《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十章

作者 巴克禮普世版小組 2015.03.08

Kíng-kài Pài Ngó͘-siōng
1 Hiaⁿ-tī tsí-muē ah, guá ài lín ē-kì-tit lán ê tsó͘-sian lóng kin-tuè Mô͘-se, tī hûn ê pó-hō͘-hā kuè Âng-hái. 2 In tī hûn-tiong kah hái-ni̍h siū sé-lé kui tī Mô͘-se, 3 In lóng tsia̍h kāng-khuán lîng-sìng ê tsia̍h-mi̍h, lóng lim kāng-khuán lîng-sìng ê tsuâⁿ-tsuí. 4 Tsit-ê tsuâⁿ-tsuí sī tuì kah in tâng-kiâⁿ ê hit-tè tsio̍h-puâⁿ lâu-tshut, hit-ê tsio̍h-puâⁿ tsiū-sī Ki-tok. 5 M̄-koh in tiong-kan tsin-tsē lâng hō͘ Siōng-Tsú bô huaⁿ-hí, lóng siū huí-bia̍t, sin-si tò kah kui khòng-iá. 6 Taⁿ tsiah-ê tāi-tsì hō͘ lán tsò kàm-kài, kíng-kài lán m̄-thang tshin-tshiūⁿ in án-ne ài tsò pháiⁿ tāi-tsì. 7 Lín m̄-thang tshin-tshiūⁿ in tiong-kan tsi̍t-kuá lâng khì pài ngó͘-siōng, tsiàu Sìng-king kì-tsài: Jîn-bîn tsē lo̍h-khì tsiū tuā-lim tuā-tsia̍h, khiā khí-lâi tsiū tian-kông thiàu-bú.( tsù: CAK 32:6) 8 Lán mā m̄-thang tshin-tshiūⁿ in tiong-kan ū tsi̍t-kuá lâng huān kan-îm, suah tsi̍t ji̍t sí nn̄g-bān saⁿ-tshing lâng. 9 Lán mā m̄-thang tshin-tshiūⁿ in tiong-kan tsi̍t-kuá lâng tshì-thàm Tsú, suah hō͘ tsuâ kā-sí. 10 Lín mā m̄-thang tshin-tshiūⁿ in tiong-kan tsi̍t-kuá lâng nga̍uh-nga̍uh liām, suah hō͘ tsip-hîng huí-bia̍t ê thiⁿ-sài kā in tsâu-bia̍t. 11 In tú-tio̍h tsiah-ê tāi-tsì thang tsò lâng ê kàm-kài, suà kì-tsài lo̍h-lâi thang kíng-kài lán tsiah-ê ua̍h tī bua̍t-sè ê lâng. 12 Só͘-í ka-kī siūⁿ-kóng khiā-tsāi ê lâng tio̍h kín-sīn tsiah bē pua̍h-tó. 13 Lín só͘ tú-tio̍h ê tshì-thàm lóng sī lâng siông-siông ē tú-tio̍h-.ê. Siōng-Tsú sī sìn-si̍t, I bē hō͘ lín tú-tio̍h tam-tng bē khí ê tshì-liān. Lín tī siū tshì-liān ê sî, I ē kā lín khui tsi̍t-tiâu lō͘, hō͘ lín jím-siū ē tiâu. 14 Só͘-í, tshin-ài ê hiaⁿ-tī tsí-muē ah, tio̍h siám-phiah pài ngó͘-siōng ê tāi-tsì. 15 Guá kā lín tòng-tsò bat tsîng-lí ê lâng teh kā lín kóng. Guá só͘ kóng ê uē, lín tio̍h ka-kī phuàⁿ-tuàn. 16 Lán teh lim hit-ê tsiok-siā ê pue, kám m̄-sī teh hun-hióng Ki-tok ê hueh? Lán teh tsia̍h hit-ê peh-khui ê piáⁿ, kám m̄-sī teh hun-hióng Ki-tok ê sing-khu? 17 