《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第一章

作者 巴克禮普世版小組 2015.01.04

Tshíng-an Kah Kám-siā
1 Guá sī Pó-lô, hōng Siōng-Tsú ê tsí-ì siū tiàu, tsò Iâ-so͘ Ki-tok ê sù-tô͘. Guá kah hiaⁿ-tī Só͘-thê-nî, 2 siá-phue hō͘ tī Ko-lîm-to Siōng-Tsú ê kàu-huē, tsiū-sī hiah-ê tī Ki-tok Iâ-so͘ tsiâⁿ-sìng, siū-tiàu tsiâⁿ-tsò sìn-tô͘, í-ki̍p ta̍k só͘-tsāi kiû-kiò lán ê Tsú Iâ-so͘ Ki-tok ê miâ ê lâng. Ki-tok sī in ê Tsú, mā sī lán ê Tsú. 3 Guān lín tuì lán ê Thiⁿ-Pē Siōng-Tsú kah Tsú Iâ-so͘ Ki-tok tit-tio̍h un-tián kah pîng-an.

Tī Ki-tok Ni̍h ê Tsiok-hok
4 Guá siông-siông thè lín kám-siā guá ê Siōng-Tsú, sī uī-tio̍h Siōng-Tsú ê un-tián ū thong-kuè Iâ-so͘ Ki-tok siúⁿ-sù hō͘ lín. 5 Tsiū án-ne, lín ta̍k-hāng thong-kuè Ki-tok tit-tio̍h hù-tsiok, tshiong-muá ta̍k-hāng ê kháu-tsâi kah tì-sik. 6 Ki-tok ê sìn-sit í-king tī lín ê tiong-kan kiàn-li̍p kian-kò͘ ê ki-tshó͘, 7 hō͘ lín teh thìng-hāu lán ê Tsú Iâ-so͘ Ki-tok ê hián-hiān ê sî lóng bô khiàm sím-mi̍h un-sù. 8 I mā ē hō͘ lín kian-kò͘ ti̍t-kàu lán ê Tsú Iâ-so͘ Ki-tok tsài-lîm ê ji̍t-tsí bô thang hō͘ lâng hiâm. 9 Siōng-Tsú sī sìn-si̍t. I ho͘-tiàu lín lâi kah I ê Kiáⁿ lán ê Tsú Iâ-so͘ Ki-tok kiat-liân.

Kàu-huē ê Hun-tsing
10 Hiaⁿ-tī tsí-muē ah, taⁿ guá hōng lán ê Tsú Iâ-so͘ Ki-tok ê miâ khǹg lín, kóng-uē tio̍h it-tì, m̄-thang ū hun-tsing, tio̍h it-sim it-ì phō kāng-khuán ê bo̍k-phiau lâi thuân-kiat. 11 Tshin-ài ê hiaⁿ-tī tsí-muē, Kik-lâi ke-lāi ê lâng bat kā guá kóng, lín tiong-kan ū hun-tsing. 12 Guá ê ì-sù sī kóng lín ta̍k-lâng ū bô kāng-khuán ê kóng-huat.Ū-ê kóng, "Guá sio̍k Pó-lô"; ū-ê kóng, "Guá sio̍k A-pho-lô"; ū-ê kóng, "Guá sio̍k Pí-tik", koh ū-ê kóng, "Guá sio̍k Ki-tok". 13 Ki-tok kám ū hō͘ lâng pun-khui? Pó-lô kám thè lín tìng si̍p-jī-kè? Lín hōng Pó-lô ê miâ niá-siū sé-lé? 14 Kám-siā Siōng-Tsú, Kik-lí-sū-pò͘ kah Ka-iû í-guā, guá m̄-bat kā lín tiong-kan jīm-hô lâng sé-lé. 15 Só͘-í bô-lâng ē-tàng kóng, lín ū hōng guá ê miâ niá-siū sé-lé. 16 Tio̍h lah, guá mā ū kā Su-thê-huán-à tsi̍t ke ê lâng sé-lé, kî-tha ū kā pa̍t-lâng sé-lé á-bô, guá khiok bē kì-tit à. 17 Ki-tok bô tshe-phài guá kā lâng sé-lé, sī beh lâi thuân hok-im. Guá bô īng tì-huī ê giân-sû thuân, tsiah bián hō͘ Ki-tok ê si̍p-jī-kè sit-khì ì-gī.

