《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第五章

作者 巴克禮普世版小組 2015.02.01

Kàu-huē Tiong Ū Îm-luān
1 Guá khak-si̍t thiaⁿ-tio̍h lín tiong-kan ū îm-luān ê tāi-tsì, hit-khuán ê îm-luān liân kàu-huē-guā mā bô, tsiū-sī ū-lâng siu-liû āu-bú tsò bó͘. 2 Lín ná-ē iáu-teh kiau-ngō͘ tsū-tāi? kìng-jiân bô kám-kak ai-siong, tsiong tsò tsit-tsióng tāi-tsì ê lâng tuì lín tiong-kan kuáⁿ tshut-khì! 3 Guá lâng sui-jiân bô tī lín hia, sim khiok kah lín tsò-hué. Guá í-king hōng Tsú Iâ-so͘ ê miâ kā huān tsit-tsióng tsuē ê lâng phuàⁿ-tsuē. 4 Tsiū-sī lín tsū-huē ê sî, guá ê sim-lîng kah lín tsò-hué, khò lán ê Tsú Iâ-so͘ ê kuân-lîng, 5 tsiong hit-tsióng lâng ê sing-khu kau hō͘ Sat-tàn khì huí-huāi i ê jio̍k-thé, thang hō͘ i ê lîng-hûn tī lán ê Tsú Iâ-so͘ tsài-lîm ê ji̍t-tsí tit-kiù. 6 Lín ê khua-kháu tsin m̄-hó. Lín kám m̄-tsai tām-po̍h-á kàⁿ-bó ē kā kui-sn̂g ê mī-hún-tshè huat khí-lâi? 7 Kū ê kàⁿ tio̍h tû hō͘ tshing-khì, hō͘ lín tsiâⁿ-tsò sin ê mī-hún-tshè, kî-si̍t lín sī bô kàⁿ ê tshè, in-uī lán Puâⁿ-kuè-tseh ê iûⁿ-ko, Ki-tok í-king uī lán hi-sing ā. 8 Só͘-í lán m̄-thang īng pháiⁿ-sim ok-to̍k ê kū kàⁿ-bó, tio̍h īng sûn-tsuân tsin-si̍t ê bô-kàⁿ-piáⁿ tsò tsè-mi̍h lâi siú-tseh. 9 Tsîng guá kià hit-tiuⁿ phue hō͘ lín, ū kā lín kíng-kài m̄-thang kah îm-luān ê lâng lâi-óng. 10 Guá m̄-sī teh tsí sè-kan hiah-ê îm-luān, tham-sim, tsà-khi, á-sī pài ngó͘-siōng ê lâng. Nā sī án-ne, lín suah tio̍h lī-khui sè-kan tsiah ū khó-lîng. 11 M̄-koh taⁿ guá siá tsit-tiuⁿ phue hō͘ lín sī kóng, m̄-thang kah hiah-ê tsū-tshing Ki-tok-tô͘ khiok sī îm-luān, tham-sim, pài ngó͘-siōng, huí-pòng, hò͘ⁿ-tsiú, tsà-khi ê lâng lâi-óng. Liân kah tsit-tsióng lâng kāng-toh tsia̍h-pn̄g mā m̄-thang. 12 In-uī phue-phuàⁿ kàu-huē-guā ê lâng m̄-sī guá ê tāi-tsì, Siōng-Tsú ē kā in sím-phuàⁿ. 13 Lín kám m̄-sī tio̍h phue-phuàⁿ kàu-huē-lāi ê lâng? Sìng-king ū kì-tsài: Lín tio̍h kā siâ-ok ê lâng tuì lín tiong-kan kuáⁿ tshut-khì.( tsù: SBK 17:7; 19:19; 22:21, 24; 24:7)