《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第九章

作者 巴克禮普世版小組 2015.03.01

Sù-tô͘ ê Kuân-lī kah Tsik-jīm
1 Guá kám bô tsū-iû? Guá kám m̄-sī sù-tô͘? Guá kám m̄-bat khuàⁿ-tio̍h lán ê Tsú Iâ-so͘? Lín kám m̄-sī guá uī Tsú tsò-kang ê sîng-kó? 2 Tuì pa̍t-lâng lâi khuàⁿ guá kiám-tshái m̄-sī sù-tô͘, tuì lín lâi kóng guá khak-si̍t sī, in-uī lín kah Tsú kiat-liân tsiū-sī guá tsò sù-tô͘ ê tsìng-kì. 3 Tuì hiah-ê phue-phîng guá ê lâng, guá án-ne uī ka-kī piān-kái. 4 Guán kám bô kuân thang lim thang tsia̍h? 5 Guán kám bô kuân kah kî-tha ê sù-tô͘, Tsú ê hiaⁿ-tī í-ki̍p Pí-tik kāng-khuán, thang tshuā sìn Tsú ê tsí-muē tsò bó͘ lâi tsò-hué lí-hîng? 6 Kám kan-taⁿ guá kah Pa-ná-pa it-tīng tio̍h tsò-kang tsiah ē-tàng sing-ua̍h? 7 Kám ū-lâng teh tsò-ping koh tsia̍h-ka-kī? Kám ū-lâng tsai phû-tô-hn̂g bô tsia̍h hn̂g-lāi tshut-sán ê kué-tsí? Kám ū-lâng tshī iûⁿ bô lim hit-ê iûⁿ-ling? 8 Guá kóng tsiah-ê kám sī tsiàu lâng ê ì-kiàn? Lu̍t-huat kám m̄-sī mā án-ne kóng? 9 Mô͘-se ê lu̍t-huat kì-tsài: Gû teh lún ngó͘-kok ê sî, m̄-thang kā i kuà gû-tshuì-lom.( tsù: SBK 25:4) Siōng-Tsú kám m̄-sī teh kuan-sim gû? 10 Mô͘-se kóng tsiah-ê uē kám m̄-sī uī-tio̍h lán kóng-.ê? Tong-jiân sī! In-uī king-tsoh ê kah siu-kuah ê lóng khǹg ǹg-bāng teh king-tsoh, kî-thāi tsò-hué ū hūn tit-tio̍h ngó͘-kok. 11 Guán tsiong lîng-sìng ê tsíng-tsí iā tī lín tiong-kan, án-ne tuì lín tit-tio̍h bu̍t-tsit-siōng ê kiong-kip, kám ū kuè-hūn? 12 Pa̍t-lâng nā ū kuân tuì lín iau-kiû, guán kám m̄-sī koh-khah ū kuân? M̄-koh guán lóng m̄-bat sú-iōng tsit-ê kuân, tian-tò jím-nāi it-tshè, tsiah bián hō͘ Ki-tok ê hok-im siū tsó͘-gāi. 13 Lín lóng tsai, tī sìng-tiān teh kang-tsok ê lâng tuì sìng-tiān tit-tio̍h tsia̍h-mi̍h; tī tsè-tuâⁿ teh hiàn-tsè ê lâng pun-tio̍h tsè-tuâⁿ-tíng ê tsè-mi̍h? 14 Tshin-tshiūⁿ án-ne, Tsú siat-huat hō͘ thuân hok-im ê lâng tio̍h tuì hok-im ê kang-tsok lâi tit-tio̍h sing-ua̍h huì-iōng. 15 M̄-koh guá lóng m̄-bat sú-iōng tsiah-ê kuân. Guá tsit-má án-ne siá mā m̄-sī ài lâng án-ne lâi khuán-thāi guá, in-uī guá lîng-khó iau-sí mā bô ài hō͘ guá só͘ khua-kháu