《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十三章

作者 巴克禮普世版小組 2015.03.29

Thiàⁿ-sim
1 Guá nā-tsún ē-hiáu kóng lâng kok-tsióng ê uē-gí, sīm-tsí thiⁿ-sài ê im-gí, nā bô thiàⁿ-sim, guá kóng-uē to̍h bē-su teh kòng tuā-lô á-sī teh phah lâ-pua̍h. 2 Guá nā-tsún ū thuân hok-im ê un-sù, iū-koh liáu-kái só͘-ū ê ò-biāu kah tì-sik, sīm-tsí ū kian-kiông ê sìn-sim thang î-san tó-hái, nā bô thiàⁿ-sim, guá tsiū lóng bô lō͘-īng. 3 Guá nā tsiong só͘-ū ê tsâi-sán the̍h-lâi tsín-tsè, á-sī hiàn sing-khu hō͘ hué sio, nā bô thiàⁿ-sim, tsiah-ê tāi-tsì tuì guá tsiū lóng bô lī-ik. 4 Thiàⁿ-sim sī gâu khuan-iông koh tsû-pi, ū thiàⁿ-sim tsiū bē uàn-tò͘, bē khua-kháu, bē kiau-ngō͘, 5 bē tsò kiàn-siàu ê tāi-tsì, bē kiû ka-kī ê lī-ik, bē khuài siū-khì, bē khioh-hīn, 6 bē ài put-gī, tsí-ū ài tsin-lí. 7 Thiàⁿ-sim ē pau-iông it-tshè, tuì ta̍k-hāng tāi-tsì lóng ū sìn-sim, lóng phō ǹg-bāng, lóng ē-tàng jím-siū. 8 Thiàⁿ-sim íng-uán tsûn-tsāi, m̄-koh thuân-káng sìn-sit ê un-sù sī tsiām-sî ê, hiah-ê kóng lîng-gí ê tsâi-tiāu ē bô khì, tì-sik mā ē bô khì. 9 In-uī lán ê tì-sik bô uân-tsuân, thuân-káng Siōng-Tsú sìn-sit ê tsâi-tiāu mā bô uân-tsuân. 10 Uân-tsuân ê nā kàu, bô uân-tsuân ê tsiū ē siau-sit khì. 11 Guá tsò gín-á ê sî, kóng-uē tshin-tshiūⁿ gín-á, sìng-tsîng tshin-tshiūⁿ gín-á, ì-kiàn tshin-tshiūⁿ gín-á. Taⁿ guá í-king tuā-lâng ā, tsiū tsiong gín-á ê tāi-tsì lóng pàng-sak. 12 Lán tsit-má sī tuì kiàⁿ teh khuàⁿ bū-bū bô bîng, m̄-koh kàu hit sî tsiū ē tng-thâu tuì-bīn khuàⁿ kah tshing-tshing tshó-tshó. Guá tsit-má ê tì-sik bô uân-tsuân, m̄-koh kàu hit sî tsiū ē uân-tsuân liáu-kái, tshin-tshiūⁿ Siōng-Tsú uân-tsuân liáu-kái guá. 13 Án-ne sìn-sim, ǹg-bāng, thiàⁿ-sim tsit saⁿ-hāng ē íng-uán tsûn-tsāi, kî-tiong siōng tiōng-iàu ê sī thiàⁿ-sim.