《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第七章

作者 巴克禮普世版小組 2015.02.15

Hun-in ê Būn-tê
1 Kuan-hē lín tī phue lāi-bīn thê-khí ê būn-tê: lâng bô kiat-hun khah hó. 2 M̄-koh in-uī lín ū tsi̍t-kuá îm-luān ê tāi-tsì, só͘-í ta̍k-ê tsa-po͘-lâng tio̍h ū ka-kī ê bó͘, ta̍k-ê tsa-bó͘-lâng mā tio̍h ū ka-kī ê ang. 3 Tsa-po͘-lâng tuì bó͘ tio̍h tsīn tsò ang ê gī-bū, tsa-bó͘-lâng tuì ang mā tio̍h tsīn tsò bó͘ ê gī-bū. 4 Bó͘ tuì ka-kī ê sing-khu bô tsú-kuân, i ê tsú-kuân tsāi-tī in ang. Siāng-khuán, ang tuì ka-kī ê sing-khu bô tsú-kuân, i ê tsú-kuân tsāi-tī in bó͘. 5 M̄-thang hut-lio̍k tuì-hong ê su-iàu. Nā-sī uī-tio̍h beh tsuan-sim kî-tó, hō͘-siong tông-ì tsiū thang tsiām-sî hun-khui. Āu-lâi iû-guân tio̍h tsò-hué tuà, tsiah bián-tit in-uī bē-tàng khòng-tsè ka-kī ê tsîng-io̍k, tì-sú siū Sat-tàn ê iú-hi̍k. 6 Guá kóng ang-bó͘ thang tsiām-sî hun-khui, sī ín-tsún, m̄-sī bīng-līng. 7 Guá ài ta̍k-lâng lóng tshin-tshiūⁿ guá bô kiat-hun, m̄-koh ta̍k-lâng tuì Siōng-Tsú niá-siū ê un-sù bô kāng-khuán. Ū-ê tsit khuán, ū-ê hit khuán. 8 Tuì hiah-ê buē kiat-hun kah kuáⁿ-hū, guá khǹg in nā ē-tàng tshin-tshiūⁿ guá siú to̍k-sin sī hó. 9 M̄-koh nā bē-tàng khòng-tsè ka-kī, tsiū tio̍h kiat-hun. Lîng-khó kiat-hun, pí hō͘ io̍k-hué sio khah hó. 10 Í-king kiat-hun ê lâng, guá bīng-līng lín, kî-si̍t m̄-sī guá, sī Tsú ê bīng-līng: tsa-bó͘-lâng m̄-thang lī-khui in ang. 11 Nā lī-khui, tsiū tio̍h siú to̍k-sin. Nā bô tio̍h koh kah in ang hô-hó. Tsa-po͘-lâng mā m̄-thang pàng-sak in bó͘. 12 Tuì kî-tha ê lâng guá kóng, m̄-sī Tsú kóng: Nā lâm-sìn-tô͘ tshuā bô sìn Tsú ê lâng tsò bó͘, in bó͘ huaⁿ-hí tsò-hué tuà, tsiū m̄-thang kā i pàng-sak. 13 Nā lí-sìn-tô͘ kah bô sìn Tsú ê lâng kiat-hun, ang huaⁿ-hí kah i tsò-hué tuà, mā m̄-thang kā in ang pàng-sak. 14 Bô sìn Tsú ê tsa-po͘-lâng in-uī tshuā sìn Tsú ê lâng tsò bó͘ ē tit-tio̍h Siōng-Tsú ê tsiap-la̍p. Kāng-khuán án-ne, bô sìn Tsú ê tsa-bó͘-lâng in-uī kè sìn Tsú ê ang ē tit-tio̍h Siōng-Tsú ê tsiap-la̍p. Nā m̄-sī án-ne, lín ê kiáⁿ-jî tsiū bô sio̍k Siōng-Tsú, kî-si̍t in sī kui-sio̍k Siōng-Tsú. 15 M̄-koh bô sìn Tsú ê lâng nā beh lī-khui, tsiū tshut-tsāi i lī-khui. Tī tsit-khuán ê tsîng-hîng, sìn Tsú ê ang á-sī bó͘ tsiū bô siū hun-in ê iok-sok. Siōng-Tsú ho͘-tiàu lán sī ài lán pîng-an kuè ji̍t-tsí. 16 Lín tio̍h tsai, sìn Tsú ê tsa-bó͘-lâng kiám-tshái ē kiù ka-kī ê ang. Tio̍h tsai, sìn Tsú ê tsa-po͘-lâng kiám-tshái ē kiù ka-kī ê bó͘.