ê tāi-tsì piàn-tsò iú-bîng bû-si̍t. 16 Guá thuân hok-im pīng bô sím-mi̍h thang khua-kháu. Guá sī hōng bīng-līng teh thuân, in-uī nā bô thuân hok-im, guá tsiū ē ū tsai-hō. 17 Guá nā kam-sim tsò tsit-ê kang tsiū ū pò-siúⁿ. Nā m̄-sī tshut-tī kam-guān, mā tio̍h tsip-hîng Siōng-Tsú kau-tài ê jīm-bū. 18 Án-ne guá ê pò-siúⁿ sī sím-mi̍h? Tsiū-sī guá teh thuân hok-im, hō͘ lâng pe̍h-pe̍h tit-tio̍h hok-im. Guá tian-tò bô tit-tio̍h thuân hok-im kai-tit ê kuân-lī. 19 Guá sī tsū-iû ê lâng, bô siū lâng ê sok-pa̍k, m̄-koh uī-tio̍h beh hō͘ khah-tsē lâng lâi sìn Tsú, guá tsiâⁿ-tsò tsìng-lâng ê lô͘-po̍k. 20 Tuì Iû-thài-lâng teh kang-tsok ê sî, guá tsiū tshin-tshiūⁿ Iû-thài-lâng, sī beh tit-tio̍h Iû-thài-lâng lâi sìn Tsú. Guá sui-jiân bô sio̍k lu̍t-huat kuán-hat ê lâng, uī-tio̍h beh hō͘ khah-tsē siū lu̍t-huat kuán-hat ê lâng lâi sìn Tsú, guá tsiū tshin-tshiūⁿ lu̍t-huat kuán-hat ê lâng. 21 Tuì lu̍t-huat-guā ê lâng, guá tsiū tsò lu̍t-huat-guā ê lâng, tsiah thang tit-tio̍h khah-tsē lu̍t-huat-guā ê lâng lâi sìn Tsú, án-ne m̄-sī kóng guá bô tsun-siú Siōng-Tsú ê lu̍t-huat, kî-si̍t guá sī siū Ki-tok lu̍t-huat ê kuán-hat. 22 Tuì sìn-sim nńg-tsiáⁿ ê lâng, guá tsiū tsiâⁿ-tsò nńg-tsiáⁿ, sī beh tit-tio̍h khah-tsē nńg-tsiáⁿ ê lâng lâi sìn Tsú. Tuì ta̍k-khuán lâng, guá tsiū tsiâⁿ-tsò hit-khuán lâng, guá īng ta̍k-tsióng hong-huat thang ke kiù tsi̍t-kuá lâng. 23 Guá án-ne sú-iōng ta̍k-tsióng hong-huat lóng sī uī-tio̍h hok-im, bo̍k-tik sī beh hun-hióng hok-im ê tsiok-hok. 24 Lín it-tīng tsai, tī ūn-tōng-tiûⁿ tsham-ka pí-sài ê lâng lóng lo̍h-khì tsáu, m̄-koh tit-tio̍h pò-siúⁿ ê tsí ū tsi̍t-ê. Lín tio̍h án-ne phah-piàⁿ tsáu tsiah ē-tàng tit-tio̍h siúⁿ. 25 Ta̍k-ê suán-tshiú lóng ū tsia-siū giâm-keh ê hùn-liān, in sī beh tit-tio̍h ē pāi-huāi ê îng-kuan, m̄-koh lán sī beh tit-tio̍h bē pāi-huāi ê îng-kuan. 26 Guá án-ne tsáu m̄-sī bô bo̍k-phiau teh tsáu; guá phah-kûn m̄-sī teh phah khong-khì. 27 Guá giâm-keh tuàn-liān guá ê sing-khu kàu ē-tàng kā i uân-tsuân khòng-tsè, tsiah bián guá tsio lâng lâi tsham-ka pí-sài, ka-kī suah hō͘ lâng tô-thài tiāu.