《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十一章

作者 巴克禮普世版小組 2015.03.15

Lín tio̍h o̍h guá, tshin-tshiūⁿ guá o̍h Ki-tok.

Tà Thâu-kin ê Kui-tīng
2 Guá tio̍h kā lín o-ló, in-uī lín put-sî ē-kì-tit guá, koh tsun-siú guá thuân hō͘ lín ê kà-sī. 3 M̄-koh guá ài lín bîng-pi̍k, Ki-tok sī só͘-ū tsa-po͘-lâng ê thâu, tsa-po͘-lâng sī tsa-bó͘-lâng ê thâu, Siōng-Tsú sī Ki-tok ê thâu. 4 Tsa-po͘-lâng tī kong-kiōng tiûⁿ-só͘ kî-tó á-sī thuân hok-im ê sî, nā tà thâu-kin tsiū bú-jio̍k i ê thâu Ki-tok. 5 M̄-koh tsa-bó͘-lâng tī kî-tó á-sī thuân hok-im ê sî, bô tà thâu-kin tsiū bú-jio̍k i ka-kī ê thâu, tsiū-sī i ê tiōng-hu, in-uī tsit-khuán ê tsa-bó͘-lâng kah thâu-mn̂g hō͘ lâng thì khí-lâi ê tsa-bó͘-lâng kāng-khuán. 6 Tsa-bó͘-lâng nā bô tà thâu-kin, thâu-mn̂g tio̍h tsián khí-lâi. Kì-jiân kā tsián thâu-mn̂g á-sī thì thâu-mn̂g khuàⁿ-tsò kiàn-siàu, tsiū tio̍h tà thâu-kin khah hó. 7 Tsa-po͘-lâng bô ing-kai tà thâu-kin, in-uī i sī Siōng-Tsú ê hîng-siōng kah îng-kng, m̄-koh tsa-bó͘-lâng sī tsa-po͘-lâng ê îng-kng. 8 In-uī tsa-po͘-lâng m̄-sī tuì tsa-bó͘-lâng tsō tshut-lâi, m̄-koh tsa-bó͘-lâng sī tuì tsa-po͘-lâng tsō tshut-lâi-.ê. 9 Tsa-po͘-lâng m̄-sī uī-tio̍h tsa-bó͘-lâng tsiah tshòng-tsō, tsa-bó͘-lâng sī uī-tio̍h tsa-po͘-lâng lâi tshòng-tsō-.ê. 10 Só͘-í tsa-bó͘-lâng ê thâu tio̍h tà thâu-kin lâi piáu-sī tuì kuân-ui khut-ho̍k ê kì-hō, mā sī uī-tio̍h kìng-uì thiⁿ-sài ê iân-kò͘. 11 M̄-koh tī Tsú ê lāi-bīn, tsa-po͘-lâng su-iàu tsa-bó͘-lâng, tsa-bó͘-lâng mā su-iàu tsa-po͘-lâng. 12 In-uī tsa-bó͘-lâng sī tuì tsa-po͘-lâng tsō tshut-lâi-.ê, tsa-po͘-lâng mā sī tuì tsa-bó͘-lâng seⁿ ê, m̄-koh bān-bu̍t lóng sī tuì Siōng-Tsú tsō tshut-lâi-.ê. 13 Lín tio̍h ka-kī phuàⁿ-tuàn: tsa-bó͘-lâng bô tà thâu-kin lâi tuì Siōng-Tsú kî-tó, kám ū sik-ha̍p? 14 Tsiàu lâng pún-sìng, lâu tn̂g-thâu-mn̂g sī tsa-po͘-lâng ê kiàn-siàu. 15 M̄-koh tsa-bó͘-lâng lāu tn̂g-thâu-mn̂g sī i ê îng-kng, in-uī tn̂g-thâu-mn̂g thang tsò i ê jia-phè. 16 Nā ū-lâng siūⁿ beh piān-pok, guá tsí-ū ē-tàng kóng, tī guán kah Siōng-Tsú ê kàu-huē kan-taⁿ ū tsit-khuán kui-kí.

