《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十二章

作者 巴克禮普世版小組 2015.03.22

Sìng-Sîn ê Un-sù
1 Hiaⁿ-tī tsí-muē ah, kuan-hē Sìng-Sîn ê siúⁿ-sù, guá ài lín liáu-kái khah tshing-tshó. 2 Lín tsai lín iáu-buē sìn Tsú ê sî tshut-tsāi lâng ín-iú khì pài bē kóng-uē ê ngó͘-siōng. 3 Só͘-í guá ài lín bîng-pi̍k, siū Siōng-Tsú ê Sìng-Sîn kám-tōng ê lâng bē kóng, "Iâ-so͘ tio̍h siū tsiù-tsó͘." Bô siū Sìng-Sîn kám-tōng ê lâng mā bē kóng, "Iâ-so͘ sī Tsú." 4 Un-sù ū bô kāng, m̄-koh siúⁿ-sù un-sù ê Sìng-Sîn sī kāng tsi̍t-ê. 5 Sū-hōng ū tsin-tsē khuán, m̄-koh sī sū-hōng kāng tsi̍t-ê Tsú. 6 Kang-tsok ū tsin-tsē khuán, m̄-koh hō͘ lâng ū lîng-li̍k khì tsò ta̍k-hāng tāi-tsì ê sī kāng tsi̍t-ê Siōng-Tsú. 7 Sìng-Sîn hián-bîng tī ta̍k-lâng sin-tsiūⁿ sui-jiân tsi̍t-lâng tsi̍t-khuán, m̄-koh bo̍k-tik lóng sī uī-tio̍h beh hō͘ tsìng-lâng tit-tio̍h lī-ik 8 Ū-lâng tuì Sìng-Sîn tit-tio̍h thuân hok-im ê tì-huī ê, ū-lâng tuì kāng tsi̍t-ê Sìng-Sîn tit-tio̍h tì-sik. 9 Koh ū-lâng tuì kāng tsit-ê Sìng-Sîn tit-tio̍h sìn-sim, ū-lâng tuì kāng tsi̍t-ê Sìng-Sîn tit-tio̍h i-pēⁿ ê un-sù. 10 Ū-lâng tit-tio̍h kiâⁿ sîn-jiah ê lîng-li̍k, ū-lâng tit-tio̍h thuân Siōng-Tsú hok-im ê un-sù, ū-lâng tit-tio̍h hun-pia̍t tsin-sîn kah ké-sîn ê un-sù, koh ū-lâng tit-tio̍h kóng kok-tsióng uē-gí ê un-sù, ū-lâng tit-tio̍h huan-i̍k kok-tsióng uē-gí ê un-sù. 11 Tsiah-ê lóng sī kāng tsi̍t-ê Sìng-Sîn teh ūn-tsok, tsiàu I ka-kī ê ì-sù tsiong bô-kāng ê un-sù hō͘ ta̍k-lâng.

Tsi̍t-ê Sing-khu Ū Tsin-tsē Ki-thé
12 Tshin-tshiūⁿ sing-khu sī tsi̍t-ê, m̄-koh ū tsin-tsē ki-thé. Sing-khu ê ki-thé sui-jiân tsin-tsē, m̄-koh sing-khu tsí-ū tsi̍t-ê, Ki-tok mā sī án-ne. 13 Bô-lūn Iû-thài-lâng á-sī Hi-lia̍p-lâng, lô͘-lē á-sī tsū-iû-sin, lóng tuì kāng tsi̍t-ê Sìng-Sîn niá-siū sé-lé lâi tsiâⁿ-tsò tsi̍t-thé, mā kiōng-tông niá-siū kāng tsi̍t-ê Sìng-Sîn. 14 Sing-khu m̄-sī kan-taⁿ tsi̍t-ê ki-thé, ū tsin-tsē ki-thé. 15 Kha nā kóng, "Guá m̄-sī tshiú, só͘-í bô sio̍k sing-khu." Kha bô in-uī án-ne tsiū bô sio̍k sing-khu. 16 Hīⁿ-á nā kóng, "Guá m̄-sī ba̍k-tsiu, só͘-í bô sio̍k sing-khu." Hīⁿ-á bô in-uī án-ne tsiū bô sio̍k sing-khu. 17 Tsuân sing-khu nā lóng sī ba̍k-tsiu, beh īng sím-mi̍h lâi thiaⁿ? Tsuân sing-khu nā lóng sī hīⁿ-á, beh īng sím-mi̍h lâi phīⁿ? 18 Kî-si̍t Siōng-Tsú tsiàu I ê tsí-ì, tsiong ta̍k-ê ki-thé suî-ê an-tì tī sing-khu. 19 Nā pah-thé lóng kāng khuán, ná ē-tàng tsiâⁿ-tsò tsi̍t-ê sing-khu? 20 Sing-khu sui-jiân ū pah-thé, sing-khu khiok-sī kan-taⁿ tsi̍t-ê. 21 Ba̍k-tsiu bē-tàng tuì tshiú kóng, "Guá bô su-iàu lí." Thâu-khak mā bē-tàng tuì kha kóng, "Guá bô su-iàu lín." 22 Kî-si̍t hiah-ê khuàⁿ khí-lâi khah nńg-tsiáⁿ ê ki-thé tian-tò koh-khah ū pit-iàu. 23 Lán khuàⁿ-tsò khah bô kuì-khì ê ki-thé, lán tian-tò tio̍h kā in khah tsiàu-kò͘. Hiah-ê khah pháiⁿ-khuàⁿ ê ki-thé, lán tian-tò tio̍h kā in khah kuan-sim. 24 Hiah-ê khah hó-khuàⁿ ê ki-thé bô su-iàu táⁿ-pān. Siōng-Tsú tsiong sing-khu an-tì hó-sè, hō͘ hiah-ê khah bô tiōng-iàu ê ki-thé koh-khah siū tsun-tiōng. 25 Án-ne tsiah hō͘ sing-khu bē hun-lia̍t, tian-tò hō͘ pah-thé hō͘-siōng tsiàu-kò͘. 26 Tsi̍t-ê ki-thé nā siū-khó͘, pah-thé tsiū tâng siū-khó͘. Tsi̍t-ê ki-thé nā tit-tio̍h îng-kng, pah-thé tsiū tsò-hué huaⁿ-hí. 27 Lín sī Ki-tok ê sing-khu, ta̍k-lâng sī sing-khu ê ki-thé. 28 Siōng-Tsú tī kàu-huē só͘ an-tì ê, tē-it sī sù-tô͘, tē-jī sī sian-ti, tē-saⁿ sī kàu-su, koh ū kiâⁿ sîn-jiah ê, ū i-pēⁿ un-sù ê, pang-tsō͘ lâng ê, tī-lí sū-bū ê, kóng ta̍k-tsióng uē-gí-.ê. 29 Ta̍k-lâng kám lóng sī sù-tô͘? lóng sī sian-ti? lóng sī kàu-su? lóng kiâⁿ sîn-jiah-.ê? 30 Kám lóng ū i-pēⁿ ê un-sù? Kám lóng ē kóng ta̍k-tsióng ê uē-gí? Kám lóng ē huan-i̍k bô-kāng ê uē-gí? 31 Lín tio̍h pik-tshiat him-bō͘ koh-khah tuā ê un-sù. Taⁿ guá kā lín tsí-sī tsi̍t-tiâu siōng-hó ê lō͘.