《巴克禮普世版聖經（試讀本）》

 | | | 轉寄

巴克禮普世版（試讀本） 羅馬書第十六章

作者 巴克禮普世版小組 2014.12.28

Tshíng-an
1 Guá tuì lín tshui-tsiàn lán ê tsí-muē Hui-pí, i sī Kian-kik-lí kàu-huē ê tsip-sū. 2 Tshiáⁿ lín tsiàu sìn-tô͘ ê pún-hūn uī-tio̍h Tsú ê iân-kò͘ tsiap-thāi i. I nā ū su-iàu, tshiáⁿ lín kā i pang-tsō͘, in-uī i bat hû-tsō͘ tsin-tsē lâng, pau-kuat guá pún-sin. 3 Tshiáⁿ thè guá kā Ki-tok Iâ-so͘ ê tâng-kang Pik-ki-lah kah A-ku-lah tshíng-an. 4 In bat uī-tio̍h guá mō͘ sèⁿ-miā ê guî-hiám. M̄-nā guá, liân guā-pang ê kàu-huē mā lóng tio̍h kā in kám-siā. 5 Mā tshiáⁿ kā tī in tau teh tsū-huē ê kàu-huē tshíng-an. Tshiáⁿ thè guá kā só͘ thiàⁿ ê Í-pài-nî-thó͘ tshíng-an, i sī A-se-a-síng thâu-tsi̍t-ê sìn Ki-tok ê lâng. 6 Mā tshiáⁿ kā Má-lī-a tshíng-an, i bat uī-tio̍h lín siū tsin-tsē lô-khó͘. 7 Koh tshiáⁿ kā guá ê tshin-tsiâⁿ An-to-nî-kó͘ kah Iû-nî-a tshíng-an. In bat kah guá tâng-tsê siū kuaiⁿ-kaⁿ, tī sù-tô͘ tiong-kan ū bîng-bōng, pí guá tāi-sing kui-sio̍k Ki-tok. 8 Tshiáⁿ thè guá kā tī Tsú-lāi guá só͘ thiàⁿ ê Àm-pik-lī tshíng-an. 9 Tshiáⁿ lín kā tī Ki-tok kah guá tâng lô-khó͘ ê Ní-pa-lô͘, í-ki̍p guá só͘ thiàⁿ ê Sū-tāi-kó͘ tshíng-an. 10 Tshiáⁿ lín kā tī Ki-tok siū-kuè khó-giām ê A-pí-lī tshíng-an. 11 Kā guá ê tshin-tsiâⁿ Hi-lô-thian tshíng-an. Kā Ná-kî-sò͘ ke-lāi sìn-Tsú ê lâng tshíng-an. 12 Tshiáⁿ thè guá kā uī-tio̍h Tsú siū tsin-tsē lô-khó͘ ê Thó͘-hui-ná kah Thó͘-hù-sat tshíng-an. Kā só͘ thiàⁿ ê Pí-sik tshíng-an, i bat uī-tio̍h Tsú lô-khó͘ kang-tsok. 13 Tshiáⁿ kā siū Tsú kíng-suán ê Ló͘-hu kah i ê lāu-bú tshíng-an, i ê lāu-bú mā sī guá ê lāu-bú. 14 Kā A-sùn-kî-thó͘, Hut-li̍k-kan, Hik-bí, Pat-lô-pa, Hik-má, í-ki̍p kah in tsò-hué ê hiaⁿ-tī tshíng-an. 15 Kā Hui-lô-lô-kó͘ kah Iû-lī-a, Nî-lī-a kah i ê tsí-muē, kah O-lîm-pa í-ki̍p kah in tsò-hué ê tsìng sìng-tô͘ tshíng-an. 16 Lín tio̍h īng sìng-kiat ê sio-tsim hō͘-siōng tshíng-an. Ki-tok ê tsìng kàu-huē lóng kā lín tshíng-an.

Tsuè-āu ê Khuàn-bián
17 Hiaⁿ-tī tsí-muē ah, lín tio̍h thê-hông hō͘ lâng hun-lia̍t á-sī hō͘ lín huān-tsuē, uî-puē lín só͘ niá-siū ê kà-sī hiah-ê lâng. 18 In-uī tsit-khuán lâng m̄-sī teh ho̍k-sāi lán ê Tsú Ki-tok, sī teh kò͘ ka-kī ê pak-tó͘, īng hua-giân khá-gí bê-hi̍k láu-si̍t-lâng ê sim. 19 In-uī tsìng-lâng lóng tsai lín ê sūn-ho̍k, só͘-í guá uī-tio̍h lín huaⁿ-hí, m̄-koh guá ài lín tuì hó-sū tio̍h khiáu, tuì pháiⁿ-sū tio̍h ū tì-huī. 20 Sù pîng-an ê Siōng-Tsú tsin-kín tsiū ē kā Sat-tàn ta̍h-tshuì, hō͘ i khut-ho̍k tī lín ê kha-tsîng. Guān lán ê Tsú Iâ-so͘ Ki-tok ê un-tián kah lín tông-tsāi! 21 Guá ê tâng-kang Thê-mô͘-thài kah guá ê tshin-tsiâⁿ Lō͘-kiû, Iâ-sun, Só͘-se-pá-tik kā lín tshíng-an. 22 Guá Tik-tiu, tsiū-sī siá tsit-tiuⁿ phue ê tāi-pit-jîn, tī Tsú-lāi kā lín tshíng-an. 23 Tsiapthai7 guá kah tsuân kàu-huē ê Ka-iû kā lín tshíng-an. 24 Siâⁿ-lāi kuán khò͘-pâng ê Í-lah-to͘ kah lán ê hiaⁿ-tī Kuat-thó͘ kā lín tshíng-an.

Siōng-tsàn
25 Guān îng-kng kui hō͘ Siōng-Tsú! I ē tsiàu guá só͘ thuân ê hok-im, tsiū-sī suan-iông Iâ-so͘ Ki-tok, lâi kian-kò͘ lín ê sìn-sim. Tsit-ê hok-im tsiū-sī bān-kó͘ í-lâi só͘ ún-ba̍t ê ò-biāu. 26 Taⁿ í-king tsiàu íng-ua̍h Siōng-Tsú ê kài-bīng, thong-kuè sian-ti ê tsheh hián-bîng tshut-lâi, thang ín-tshuā bān-bîn lâi sìn koh sūn-ho̍k tsit-ê hok-im. 27 Guān îng-kng thong-kuè Iâ-so͘ Ki-tok kui tī to̍k-it tsuân-tì ê Siōng-Tsú, ti̍t-kàu íng-uán. Amen!