《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十五章

作者 巴克禮普世版小組 2014.12.21

Bô Kiû Buán-tsiok Ka-kī
1 Lán tsiah-ê ū lîng-li̍k ê lâng ing-kai kā luán-jio̍k ê lâng tàu taⁿ tāng-tàⁿ, m̄-thang kiû ka-kī ê buán-tsiok. 2 Lán ta̍k-lâng tio̍h hō͘ tshù-piⁿ huaⁿ-hí, hō͘ in tit-tio̍h lī-ik lâi kiàn-li̍p sìn-sim. 3 In-uī Ki-tok mā bô kiû ka-kī ê huaⁿ-hí, tian-tò tsiàu Sìng-king kì-tsài: "Bú-jio̍k lí ê bú-jio̍k kui tī Guá."( tsù: SPh 69:9) 4 Tsá-tsîng só͘ kì-tsài ê lóng sī beh kà-sī lán tsiah lâi siá, hō͘ lán tuì jím-nāi kah Sìng-king ê an-uì lâi tit-tio̍h ǹg-bāng. 5 Guān sù jím-nāi kah an-uì ê Siōng-Tsú hō͘ lín tāi-ke tâng-sim lâi ha̍k-si̍p Ki-tok Iâ-so͘ ê bô͘-iūⁿ, 6 thang tâng-sim tâng-siaⁿ îng-iāu Siōng-Tsú, lán ê Tsú Iâ-so͘ Ki-tok ê Thiⁿ-Pē.

Bān-bîn ê Hok-im
7 Só͘-í, uī-tio̍h îng-iāu Siōng-Tsú, lán tio̍h hō͘-siōng tsiap-la̍p tshin-tshiūⁿ Ki-tok ū tsiap-la̍p lín. 8 Guá kā lín kóng, Ki-tok tsò siū kat-lé ê lâng ê tshe-īng, sī beh hián-sī Siōng-Tsú ê sìn-si̍t, lâi tsìng-bîng Siōng-Tsú tuì tsó͘-sian ê ìng-ín ū si̍t-hiān. 9 Mā beh hō͘ Guā-pang-lâng in-uī Siōng-Tsú ê liân-bín kui îng-kng hō͘ Siōng-Tsú. Tsiàu Sìng-king só͘ kì-tsài, kóng, "Só͘-í, guá beh tī Guā-pang-lâng ê tiong-kan tshing-tsàn Lí, Tshiùⁿ-kua o-ló Lí ê miâ."( tsù: SPh 18:49) 10 Koh kóng, "Guā-pang-lâng ah, tio̍h kah Siōng-Tsú ê tsú-bîn tsò-hué huaⁿ-hí."( tsù: SBK 32:43) 11 Iū-koh kóng: Só͘-ū ê Guā-pang-lâng tio̍h tshing-tsàn Tsú, Bān-bîn tio̍h o-ló I.( tsù: SPh 117:1) 12 Í-sài-a koh-tsài kóng: Iâ-se ê kin ē puh-íⁿ, I ē hing-khí lâi thóng-tī guā-pang, Guā-pang-lâng ē kā ǹg-bāng khǹg tī i ê sin-tsiūⁿ.( tsù: ISA 11:10) 13 Guān sù ǹg-bāng ê Siōng-Tsú hō͘ lín tuì sìn lâi tshiong-muá ta̍k-tsióng ê huaⁿ-hí kah pîng-an, koh hō͘ lín tuì Sìng-Sîn ê kuân-lîng tshiong-muá ǹg-bāng! 14 Pó-lô ê Suan-kàu Sú-bīng Tshin-ài ê hiaⁿ-tī tsí-muē, guá khak-sìn lín hui-siông siān-liông, tshiong-muá ta̍k-khuán ê tì-sik, koh ē-hiáu hō͘-siōng khuàn-bián. 15 M̄-koh guá hó-táⁿ siá tsit-tiuⁿ phue hō͘ lín, kā lín thê-tshéⁿ kuí-tiám, in-uī Siōng-Tsú ū sù guá ti̍k-pia̍t ê un-tián, 16 thang tī Guā-pang-lâng ê tiong-kan ho̍k-sāi Ki-tok Iâ-so͘, suan-káng Siōng-Tsú ê hok-im, thang hō͘ Guā-pang-lâng tsiâⁿ-tsò Siōng-Tsú só͘ tsiap-la̍p, Sìng-Sîn só͘ sìng-huà ê tsè-mi̍h. 17 In-uī guá ū kah Ki-tok Iâ-so͘ kiat-liân, só͘-í guá khuàⁿ ho̍k-sāi Siōng-Tsú tsò îng-kng. 18 Pa̍t-hāng tāi-tsì guá m̄-káⁿ kóng, tsí ū kóng tsi̍t-hāng, tsiū-sī Ki-tok thong-kuè guá ê giân-gí kah hîng-uî, 19 īng sîn-jiah kah kî-sū ê lîng-li̍k í-ki̍p Sìng-Sîn ê lîng-li̍k, hō͘ Guā-pang-lâng sūn-ho̍k Siōng-Tsú. Guá án-ne tuì Iâ-lō͘-sat-líng it-ti̍t kàu Í-lī-lí-kó͘ ê tē-khu, guá ta̍k só͘-tsāi khì thuân Ki-tok ê hok-im. 20 Guá li̍p-tsì beh khì iáu m̄-bat thiaⁿ-tio̍h Ki-tok ê miâ ê só͘-tsāi thuân hok-im, tsiah bē kah pa̍t-lâng ê kang-tsok tiông-ho̍k. 21 Tsiàu Sìng-king só͘ kì-tsài kóng: M̄-bat thiaⁿ-tio̍h I ê sìn-sit ê lâng ē khuàⁿ-tio̍h, M̄-bat thiaⁿ-tio̍h I ê lâng ē bîng-pi̍k.( tsù: ISA 52:15)

