《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十三章

作者 巴克禮普世版小組 2011.06.26

1, Tng hit ji̍t, Iâ-so͘ tuì tshù-lāi tshut-khì, tsē tī hái-piⁿ.
2, Ū tsē-tsē tīn ê lâng tsū-tsi̍p tsiū-kūn I, tì-kàu I tsiūⁿ tsûn lâi tsē, kui tīn ê lâng lóng khiā tī huāⁿ-ni̍h.
3, Tsiū īng tsuē-tsuē hāng siat phì-jū kā in kóng,
4, Lí khuàⁿ, ū iā tsíng ê tshut-khì iā tsíng; iā ê sî, ū-ê ka-la̍uh tī lō͘-piⁿ, pe-tsiáu kàu, tsuân-pō͘ tsia̍h i;
5, ū-ê ka-la̍uh tī tsio̍h-keh ê tē, thô͘ tshián ê uī; in-uī thô͘ bô tshim, tsiū huat tsin kín;
6, tān-sī ji̍t tshut pha̍k i; in-uī bô kun, tsiū ko͘-tâ.
7, Ia̍h ū-ê ka-la̍uh tī tshì-á-lāi, tshì-á huat-khí jia-pè i;
8, ū-ê ka-la̍uh tī hó ê thó͘-tē, kiat-si̍t, ū-ê pah pē, ū-ê la̍k-tsa̍p pē, ū-ê saⁿ-tsa̍p pē.
9, Ū hīⁿ-khang ê, tio̍h thiaⁿ.
10, Bûn-tô͘ tsiū-kūn I kóng, Lí īng phì-jū kā in kóng sī tsáiⁿ-iūⁿ?
11, I ìn kóng, Thian-kok ê ò-biāu hō͘ lín tsai, iā bô hō͘ in.
12, In-uī kìⁿ-nā ū ê, bueh hō͘ i, tsiū i ū tshun; bô ê, liân i só͘ ū ê iā bueh tshiúⁿ i.
13, Só͘-í guá īng phì-jū kā in kóng; in-uī in khuàⁿ, iā khuàⁿ bô kìⁿ; thiaⁿ, iā thiaⁿ bô hiān, iā bô hiáu-ngō͘.
14, Í-sài-a só͘ ū-giân ê, sī ìng-giām tī in, kóng, Lín thiaⁿ sī bueh thiaⁿ, tān-sī tsua̍t-tuì bô hiáu-ngō͘; Lín khuàⁿ sī bueh khuàⁿ, tān-sī tsua̍t-tuì khuàⁿ bô kìⁿ;
15, In-uī tsit-ê jîn-bîn sim tūn, Hī-khang tāng, In ê ba̍k-tsiu pàng khueh; Kiaⁿ-liáu in īng ba̍k-tsiu khuàⁿ-tio̍h, Īng hīⁿ-khang thiaⁿ-tio̍h, Īng sim hiáu-ngō͘, Lâi ua̍t-lìn-tńg, Guá tsiū i-hó in.
16, Tān-sī lín ê ba̍k-tsiu ū hok-khì, in-uī in khuàⁿ-tio̍h; lín ê hīⁿ-khang ū hok-khì, in-uī in thiaⁿ-tio̍h.
17, In-uī guá si̍t-tsāi kā lín kóng, Tsîng ū tsuē-tsuē sian-ti kap gī lâng, ài khuàⁿ lín só͘ khuàⁿ-tio̍h ê, iā bô khuàⁿ-tio̍h; ài thiaⁿ lín só͘ thiaⁿ-tio̍h ê, iā bô thiaⁿ-tio̍h.
18, Taⁿ tsit-ê iā tsíng-tsí ê ê phì-jū, lín tio̍h thiaⁿ.
19, Kìⁿ-nā thiaⁿ Thian-kok ê tō-lí iā bô hiáu-ngō͘ ê, hit ê pháiⁿ-ê tsiū kàu, tsiong só͘ iā tī i ê sim ê tshiúⁿ-khì; tse sī iā tī lō͘-piⁿ ê.
