《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第四章

作者 巴克禮普世版小組 2015.01.25

Ki-tok ê Sù-tô͘
1 Lín tio̍h kā guán khuàⁿ-tsò sī Ki-tok ê tshe-īng, tsò Siōng-Tsú ò-biāu tsin-lí ê kuán-ke. 2 Tuì kuán-ke ê iau-kiû sī tuì tsú-lâng tio̍h tsīn-tiong. 3 Guá hō͘ lín á-sī pa̍t-lâng phue-phîng, lóng khuàⁿ-tsò sī sió-khuá tāi-tsì, liân guá mā bô phue-phîng ka-kī. 4 Guá lóng m̄-bat tsik-pī ka-kī, m̄-koh m̄-sī án-ne tsiū tsìng-bîng guá bô tsuē, in-uī kā guá sím-phuàⁿ ê sī Tsú. 5 Só͘-í sî-ki iáu-buē kàu, lín m̄-thang phue-phîng lâng, tán-kàu Tsú tsài-lîm ê sî, I ē īng kng tsiò o͘-àm ún-ba̍t ê pì-bi̍t, kā ún-tsông tī sim-lāi ê kè-bô͘ hián-lō͘ tshut-lâi. Hit sî, ta̍k-lâng ē tuì Siōng-Tsú tit-tio̍h I ê o-ló. 6 Hiaⁿ-tī tsí-muē ah, uī-tio̍h lín guá tsiah īng pún-sin kah A-pho-lô tsò-lē lâi kóng-khí tsiah-ê tāi-tsì, hō͘ lín thang tuì guán lâi ha̍k-si̍p "M̄-thang tshiau-kuè Sìng-king só͘ kì-tsài" tsit-kù uē ê ì-sù. Lín tiong-kan bô-lūn sím-mi̍h lâng to m̄-thang kiau-ngō͘, tsun-tiōng tsit-ê, khuàⁿ-khin hit-ê. 7 Sím-mi̍h lâng hō͘ lí siūⁿ-kóng lí pí pa̍t-lâng khah-gâu? Lí só͘ ū ê kám m̄-sī lóng tuì Siōng-Tsú niá-siū-.ê? M̄-koh lí ná-ē khua-kháu, ná tshin-tshiūⁿ m̄-sī tuì Siōng-Tsú niá-siū-.ê? 8 Lín í-king ta̍k-hāng lóng ū, í-king hó-gia̍h, lín í-king pàng-sak guán khì tsò ông. Guá tsin-tsiàⁿ ài lín tsò ông, hō͘ guán mā thang kah lín tsò-hué tsò ông. 9 Guá teh siūⁿ, Siōng-Tsú tsiong guán tsiah-ê sù-tô͘ pâi tī bé-liu, tshin-tshiūⁿ sí-hîng-huān hō͘ lâng thua tshut-lâi, hō͘ sè-kan, thiⁿ-sài kah lâng khuàⁿ tsit-tshut hì. 10 Guán uī-tio̍h Ki-tok ê iân-kò͘ tsò gōng-lâng, lín kah Ki-tok kiat-liân tsò khiáu-lâng. Guán luán-jio̍k, lín ióng-tsòng; lín siū tsun-tiōng, guán hō͘ lâng khin-sī. 11 Kàu tsit sî, guán iáu-koh teh iau, tshuì-ta, thǹg-pak-theh, hō͘ lâng phah, sì-kè teh liû-lōng. 12 Guán khò siang-tshiú thua-buâ tō͘ ji̍t-tsí. Guán hông mē tian-tò kā in tsiok-hok; siū lâng pik-hāi, guán jím-nāi. 13 Guán siū huí-pòng iáu-koh hó-tshuì ìn-tap. Taⁿ guán kìng-jiân hō͘ lâng khuàⁿ-tsò sī sè-kan ê pùn-sò, bān-bu̍t ê pùn-sò-tui. 14 Guá siá tsiah-ê m̄-sī beh hō͘ lín kiàn-siàu, sī kā lín khuàⁿ-tsò guá só͘ thiàⁿ ê kiáⁿ-jî teh kā lín kà-sī. 15 Lín kah Ki-tok kiat-liân, lāu-su sui-jiân ū kui-bān-ê, m̄-koh lāu-pē kan-taⁿ tsi̍t-ê. Guá bat thong-kuè hok-im tī Ki-tok Iâ-so͘ ê thiàⁿ ê lāi-bīn tsiâⁿ-tsò lín ê lāu-pē. 16 Só͘-í guá khǹg lín tio̍h o̍h guá. 17 In-uī án-ne, guá tshe-phài Thê-mô͘-thài khì lín hia. Tī Tsú ê lāi-bīn, i sī guá só͘ thiàⁿ koh tsīn-tiong ê kiáⁿ, i ē tsiong guá kah Ki-tok kiat-liân ê bô͘-huān, tsiū-sī guá tī ta̍k só͘-tsāi, tī ta̍k kàu-huē só͘ kà-sī ê tāi-tsì, kóng hō͘ lín tsai. 18 Ū-lâng siūⁿ-kóng guá bē khì lín hia, tsiū kiau-ngō͘ tsū-tāi. 19 M̄-koh Tsú nā ín-tsún, guá liâm-piⁿ to̍h ē khì lín hia. Hit sî, guá to̍h ē tsai hiah-ê kiau-ngō͘ tsū-tāi ê lâng teh kóng sím-mi̍h uē, mā ē tsai in ē-tàng tsò sím-mi̍h. 20 In-uī Siōng-Tsú ê Kok-tō͘ m̄-sī khò kóng-uē, sī khò kuân-lîng. 21 Lín ài tó tsi̍t-hāng? Guá khì lín hia ê sî, lín ài guá gia̍h tshuê-á khì á-sī tuà thiàⁿ-sim kah un-jiû ê sim khì?