Pó-lô Kè-uē Hóng-būn Lô-má
22 In-uī án-ne, guá put-sî tú-tio̍h tsó͘-tòng, bē-tàng khì lín hia. 23 Kì-jiân tī tsiah-ê tē-khu, guá í-king uân-sîng guá ê kang-tsok, koh in-uī kuí-nā-nî lâi guá it-ti̍t ǹg-bāng ē-tàng khì lín hia. 24 Tsit-piàn beh khì Se-pan-gâ ê sî, guá ǹg-bāng king-kuè lín hia ê sî khì khuàⁿ lín. Sing kah lín ū kuí-ji̍t-á ê kau-puê liáu-āu tsiah hō͘ lín huan-sàng khì Se-pan-gâ. 25 M̄-koh guá tsit-má tio̍h khì Iâ-lō͘-sat-líng kiong-kip hia ê sìn-tô͘ ê su-iàu. 26 In-uī Má-kî-tùn kah A-kai-a ê kàu-huē huaⁿ-hí hiàn tsi̍t-pit tsîⁿ lâi pang-tsō͘ Iâ-lō͘-sat-líng tsi̍t-kuá sàn-tshiah ê sìn-tô͘. 27 Tse sī in huaⁿ-hí tsò ê tāi-tsì, kî-si̍t mā sī in só͘ khiàm ê tsè. Kì-jiân Iû-thài sìn-tô͘ ū kah Guā-pang-lâng tsò-hué ū-hūn tī in lîng-sìng ê hok-khì, guā-pang ê sìn-tô͘ ing-kai tī bu̍t-tsit-siōng kā in pang-tsō͘. 28 Tán guá tsit-hāng tāi-tsì pān hó-sè, tsiong bō͘-khuán ê tsit-pit tsîⁿ kau hō͘ in liáu-āu, tsiah king-kuè lín hia khì Se-pan-gâ. 29 Guá tsai guá khì kìⁿ lín ê sî, ē tsiong Ki-tok hong-sīng ê tsiok-hok tuà khì hō͘ lín. 30 Hiaⁿ-tī tsí-muē ah, guá tuì lán ê Tsú Iâ-so͘ Ki-tok, mā tuì Sìng-Sîn ê thiàⁿ, tshiáⁿ lín tsīn-la̍t kah guá tsò-hué kî-kiû Siōng-Tsú, 31 kiù guá thuat-lī Iû-thài tē-khu hiah-ê m̄-sìn ê lâng ê hām-hāi, koh hō͘ guá uī-tio̍h Iâ-lō͘-sat-líng só͘ tsò kiong-kip ê tāi-tsì tit-tio̍h sìn-tô͘ tsiap-la̍p. 32 Án-ne guá ē-tàng tsiàu Siōng-Tsú ê tsí-ì huaⁿ-huaⁿ hí-hí khì lín hia, kah lín tsò-hué hióng-siū an-hioh. 33 Guān siúⁿ-sù pîng-an ê Siōng-Tsú kah lín tông-tsāi. Amen!