《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第二章

作者 巴克禮普世版小組 2015.01.11

Ki-tok Hông Tìng Si̍p-jī-kè ê Sìn-sit
1 Hiaⁿ-tī tsí-muē ah, guá tsîng khì lín hia, pīng bô īng suí ê gí-sû á-sī tì-huī, tuì lín thuân Siōng-Tsú ê ò-biāu. 2 In-uī guá kuat-tīng tī lín tiong-kan, tû-liáu Iâ-so͘ Ki-tok kah I hông tìng si̍p-jī-kè í-guā, bô beh thê-khí kî-tha ê tāi-tsì. 3 Guá kah lín tsò-hué ê sî tsin luán-jio̍k, iū-koh kiaⁿ kah phi̍h-phi̍h-tshuah. 4 Guá só͘ kóng ê uē kah só͘ thuân ê sìn-sit, lóng bô īng kháu-biāu tì-huī ê giân-sû, sī khò Sìng-Sîn ê kuân-lîng lâi tsìng-si̍t. 5 Guá án-ne tsò sī beh hō͘ lín bô khò lâng ê tì-huī lâi kiàn-li̍p sìn-gióng, sī khò Siōng-Tsú ê kuân-lîng.

Siōng-Tsú ê Tì-huī
6 M̄-koh guán tuì hiah-ê lîng-sìng sîng-sio̍k ê lâng mā ū kóng tì-huī, m̄-koh m̄-sī tsit sè-kan ê tì-huī, mā m̄-sī tsit sè-kan tsù-tiāⁿ ē sit-sè ê tsiáng-kuân-tsiá ê tì-huī. 7 Guán só͘ kóng ê sī Siōng-Tsú ò-biāu ê tì-huī, sī tuì lâng ún-ba̍t ê, tsiū-sī Siōng-Tsú tī tshòng-sè í-tsîng to̍h tiāⁿ-tio̍h beh hō͘ lán tit-tio̍h îng-kng. 8 Tsit sè-kan ê tsiáng-kuân-tsiá bô tsi̍t-ê bat tsit-ê tì-huī, in nā bat tsiū bē tsiong îng-kng ê Tsú tìng-sí tī si̍p-jī-kè. 9 Tsiàu Sìng-king só͘ kì-tsài: Siōng-Tsú uī-tio̍h thiàⁿ I ê lâng só͘ tsún-pī ê, sī ba̍k-tsiu m̄-bat khuàⁿ-tio̍h, hīⁿ-khang m̄-bat thiaⁿ-tio̍h, lâng ê sim-kuaⁿ liāu-sióng bē kàu-.ê.( tsù: ISA 64:4) 10 M̄-koh Siōng-Tsú ū thong-kuè Sìng-Sîn tsiong tsiah-ê tāi-tsì kā lán khé-sī, in-uī Sìng-Sîn bān-sū lóng tsai kah tsin thiat-té, liân Siōng-Tsú tshim-ò ê tsí-ì mā lóng tsai. 11 Taⁿ lâng ê tāi-tsì tsí-ū i ka-kī ê sim-lîng tsiah ē tsai; tshin-tshiūⁿ án-ne Siōng-Tsú ê tāi-tsì mā tsí-ū Siōng-Tsú ê Sìng-Sîn tsiah ē tsai. 12 M̄-koh lán só͘ niá-siū ê m̄-sī sè-kan ê lîng, sī tuì Siōng-Tsú lâi ê Sìng-Sîn, beh hō͘ lán tsai Siōng-Tsú pe̍h-pe̍h siúⁿ-sù hō͘ lán ê un-tián. 13 Só͘-í guán tuì lîng-sìng ê lâng kái-sueh lîng-sìng ê tāi-tsì, m̄-sī īng lâng só͘ kà tì-huī ê uē, sī īng Sìng-Sîn só͘ kà-sī ê uē. 14 M̄-koh sio̍k hiat-khì ê lâng bē-tàng niá-siū Siōng-Tsú ê Sìng-Sîn ê un-sù, in tsiah-ê un-sù khuàⁿ-tsò sī gû-gōng, mā bô-huat-tō͘ liáu-kái, in-uī lîng-sìng ê lâng tsiah ē-tàng hiáu-ngō͘. 15 Lîng-sìng ê lâng ē-tàng phuàⁿ-tuàn bān-hāng sū, m̄-koh i ka-kī pún-sin ê tāi-tsì bô-lâng ē-tàng kā i phuàⁿ-tuàn. 16 Sìng-king ū kì-tsài: Siáⁿ-lâng tsai Tsú ê sim-ì? Siáⁿ-lâng ē-tàng thè I tshut tsú-ì?( tsù: ISA 40:13) M̄-koh lán lîng-sìng ê lâng ū Ki-tok ê sim-tsì.