20, Iā tī tsio̍h-keh ê tē ê, tse sī lâng thiaⁿ tō-lí, liâm-piⁿ huaⁿ-hí sîng-siū i;
21, tān-sī lāi-bīn bô kun, put-kò sī tsiām-sî nā-tiāⁿ; kàu uī-tio̍h tō-lí tú-tio̍h ū huān-lān pik-hāi liâm-piⁿ kha that-tio̍h.
22, Iā tī tshì-á-lāi ê, tse sī lâng thiaⁿ tō-lí, iā sè-kan ê khuà-lū, tsîⁿ-tsâi ê bê-hi̍k, jia-pè hit ê tō-lí, tsiū bô kiat-si̍t.
23, Iā tī hó thó͘-tē ê, tse sī lâng thiaⁿ tō-lí lâi hiáu-ngō͘, i si̍t-tsāi kiat-si̍t; só͘ kiat ê, ū-ê pah pē, ū-ê la̍k-tsa̍p pē, ū-ê saⁿ-tsa̍p pē.
24, Koh siat phì-jū tuì in kóng, Thian-kok tshin-tshiūⁿ lâng iā hó tsíng-tsí tī i ê hn̂g;
25, lâng khùn ê sî, i ê siû-ti̍k lâi, iā phuē tī be̍h tiong, tsiū khì.
26, Kàu be̍h huat-khí-lâi, suà kiat suī ê sî, phuē iā tshut-hiān.
27, Ke-tsú ê lô͘-po̍k lâi kā i kóng, Thâu-ke ah, lí kiám m̄-sī iā hó tsíng-tsí tī lí ê hn̂g mah? tuì tó-uī ū phuē?
28, I kā in kóng, Tse tsiū-sī siû-ti̍k tsò ê. Lô͘-po̍k kā i kóng, Lí ài guán khì khau i mah?
29, I tsiū kóng, Bô, kiaⁿ-liáu lín khau phuē, liân be̍h suà pui̍h-khí-lâi.
30, Iông-ún nn̄g hāng pîⁿ-pîⁿ tuā tsâng, thìng-hāu siu-kuah; kàu siu-kuah ê sî, guá bueh kā kuah-ê kóng, Tāi-sing khioh hiah-ê phuē, hâ kui pé thang sio i; tsí-ū be̍h tio̍h siu-ji̍p guá ê tshik-tshng.
31, Koh siat phì-jū tuì in kóng, Thian-kok tshin-tshiūⁿ tsi̍t lia̍p kuà-tshài tsí, lâng the̍h khì iā tī i ê hn̂g;
32, tsit-ê sī pah hāng tsíng-tsí ê tē it suè; kàu i tuā tsâng, sī khah tuā lóng-tsóng ê tshài-sue, suà tsiâⁿ tsò tshiū, tì-kàu khong-tiong ê tsiáu lâi hioh tī i ê ki.
33, Koh īng phì-jū kā in kóng, Thian-kok tshin-tshiūⁿ kàⁿ, hū-jîn-lâng the̍h khì khǹg tī saⁿ táu mī-hún ê lāi-bīn, kàu lóng huat kàⁿ.
34, Tsiah-ê lóng sī Iâ-so͘ īng phì-jū kā tsìng lâng kóng; nā m̄-sī īng phì-jū, tsiū bô só͘ kā in kóng;
35, lâi ìng-giām tsá thok sian-ti só͘ kóng ê, kóng, Guá bueh khui tshuì siat phì-jū, Tshián-bîng tshòng-tsō sè-kan í-lâi só͘ ún-ba̍t ê.
36, Hit sî Iâ-so͘ hō͘ tsìng lâng sì-suàⁿ, tsiah ji̍p tshù; I ê bûn-tô͘ tsiū-kūn I kóng, Hn̂g ê phuē-á ê phì-jū, kā guán kué-bîng.
