《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十四章

作者 巴克禮普世版小組 2014.12.14

M̄-thang Phue-phîng Lâng
1 Sìn-sim nńg-tsiáⁿ ê lâng, lín tio̍h kā i tsiap-la̍p, m̄-thang kah i piān-lūn ū tsing-gī ê tāi-tsì. 2 Ū-lâng sìn ta̍k-hāng lóng thang tsia̍h, m̄-koh sìn-sim nńg-tsiáⁿ ê lâng kan-taⁿ tsia̍h tshài-se. 3 Ta̍k-hāng tsia̍h ê lâng m̄-thang khuàⁿ-khin bô ta̍k-hāng tsia̍h-ê lâng, bô ta̍k-hāng tsia̍h-ê lâng m̄-thang phue-phuàⁿ ta̍k-hāng tsia̍h-ê lâng, in-uī Siōng-Tsú í-king ū tsiap-la̍p i. 4 Lí sǹg sím-mi̍h, ná-ē phue-phuàⁿ pa̍t-lâng ê tshe-īng? In khiā-tsāi á-sī pua̍h-tó, in ê tsú-lâng ē kā in kuan-sim. In ē khiā-tsāi, in-uī Tsú ē kā in pang-tsō͘. 5 Ū-lâng khuàⁿ tsit-ji̍t pí pa̍t-ji̍t khah tiōng-iàu, ū-lâng khuàⁿ ta̍k-ji̍t lóng sio-siāng tiōng-iàu. Ta̍k-lâng sim-lāi tio̍h ū ka-kī ê kiàn-kái. 6 Siú ti̍k-pia̍t ji̍t-tsí ê lâng sī uī-tio̍h Tsú lâi siú, ta̍k-hāng lóng tsia̍h ê lâng mā sī uī-tio̍h Tsú lâi tsia̍h, in-uī i kám-siā Siōng-Tsú. Bô ta̍k-hāng tsia̍h ê lâng mā-sī uī-tio̍h Tsú lâi bô tsia̍h, i mā sī ū kám-siā Siōng-Tsú. 7 Lán bô-lâng kan-taⁿ uī-tio̍h ka-kī teh ua̍h, mā bô-lâng kan-taⁿ uī-tio̍h ka-kī lâi sí. 8 Lán ua̍h sī uī-tio̍h Tsú teh ua̍h, sí mā sī uī-tio̍h Tsú lâi sí, só͘-í lán bô-lūn sī ua̍h á-sī sí, lóng sī sio̍k Tsú ê lâng. 9 Uī-tio̍h tsit-ê bo̍k-tik, Ki-tok ū sí mā ū koh-ua̍h, thang tông-sî tsò ua̍h-lâng kah sí-lâng ê Tsú. 10 Kì-jiân sī án-ne, lí ná-ē phue-phuàⁿ lí ê hiaⁿ-tī? Ná-ē khuàⁿ-khin lí ê hiaⁿ-tī? In-uī lán lóng tio̍h khiā-tī Siōng-Tsú sím-phuàⁿ-si̍k ê thâu-tsîng. 11 Sìng-king ū kì-tsài: Tsú kóng, "Guá sī íng-ua̍h ê Siōng-Tsú, só͘-ū ê kha-thâu-u lóng ē kā Guá kuī-pài, só͘-ū ê tshuì lóng ē suan-pò͘ sîng-jīn Guá sī Siōng-Tsú.”( tsù: ISA 45:23) 12 Án-ne, lán ta̍k-lâng tio̍h tsiong ka-kī ê tāi-tsì tī Siōng-Tsú ê bīn-tsîng suat-bîng tshing-tshó.

M̄-thang Hō͘ Sìn-tô͘ ê Sìn-gióng Pua̍h-tó 13 Só͘-í lán m̄-thang koh hō͘-siōng phue-phîng. Tio̍h kuat-sim m̄-thang hō͘ hiaⁿ-tī tsó͘-gāi, pua̍h-tó á-sī huān-tsuē. 14 Guá tsai Tsú Iâ-so͘ hō͘ guá khak-sìn, ta̍k-hāng mi̍h pún-sin lóng tshing-khì, m̄-koh lâng nā lia̍h sím-mi̍h tsò bô tshing-khì, hit-hāng mi̍h tuì hit lâng lâi kóng tsiū bô tshing-khì. 15 Lí nā uī-tio̍h tsia̍h-mi̍h ê tāi-tsì hō͘ lí ê hiaⁿ-tī sim-kuaⁿ kan-khó͘, lí ê hîng-uî tsiū m̄-sī tshut-tī thiàⁿ-sim. Lí m̄-thang uī-tio̍h ka-kī só͘ tsia̍h, lâi pāi-huāi Ki-tok ū thè i sí ê lâng. 16 Só͘-í m̄-thang hō͘ lín khuàⁿ-tsò hó ê tāi-tsì tsiâⁿ-tsò hō͘ lâng huí-pòng ê tuì-siōng. 17 In-uī Siōng-Tsú ê Kok-tō͘ kah lim-tsia̍h bô kuan-hē, sī kah Sìng-Sîn só͘ siúⁿ-sù ê kong-gī, hô-pîng í-ki̍p hí-lo̍k ū kuan-hē. 18 Tsiàu án-ne lâi sū-hōng Ki-tok ê lâng ē hō͘ Siōng-Tsú huaⁿ-hí, mā ē hō͘ lâng o-ló. 19 Só͘-í lán tio̍h tui-kiû hô-pîng kah hō͘-siōng tsō-tsiū ê tāi-tsì. 20 M̄-thang uī-tio̍h tsia̍h-mi̍h lâi huí-huāi Siōng-Tsú ê kang-tsok. Ta̍k-hāng tsia̍h-mi̍h lóng tshing-khì, m̄-koh lâng nā in-uī tsia̍h-mi̍h hō͘ lâng ê sìn-gióng tsó͘-gāi tsiū m̄-hó. 21 Siōng-hó sī bô tsia̍h bah, bô lim tsiú, mā bô tsò hō͘ hiaⁿ-tī sìn-gióng pua̍h-tó ê tāi-tsì. 22 Lí tuì tāi-tsì ê sìn-liām, sī lí kah Siōng-Tsú tiong-kan ê tāi-tsì. Tsò ka-kī khuàⁿ-tsò tio̍h ê tāi-tsì koh bô tsuē-ok-kám ê lâng, si̍t-tsāi ū hok-khì. 23 M̄-koh sim-lāi ū giâu-gî lâi tsia̍h ê lâng ē siū tīng-tsuē, in-uī in m̄-sī tshut-tī sìn-sim. M̄-sī tshut-tī sìn-sim lâi tsò ê lóng sī tsuē.