Tsú ê Buán-tshan
17 Taⁿ guá beh kā lín tsí-sī ē-bīn tsiah-ê uē, m̄-sī kā lín o-ló, in-uī lín ê tsū-huē si̍t-tsāi sī iú-sún bû-ik. 18 Tē-it, guá thiaⁿ-kóng lín tsū-huē ê sî ū kiat-tóng hun-phài. Guá siong-sìn ū tsi̍t-pō͘-hūn sī sū-si̍t. 19 Lín tiong-kan bián-put-liáu ū bô-kāng ê ì-kiàn, án-ne tsiah khuàⁿ ē tshut siáⁿ-lâng ê ì-kiàn khah tsìng-khak. 20 Lín tsū-huē ê sî, pīng m̄-sī teh tsia̍h Tsú ê buán-tshan. 21 In-uī lín ta̍k-lâng kuáⁿ-kín tsia̍h ka-kī tuà-lâi ê mi̍h. Kiat-kó ū-lâng pak-tó͘ iau, ū-lâng tsiú-tsuì. 22 Lín tuà tshù-ni̍h kám bē-tàng lim-tsia̍h? Lín sī teh khuàⁿ-khin Siōng-Tsú ê kàu-huē, mā beh hō͘ bô thang lim-tsia̍h ê lâng kiàn-siàu sī-bô? Guá tio̍h tuì lín án-tsuáⁿ kóng? Tuì tsit-hāng tāi-tsì, guá bô beh kā lín o-ló. 23 Guá tuì Tsú só͘ niá-siū ê, guá mā thuân hō͘ lín, tsiū-sī Tsú Iâ-so͘ hō͘ lâng tshut-bē hit mê ū the̍h piáⁿ, 24 kám-siā Siōng-Tsú liáu-āu kā piáⁿ peh-khui, kóng, "Tsit-ê sī Guá ê sing-khu, uī-tio̍h lín hi-sing ê, lín tio̍h tsiàu án-ne lâi kì-liām Guá. 25 Tsia̍h liáu-āu koh phâng pue, kóng, "Tsit-ê pue sī sin ê iok, īng Guá ê hueh siat-li̍p ê, lín ta̍k-pái lim ê sî, tio̍h tsiàu án-ne lâi kì-liām Guá." 26 Án-ne lín ta̍k-pái tsia̍h tsit-ê piáⁿ, lim tsit-ê pue, sī teh piáu-bîng Tsú ê sí, ti̍t kàu I koh tsài-lîm. 27 Só͘-í nā bô īng kìng-khiân ê sim lâi tsia̍h Tsú ê piáⁿ, lim Tsú ê pue, bô ha̍p-gî ê, sī teh siat-to̍k Tsú ê sing-khu kah hueh. 28 Ta̍k-lâng tio̍h síng-tshat ka-kī, tsiah thang tsia̍h tsit-ê piáⁿ, lim tsit-ê pue. 29 Lâng nā bô tshing-tshó tsia̍h-piáⁿ lim-pue kah Tsú sing-khu ê kuan-hē, tsia̍h tsit-ê piáⁿ lim tsit-ê pue tsiū-sī ka-kī teh jiá-lâi sím-phuàⁿ. 30 In-uī án-ne, lín tsiah ē tsin-tsē lâng sue-lám kah phuà-pēⁿ, mā bē-tsió lâng sí-khì. 31 Lán nā sing síng-tshat ka-kī, tsiū bē tì-kàu siū sím-phuàⁿ. 32 M̄-koh lán siū Tsú sím-phuàⁿ sī teh hō͘ Tsú kā lán kíng-kài, tsiah m̄-bián kah sè-kan-lâng tsò-hué siū tīng-tsuē. 33 Só͘-í, guá ê hiaⁿ-tī tsí-muē ah, lín tsū-tsi̍p beh tsia̍h Tsú ê buán-tshan ê sî, tio̍h hō͘-siōng thìng-hāu. 34 Nā ū-lâng iau, tio̍h tī tshù-ni̍h sing tsia̍h, tsiah bián tsū-huē suah piàn-tsò siū Siōng-Tsú sím-phuàⁿ. Kî-tha ê tāi-tsì tán guá khì lín hia ê sî tsiah lâi kái-kuat.