ê kok í-king kàu lín à.
29, Lâng tsáiⁿ-iūⁿ ē ji̍p bíng lâng ê tshù, kiap i ê ke-hé? kiám m̄ tio̍h tāi-sing pa̍k bíng lâng, jiân-āu kiap i ê tshù mah?
30, Bô tâng guá ê, tsiū-sī tuì-ti̍k guá; bô kap guá siu-khioh ê, tsiū-sī teh phah-suàⁿ.
31, Só͘-í guá kā lín kóng, Kìⁿ-nā tsuē-ok pòng-to̍k, lóng bueh sià-bián i; tsí-ū pòng-to̍k Sìng Lîng ê, bô bueh sià-bián i.
32, Kìⁿ-nā kóng ē kong-kik Jîn-tsú ê, bueh sià-bián i; tsí-ū kìⁿ-nā kóng ē kong-kik Sìng Lîng ê, put-lūn kim-sè lâi-sè, bô bueh sià-bián i.
33, Lín tio̍h lia̍h hit ê tshiū tsò hó, i ê kué-tsí iā tsò hó; hi̍k-sī lia̍h hit ê tshiū tsò pháiⁿ, i ê kué-tsí iā tsò pháiⁿ; in-uī tuì kué-tsí lâi bat tshiū.
34, To̍k-tsuâ ê luī ah, lín í-king sī pháiⁿ, thài ē kóng hó uē? in-uī sī tuì sim só͘ tshiong-muá ê, tshuì tsiū kóng tshut.
35, Hó lâng tuì só͘ tsik-tsū ê hó, lâi huat-tshut tsiah-ê hó; pháiⁿ lâng tuì só͘ tsik-tsū ê pháiⁿ, lâi huat-tshut tsiah-ê pháiⁿ.
36, Guá kā lín kóng, kìⁿ-nā lâng só͘ kóng ê îng-á-uē, in tī sím-phuàⁿ ê ji̍t, ta̍k kù tio̍h sò͘-bîng.
37, In-uī tuì lí ê ē bueh tshing lí tsò gī; iā tuì lí ê ē bueh gí lí ū tsuē.
38, Hit sî ū king-ha̍k-kàu-su kap Huat-lī-sài kuí-nā lâng ìn I kóng, Sian-siⁿ ah, guán ài tuì lí khuàⁿ tsi̍t ê sîn-jiah.
39, Tān-sī I ìn kóng, Ok-to̍k kan-îm ê sè-tāi kiû sîn-jiah; tû sian-ti Iok-ná ê sîn-jiah í-guā, bô bueh sîn-jiah hō͘ in;
40, in-uī tshin-tshiūⁿ Iok-ná saⁿ ji̍t saⁿ mî tī tuā hî ê pak-tó͘ lāi, Jîn-tsú iā bueh án-ne saⁿ ji̍t saⁿ mî tī tē-lāi.
41, Nî-nî-bî lâng tng sím-phuàⁿ ê sî, bueh kap tsit sè-tāi ê lâng saⁿ-kap khí-lâi, suà gí in ê tsuē; in-uī in tuì Iok-ná só͘ thuân lâi hué-kái; hô-hòng tī tsia ū pí Iok-ná khah tuā ê.
42, Lâm-hng ê lú-ông, tng sím-phuàⁿ ê sî bueh kap tsit sè-tāi ê lâng saⁿ-kap khí-lâi, suà gí in ê tsuē; in-uī i tuì tē ê ki̍k-thâu lâi, bueh thiaⁿ Só͘-lô-bûn tì-sik ê uē, hô-hòng tī tsia ū pí Só͘-lô-bûn khah tuā ê.
43, Siâ-sîn í-king lī-khui lâng, king-kue3bo5 tsuí ê tē, kiû an-hioh iā bô tit-tio̍h.
44, Tsiū kóng, Guá bueh tńg-khì só͘ tshut-lâi ê tshù; kàu tè, tsiū khuàⁿ-tio̍h khang-khang, piàⁿ-sàu, siu-tsíng;
45, tsiū khì, koh tuà tshit ê sîn, pí ka-kī khah pháiⁿ ê, ji̍p-khì khiā-khí; hit lâng lō͘-bé ê kíng-hóng, pí khí-thâu ê khah tshám. Tsit-ê pháiⁿ ê sè-tāi iā bueh tshin-tshiūⁿ án-ne.
46, I iáu tuì tsìng lâng kóng ē ê sî, tú-tn̄g I ê lāu-bú kap I ê hiaⁿ-tī khiā tī guā-bīn, ài bueh kap I kóng uē.
47, Ū lâng kā I kóng, Lí khuàⁿ, lí ê lāu-bú kap lí ê hiaⁿ-tī khiā tī guā-bīn, ài bueh kap lí kóng uē.
48, Tsiū ìn hit ê kā I kóng ê kóng, Sím-mi̍h lâng sī guá ê lāu-bú? sím-mi̍h lâng sī guá ê hiaⁿ-tī ah?
49, Tsiū tshun tshiú kí I ê bûn-tô͘ kóng, Lí khuàⁿ, guá ê lāu-bú kap guá ê hiaⁿ-tī.
50, In-uī kìⁿ-nā kiâⁿ guá tī thiⁿ-tíng ê Pē ê tsí-ì ê, tsiū-sī guá ê hiaⁿ-tī, tsí-bē, kap lāu-bú.