《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第六章

作者 巴克禮普世版小組 2015.02.08

Sìn-tô͘ Tiong-kan ê Hun-tsing
1 Lín tiong-kan ū-lâng kah lâng ū kiù-hun ê sî, ná-ē bô tī sìn-tô͘ ê bīn-tsîng kiû kái-kuat, khiok kò khì bī-sìn-tsiá ê huat-kuaⁿ? 2 Lín kám m̄-tsai sìn-tô͘ beh sím-phuàⁿ sè-kan? Kì-jiân lín beh sím-phuàⁿ sè-kan, kám bē-hiáu sím-phuàⁿ sió-khuá ê tāi-tsì? 3 Lín kám m̄-tsai lán liân thiⁿ-sài to beh sím-phuàⁿ? Tsit sè-kan ji̍t-siông ê tāi-tsì koh-khah bián kóng! 4 Tsit-khuán tāi-tsì, lín kám thang kau hō͘ kàu-huē-guā ê lâng kā lín phuàⁿ-kuat? 5 Guá án-ne kóng sī beh hō͘ lín kám-kak kiàn-siàu. Lín tiong-kan kám bô tsi̍t-ê ū tì-huī ê lâng thang phuàⁿ-tuàn sìn-tô͘ tiong-kan ê kiù-hun? 6 Kìng-jiân ū sìn-tô͘ kò sìn-tô͘, sīm-tsì kò kàu bī-sìn-tsiá ê bīn-tsîng. 7 Kî-si̍t lín tiong-kan ū sio-kò, í-king piáu-sī lín ê tuā sit-tshò. Ná-ē m̄ lîng-khó hō͘ lâng uan-óng? Ná-ē m̄ lîng-khó siū khik-khui? 8 M̄-koh lín tian-tò uan-óng lâng, khik-khui lâng, sīm-tsì tuì kàu-huē-lāi ê hiaⁿ-tī tsí-muē mā án-ne tsò. 9 Lín kám m̄-tsai put-gī ê lâng bē-tàng tsò Siōng-Tsú Kok-tō͘ ê tsú-bîn? M̄-thang khi-phiàn ka-kī. Bô-lūn sī îm-luān ê, pài ngó͘-siōng ê, huān kan-îm ê, tsò lâm-tshiong ê, hò͘ⁿ lâm-sik ê, 10 tsò tsha̍t ê, tham-sim ê, hò͘ⁿ-tsiú ê, huí-pòng ê, tsà-khi ê, lóng bē-tàng tsò Siōng-Tsú Kok-tō͘ ê tsú-bîn. 11 Lín tiong-kan í-tsîng ū-lâng sī án-ne, m̄-koh uá-khò Tsú Iâ-so͘ Ki-tok ê miâ kah lán ê Siōng-Tsú ê Sìng-Sîn, lín í-king sé tshing-khì tsiâⁿ-tsò sìng-kiat, kah Siōng-Tsú ū hô-ha̍p ê kuan-hē.

Īng Sing-khu Îng-kng Siōng-Tsú
12 Ū-lâng kóng, "Ta̍k-hāng tāi-tsì guá lóng thang tsò." M̄-koh m̄-sī ta̍k-hāng tāi-tsì lóng ū lī-ik. Guá mā thang kóng, "Ta̍k-hāng tāi-tsì guá lóng thang tsò." M̄-koh guá bô beh hō͘ jīm-hô tāi-tsì kā guá khòng-tsè. 13 Ū-lâng kóng, "Tsia̍h sī uī-tio̍h pak-tó͘, pak-tó͘ mā sī uī-tio̍h tsia̍h." M̄-koh Siōng-Tsú lóng beh kā tsit nn̄g hāng huí-huāi. Sing-khu m̄-sī uī-tio̍h îm-luān, sī uī-tio̍h ho̍k-sāi Tsú, Tsú mā ē kiong-kip lán sing-khu ê su-iàu. 14 Siōng-Tsú ū hō͘ Tsú tuì sí koh-ua̍h, mā ē īng I ê kuân-lîng hō͘ lán koh-ua̍h. 15 Lín kám m̄-tsai lín ê sing-khu sī Ki-tok ê ki-thé? Án-ne guá kám thang tsiong Ki-tok ê ki-thé piàn-tsò tshiong-ki ê ki-thé? Tsua̍t-tuì m̄-thang. 16 Lín kám m̄-tsai kah tshiong-ki huat-sing jio̍k-thé kuan-hē, tsiū-sī kah i tsiâⁿ-tsò tsi̍t-thé? In-uī Sìng-king ū kóng: Nn̄g-ê beh tsiâⁿ-tsò tsi̍t-thé.( tsù: CSK 2:2) 17 M̄-koh kah Tsú kiat-ha̍p ê lâng tsiū-sī sim-lîng kah Tsú tsiâⁿ-tsò tsi̍t-thé. 18 Lín tio̍h siám-phiah îm-luān. Lâng bô-lūn huān sím-mi̍h tsuē lóng bē íng-hióng ka-kī ê sing-khu, m̄-koh huān kan-îm ê sī huān-tsuē kah hāi-tio̍h ka-kī ê sing-khu. 19 Lín kám m̄-tsai lín ê sing-khu tsiū-sī Sìng-Sîn ê tiān? Sìng-Sîn tiàm-tī lín lāi-bīn tsiū-sī lín tuì Siōng-Tsú só͘ niá-siū ê, koh-tsài kóng, lín m̄-sī sio̍k ka-kī, sī sio̍k Siōng-Tsú. 20 In-uī lín sī I hù-tshut tāi-kè bé lâi-.ê, só͘-í tio̍h īng lín ê sing-khu lâi îng-kng Siōng-Tsú.