37, I ìn kóng, Iā hó tsíng-tsí ê sī Jîn-tsú; hn̂g tsiū-sī sè-kan;
38, hó tsíng-tsí ê tsiū-sī Thian-kok ê kiáⁿ; phuē, tsiū-sī pháiⁿ-ê ê kiáⁿ;
39, iā phuē ê siû-ti̍k, tsiū-sī Mô͘-kuí; siu-kuah ê sî, sī sè-kài ê lō͘-bé; kuah ê, tsiū-sī thiⁿ-sài.
40, Só͘-í tshin-tshiūⁿ khioh phuē-á lâi īng hué sio; tī sè-kài ê lō͘-bé iā bueh án-ne.
41, Jîn-tsú bueh tshe I ê thiⁿ-sài tuì I ê kok-lāi siu-si̍p kìⁿ-nā hō͘ lâng kha that-tio̍h ê, kap tsò put-huat ê;
42, hiat in tī hué-lô͘, tī hia bueh ū thî-khàu kā-gê tshiat-khí.
43, Hit sî gī lâng bueh huat-tshut kng tshin-tshiūⁿ ji̍t, tī in ê Pē ê kok. Ū hīⁿ-khang ê tio̍h thiaⁿ.
44, Thian-kok tshin-tshiūⁿ pó-puè khǹg tī hn̂g-ni̍h; lâng tú-tio̍h tsiū khǹg-ba̍t i; in-uī huaⁿ-hí tsiah khì bē it-tshè só͘ ū ê, lâi bué hit khu hn̂g.
45, Koh Thian-kok tshin-tshiūⁿ sing-lí lâng tshuē hó ê tsu;
46, tú-tio̍h tsi̍t lia̍p put-tsí ta̍t tsîⁿ ê, tsiū khì bē it-tshè só͘ ū ê lâi bué i.
47, Koh Thian-kok tshin-tshiūⁿ bāng pha tī hái-ni̍h, tsū-tsi̍p ta̍k luī ê tsuí-tso̍k;
48, í-king muá, tsiū thua tsiūⁿ phiâⁿ; tsē-teh, khioh hó ê ji̍p khì-kū, m̄ hó ê hiat-ka̍k tī guā-bīn.
49, Sè-kài ê lō͘-bé, iā bueh án-ne; tsiah-ê thiⁿ-sài bueh tshut-lâi, tuì gī lâng ê tiong-kan lâi hun-piat pháiⁿ lâng;
50, hiat in tī hué-lô͘, tī hia bueh ū thî-khàu kā-gê tshiat-khí.
51, Tsiah-ê lín lóng ē hiáu-tit buē? In kóng, Uē.
52, I kā in kóng, Só͘-í kìⁿ-nā king-ha̍k-kàu-su tsò Thian-kok ê bûn-tô͘ ê, sī tshin-tshiūⁿ ke-tsú tuì i ê khò͘-pâng the̍h-tshut sin kū ê mi̍h ê.
53, Iâ-so͘ í-king kóng tsiah-ê phì-jū bîng-pi̍k, tsiū lī-khui hia.
54, Kàu I ê pún hiuⁿ, tī in ê huē-tn̂g kà-sī in; tì-kàu in gông-ngia̍h kóng, Tsit-ê lâng tuì tó-uī tit-tio̍h tsit-ê tì-huī, kap tsiah-ê kuân-lîng ah?
55, Tsit-ê kiám m̄-sī ba̍k-tshiūⁿ ê kiáⁿ mah? I ê lāu-bú kiám m̄-sī kiò tsò Má-lī-a, I ê hiaⁿ-tī Ngá-kok, Iok-sik, Se-bûn, Iû-tāi mah?
56, I ê tsí-bē kiám bô lóng kap lán tī tsia mah? Án-ne tsit-ê lâng tuì tó-uī tit-tio̍h tsiah-ê it-tshè ah?
57, In tsiū iàm-tsiān I. Tān-sī Iâ-so͘ kā in kóng, Sian-ti lâng tī pún hiuⁿ pún ke í-guā, bô m̄ tsun-kuì.
58, Iâ-so͘ tī hia bô kiâⁿ tsē-tsē kuân-lîng, in-uī in bô sìn I.