Ki-tok Sī Siōng-Tsú ê Tuā-lîng Kah Tì-huī
18 Si̍p-jī-kè ê tō-lí, hiah-ê tîm-lûn ê lâng khuàⁿ-tsò gû-gōng, m̄-koh lán tsiah-ê tit-kiù ê lâng khuàⁿ-tsò sī Siōng-Tsú ê tuā-lîng. 19 In-uī Sìng-king ū kì-tsài: Guá beh siau-bia̍t tì-huī ê lâng ê tì-huī, Mā beh khì-sak tshong-bîng ê lâng ê tshong-bîng.( tsù: ISA 29:14) 20 Án-ne tì-huī ê lâng tī tó-uī? King-ha̍k-kàu-su tī tó-uī? Tsit sè-kan hò͘ⁿ piān-lūn ê lâng tī tó-uī? Siōng-Tsú kám m̄-sī í-king hō͘ sè-kan ê tì-huī piàn-tsò gû-gōng? 21 Kì-jiân sè-kan bē-tàng īng in ê tì-huī lâi jīn-bat Siōng-Tsú, Siōng-Tsú tsiū īng I ka-kī ê tì-huī, huaⁿ-hí sú-iōng guán só͘ thuân ê gû-gōng ê sìn-sit, lâi tsín-kiù hiah-ê sìn ê lâng. 22 Iû-thài-lâng kiû sîn-jiah, Hi-lia̍p-lâng tshuē tì-huī. 23 M̄-koh guán thuân siū-tìng si̍p-jī-kè ê Ki-tok. Tsit-ê sìn-sit tuì Iû-thài-lâng sī tsó͘-gāi, tuì Guā-pang-lâng lâi kóng sī gû-gōng. 24 Tuì Siōng-Tsú kíng-tiàu ê lâng lâi kóng, bô-lūn Iû-thài-lâng á-sī Hi-lia̍p-lâng, Ki-tok tsiū-sī Siōng-Tsú ê kuân-lîng, sī Siōng-Tsú ê tì-huī. 25 In-uī Siōng-Tsú ê gû-gōng pí lâng khah ū tì-huī, Siōng-Tsú ê luán-jio̍k pí lâng khah ióng-tsòng. 26 Hiaⁿ-tī tsí-muē ah, tio̍h ē-kì-tit lín siū-tiàu ê sî, tsiàu sè-kan it-puaⁿ ê phiau-tsún, lín bô kuí-ê lâng ū tì-huī, bô kuí-ê lâng ū lîng-li̍k, bô kuí-ê lâng sio̍k siōng-liû kai-kip. 27 M̄-koh Siōng-Tsú īng sè-kan-lâng khuàⁿ-tsò gōng ê tāi-tsì lâi hō͘ tì-huī ê lâng kiàn-siàu. Siōng-Tsú mā īng sè-kan-lâng khuàⁿ-tsò luán-jio̍k ê tāi-tsì lâi hō͘ ióng-tsòng ê lâng kiàn-siàu. 28 Siōng-Tsú mā īng sè-kan-lâng só͘ khin-sī, hō͘ lâng khuàⁿ-bē-khí á-sī bô-lō͘-īng ê tāi-tsì, lâi phò-huāi lâng só͘ khuàⁿ-tiōng ê tāi-tsì. 29 Án-ne sè-kan-lâng tsiū bô-lâng ē-tàng tī Siōng-Tsú ê bīn-tsîng khua-kháu. 30 Siōng-Tsú hō͘ lín kah Ki-tok Iâ-so͘ kiat-liân, hō͘ Ki-tok tsiâⁿ-tsò lán tuì Siōng-Tsú lâi ê tì-huī, koh hō͘ lán kah Siōng-Tsú hô-hó, tsiâⁿ-tsò Siōng-Tsú sìng-kiat ê tsú-bîn, iū-koh hō͘ lán tit-tio̍h kiù-sio̍k. 31 Só͘-í tsiàu Sìng-king só͘ kì-tsài: Ài-beh khua-kháu ê lâng tio̍h īng Tsú lâi khua-kháu.( tsù: ILB 9:24)