Tio̍h Pó-tshî Siū Tiàu Hit Sî ê Sin-hūn
17 Ta̍k-lâng tio̍h tsiàu Tsú siúⁿ-sù ê un-sù, tsiàu Siōng-Tsú kíng-tiàu ta̍k-lâng ê bo̍k-tik lâi sing-ua̍h. Tse sī guá kàu-tō kok kàu-huē ê tsún-tsik. 18 Siū kat-lé liáu-āu tsiah tsiap-siū ho͘-tiàu ê lâng m̄-bián am-khàm kat-lé ê kì-hō. Siū ho͘-tiàu ê sî iáu-buē siū kat-lé ê lâng mā m̄-bián khì siū kat-lé. 19 In-uī ū siū á-sī bô siū kat-lé lóng bô iàu-kín, siōng iàu-kín ê sī tsun-siú Siōng-Tsú ê kài-bīng. 20 Ta̍k-lâng tio̍h pó-tshî siū-tiàu hit sî ê sin-hūn. 21 Lí tsò lô͘-lē ê sî lâi siū-tiàu sī-bô? M̄-bián kuà-ì, m̄-koh nā ū ki-huē tit-tio̍h tsū-iû, tio̍h pá-ak ki-huē. 22 In-uī siū Tsú kíng-tiàu ê lô͘-lē sī hō͘ Tsú tháu-pàng ê tsū-iû-lâng. Siāng-khuán, siū Tsú kíng-tiàu ê tsū-iû-lâng sī Ki-tok ê lô͘-po̍k. 23 Lín sī Siōng-Tsú īng tāi-kè bé lâi-.ê, m̄-thang tsiâⁿ-tsò lâng ê lô͘-lē. 24 Hiaⁿ-tī tsí-muē ah, ta̍k-lâng tio̍h tī Siōng-Tsú ê bīn-tsîng pó-tshî lín guân-lâi ê sin-hūn.

To̍k-sin kah Kuáⁿ-hū ê Būn-tê
25 Kuan-hē to̍k-sin ê būn-tê, guá bô siū Tsú ê bīng-līng, m̄-koh guá í-king tit-tio̍h Tsú ê liân-bín lâi tsiâⁿ-tsò tsīn-tiong ê lô͘-po̍k, guá thê-tshut ka-kī ê ì-kiàn. 26 Khó-lī bo̍k-tsîng ê kan-lân ê tshù-kíng, guá siūⁿ lâng iáu-sī pó-tshî hiān-tsōng khah hó. 27 Nā í-king tshuā-bó͘ tsiū m̄-thang siūⁿ beh tsū-iû. Nā iáu-buē tshuā-bó͘ tsiū m̄-thang siūⁿ beh tshuā. 28 M̄-koh lí nā tshuā, m̄-sī huān-tsuē; tsāi-sik-lí nā kè, mā m̄-sī huān-tsuē. M̄-koh in hit tsióng lâng beh tī jio̍k-thé tú-tio̍h huān-lān; guá sī teh kò͘ lín. 29 Hiaⁿ-tī tsí-muē ah, guá kā lín kóng, sî-ji̍t teh-beh kàu à, só͘-í tuì taⁿ í-āu, ū bó͘ ê tio̍h tshin-tshiūⁿ bô bó͘; 30 teh thî-khàu ê tshin-tshiūⁿ bô teh thî-khàu; huaⁿ-hí ê tshin-tshiūⁿ bô teh huaⁿ-hí; bé mi̍h-kiāⁿ ê tshin-tshiūⁿ bô tit-tio̍h sím-mi̍h; 31 teh īng sè-kan ê mi̍h ê tshin-tshiūⁿ bô teh lām-sám īng,in-uī tsit sè-kan ê hiān-tsōng teh-beh kuè-khì à. 32 Guá ài lín lóng bô-huân bô-ló. Bô tshuā-bó͘ ê lâng kuan-sim Tsú ê tāi-tsì, bo̍k-tik sī beh hō͘ Tsú huaⁿ-hí. 33 M̄-koh ū bó͘ ê lâng tshau-huân sè-kan ê tāi-tsì, bo̍k-tik sī beh hō͘ bó͘ huaⁿ-hí, suah hun-sim. 34 Bô kè ê tsa-bó͘-lâng kah siáu-lí kuan-sim Tsú ê tāi-tsì, sī beh hō͘ i ê sing-khu kah sim-lîng lóng sìng-kiat, m̄-koh kè-ang ê tsa-bó͘-lâng tshau-huân sè-kan ê tāi-tsì, bo̍k-tik sī beh hō͘ in ang huaⁿ-hí. 35 Guá án-ne tuì lín kóng sī uī-tio̍h lín ê lī-ik, m̄-sī beh kā lín sok-pa̍k, sī ài lín tsò ha̍p-gî ê tāi-tsì, thang tsuan-sim ho̍k-sāi Tsú, bô sè-kan-sū ê kiáu-jiáu. 36 M̄-koh nā ū lâng siūⁿ-kóng ka-kī tuì-thāi buē tshut-kè ê tsa-bó͘-kiáⁿ bô ing-kai, tsa-bó͘-kiáⁿ nā í-king tshiau-kuè kiat-hun ê nî-lîng, ing-kai tio̍h tsiàu i ê ì-sù hō͘ i kiat-hun, án-ni tsò m̄-sī huān-tsuē. 37 M̄-koh i nā bô put-tik-í ê tāi-tsì, sī tshut-tī ka-kī ê kuat-sim, koh ē-tàng khòng-tsè ka-kī ê ì-tsì, kuat-tīng bô beh hō͘ tsa-bó͘-kiáⁿ kiat-hun, án-ne tsò sī hó. 38 Tsóng-kóng tsi̍t-kù, hō͘ ka-kī ê tsa-bó͘-kiáⁿ kiat-hun sī hó, bô hō͘ i tshut-kè koh-khah hó. 39 Tiōng-hu iáu ua̍h-teh ê sî, hit-ê tsa-bó͘-lâng tio̍h siū sok-pa̍k. Tiōng-hu nā sí-khì, i thang tsū-iû kè i só͘ ì-ài ê lâng, m̄-koh tio̍h kè hō͘ sìn Tsú ê lâng tsiah thang. 40 I nā bô koh kè sī koh-khah ū hok-khì. Tse sī guá siūⁿ-huat, tsóng-sī guá siūⁿ gua mā ū siū Siōng-Tsú ê Sìng-Sîn khé-sī.