《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第三章

作者 巴克禮普世版小組 2015.01.18

3 Siōng-Tsú ê Tâng-kang Hiaⁿ-tī tsí-muē ah, guá tsîng kah lín kóng-uē, bē-tàng kā lín tòng-tsò lîng-sìng ê lâng, sī tòng-tsò sio̍k-sè ê lâng, tuì Ki-tok ê sìn-gióng lâi khuàⁿ sī kah-ná eⁿ-á. 2 Guá īng ling kā lín tshī, bô īng pn̄g, in-uī lín iáu bē-tàng tsia̍h pn̄g. Kàu tsit-má iáu sī án-ne. 3 In-uī lín iáu-koh sio̍k-sè ê lâng. Lín tiong-kan ū tsi̍t-tò͘, ū hun-tsing, án-ne kám m̄-sī tsìng-bîng lín sī sio̍k-sè, tsiàu sè-kan-lâng ê khuán-sit teh sing-ua̍h? 4 Lín tiong-kan ū-lâng kóng, "Guá sio̍k Pó-lô", mā ū-lâng kóng, "Guá sio̍k A-pho-lô", án-ne lín kám m̄-sī kah sè-kan-lâng kāng-khuán? 5 A-pho-lô sǹg siàⁿ? Pó-lô sǹg siáⁿ? Guán put-kò sī Tsú ê tshe-īng, ín-tshuā lín sìn Tsú, tsiàu Tsú só͘ hō͘ guán ê tsit-hūn teh tsò. 6 Guá iā-tsíng, A-pho-lô ak-tsuí, m̄-koh sī Siōng-Tsú hō͘ i tuā-tsâng. 7 Iā-tsíng ê kah ak-tsuí ê lóng bô tiōng-iàu, hō͘ i tuā-tsâng ê Siōng-Tsú tsiah tiōng-iàu. 8 Iā-tsíng ê kah ak-tsuí ê lóng kāng-khuán, Siōng-Tsú ē tsiàu ta̍k-lâng ê kang-tsok kā in pò-siúⁿ. 9 In-uī guán sī Siōng-Tsú ê tâng-kang, lín sī Siōng-Tsú ê tshân-hn̂g, mā sī Siōng-Tsú ê kiàn-tio̍k-bu̍t. 10 Tsiàu Siōng-Tsú siúⁿ-sù hō͘ guá ê un-tián, guá tshin-tshiūⁿ tsi̍t-ê láu-liān ê sai-hū-thâu, guá hē tē-ki, pa̍t-lâng tī hit tíng-bīn khí-tshù, m̄-koh ta̍k-lâng tio̍h tsù-ì khuàⁿ ka-kī án-tsuáⁿ teh khí-tsō. 11 In-uī Siōng-Tsú í-king hē Iâ-so͘ Ki-tok tsò î-it ê tē-ki, í-guā bô pa̍t-ê tē-ki. 12 Tī tsit-ê tē-ki tíng-bīn, lâng nā īng kim, gîn, pó-tsio̍h, tshâ, tsháu, á-sī tiū-kó lâi khí-tsō. 13 Ta̍k-lâng ê kang-hu khí-liáu hó-bái, tī Ki-tok tsài-lîm ê ji̍t-tsí, ē hō͘ hué kā i hián-hiān tshut-lâi, in-uī hué ē tshì-giām tshut ta̍k-lâng ê kang-hu sī sím-mi̍h khuán. 14 Lâng só͘ khí-tsō ê kang-thîng nā bô hō͘ hué sio-khì, tsiū ē tit-tio̍h pò-siúⁿ. 15 Lâng só͘ khí-tsō ê kang-thîng nā hō͘ hué sio-khì, tsiū bē tit-tio̍h pò-siúⁿ, m̄-koh i pún-sin ē tit-tio̍h kiù, ná tshin-tshiūⁿ tuì hué-tiong tô-miā tshut-lâi. 16 Lín kám m̄-tsai lín sī Siōng-Tsú ê tiān, Siōng-Tsú ê Sìng-Sîn tiàm-tī lín lāi-bīn? 17 Lâng nā huí-huāi Siōng-Tsú ê tiān, Siōng-Tsú ē kā i huí-bia̍t, in-uī Siōng-Tsú ê tiān sī sîn-sìng, lín tsiū-sī hit-ê tiān. 18 Lín m̄-thang khi-phiàn ka-kī. Lín tiong-kan nā ū-lâng īng sè-kan ê phiau-tsún kā ka-kī khuàⁿ-tsò ū tì-huī, i tian-tò tio̍h tsò gû-gōng ê lâng tsiah ē-tàng tsiâⁿ-tsò tsin-tsiàⁿ ū tì-huī. 19 In-uī tsit sè-kan ê tì-huī tsiàu Siōng-Tsú khuàⁿ khí-lâi sī gû-gōng, in-uī Sìng-king ū kì-tsài: Hō͘ tì-huī ê lâng tiòng-tio̍h in ka-kī ê khuí-kè.( tsù: IPK 5:13) 20 Sìng-king pa̍t-ê só͘-tsāi koh kóng: Tsú tsai ū tì-huī ê lâng ê sim-su bô-lō͘-īng.( tsù: SPh 94:11) 21 Só͘-í m̄-thang khua-kháu lâng ē-tàng tsò ê tāi-tsì, in-uī bān-bu̍t lóng sī lín-.ê. 22 Bô-lūn Pó-lô, A-pho-lô á-sī Pí-tik, bô-lūn tsit sè-kài sī ua̍h-teh á-sī sí-bông, hiān-kim á-sī tsiong-lâi, tse it-tshè lóng sī lín-.ê. 23 Lín sī Ki-tok-.ê, Ki-tok sī Siōng-Tsú-.ê.