In-uī piáⁿ kan-taⁿ tsi̍t-tè, lán sui-jiân tsin-tsē lâng iáu-koh sī tsi̍t thé, in-uī lán tsò-hué tsia̍h kāng tsi̍t-tè piáⁿ. 18 Īng tsiàu jio̍k-thé ê Í-sik-lia̍t-lâng tsò lē, hiah-ê tsia̍h tsè-mi̍h ê lâng kám m̄-sī kah tsè-tuâⁿ ū kuan-hē? 19 Án-ne guá sī teh kóng sím-mi̍h? Kám sī teh kóng ngó͘-siōng kah tsè-mi̍h ū sím-mi̍h iàu-kín? 20 M̄-sī, guá sī teh kóng Guā-pang-lâng só͘ tsè ê sī tsè kuí, m̄-sī teh tsè Siōng-Tsú, guá bô ài lín kah kuí kau-tshap. 21 Lín bē-tàng lim Tsú ê pue mā lim kuí ê pue; bē-tàng tsham-ka Tsú ê iàn-si̍k koh tsham-ka kuí ê iàn-si̍k. 22 Lán ài beh kik hō͘ Tsú siū-khì sī-bô? Lán kám ē pí Tsú khah kiông? 23 Ū-lâng kóng, "Ta̍k-hāng tāi-tsì lóng thang tsò," m̄-koh m̄-sī ta̍k-hāng lóng ū lī-ik. Sui-jiân kóng Ta̍k-hāng tāi-tsì lóng thang tsò, m̄-koh bô lóng tuì lâng ū pang-tsō͘. 24 M̄-thang kiû ka-kī ê lī-ik, tio̍h kiû pa̍t-lâng ê lī-ik. 25 Tshī-tiûⁿ teh bē ê mi̍h lóng thang tsia̍h, m̄-bián uī-tio̍h liông-sim ê iân-kò͘ mn̄g-tang mn̄g-sai. 26 In-uī Sìng-king ū kóng: Tē kah tē-tsiūⁿ ê bān-bu̍t lóng sī Tsú-.ê.( tsù: SPh 24:1) 27 Nā ū bī-sìn-tsiá tshiáⁿ lín tsia̍h-pn̄g, lín nā khì, pâi tī lín bīn-tsîng ê mi̍h lóng thang tsia̍h. M̄-bián uī-tio̍h liông-sim ê iân-kò͘ lâi mn̄g-tang mn̄g-sai. 28 M̄-koh nā ū-lâng kā lín kóng, "Tsiah-ê tsia̍h-mi̍h ū tsè-kuè ngó͘-siōng." Án-ne uī-tio̍h hit-ê kā lín kóng ê lâng kah liông-sim ê iân-kò͘, lín tsiū m̄-thang tsia̍h. 29 Guá só͘ kóng ê sī tsí hit-ê lâng ê liông-sim, m̄-sī lín ê liông-sim. Lín bô-tiāⁿ-tio̍h ē mn̄g kóng, "Guá ê tsū-iû uī sím-mi̍h tio̍h hō͘ pa̍t-lâng ê liông-sim lâi tsi-phuè?" 30 Guá nā īng kám-un ê sim lâi tsia̍h hit-ê tsè-kuè ngó͘-siōng ê mi̍h, ná-tio̍h hō͘ lâng tsí-tsik? 31 Só͘-í, lín bô-lūn sī tsia̍h sī lim, á-sī tsò sím-mi̍h, lóng ing-kai uī-tio̍h îng-kng Siōng-Tsú lâi tsò. 32 Bô lūn sī tuì Iû-thài-lâng, Hi-lia̍p-lâng, á-sī Siōng-Tsú ê kàu-huē, lín lóng m̄-thang tsiâⁿ-tsò in ê tsó͘-gāi. 33 Lín tio̍h tsiàu guá ê bô͘-iūⁿ khì tsò. Uī-tio̍h hō͘ tsìng-lâng huaⁿ-hí, guá m̄-bat kiû ka-kī ê lī-ik, lóng sī kiû tsìng-lâng ê lī-ik, thang hō͘ in tit-kiù.