《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十四三章

作者 巴克禮普世版小組 2015.04.05

Sìng-Sîn ê Un-sù
1 Tio̍h tui-kiû thiàⁿ-sim, mā tio̍h khat-bō͘ lîng-sìng ê un-sù, iû-kî sī thuân hok-im ê un-sù. 2 Kóng kok-tsióng lîng-gí ê lâng m̄-sī teh tuì lâng kóng, sī teh tuì Siōng-Tsú kóng, in-uī bô-lâng thiaⁿ ū, m̄-koh i ū teh kóng lîng-sìng ê ò-biāu. 3 M̄-koh hiah-ê thuân hok-im ê lâng sī teh tuì lâng kóng, lâi kā lâng tsō-tsiū, khuàn-bián kah an-uì. 4 Kóng lîng-gí ê lâng sī teh tsō-tsiū ka-kī, thuân hok-im ê lâng sī teh tsō-tsiū kàu-huē. 5 Guá tsin ài lín ta̍k-lâng lóng ē kóng kî-biāu ê im-gí, m̄-koh koh-khah ài lín ē thuân hok-im, in-uī kóng lîng-gí nā bô huan-i̍k tsiū bē-tàng tsō-tsiū kàu-huē, án-ne thuân hok-im ê lâng pí kóng lîng-gí khah iàu-kín. 6 Só͘-í hiaⁿ-tī tsí-muē ah, guá khì lín hia, nā kan-taⁿ kóng lîng-gí, bô thuân-káng Siōng-Tsú ê khé-sī á-sī tì-sik, á-sī sìn-sit, á-sī kà-sī, án-ne tuì lín ū sím-mi̍h lī-ik? 7 Hiah-ê bô ua̍h-miā ê ga̍k-khì, tshin-tshiūⁿ tōng-siau á-sī khîm, nā bô huat-tshut kuân-kē ê im, lâng ná-ē tsai sī teh tsàu sím-mi̍h? 8 Sàu-kak ê siaⁿ nā bô tsún-khak ê im, lâng ná-ē tsai thang tsún-pī kau-tsiàn? 9 Tshin-tshiūⁿ án-ne, lín só͘ kóng ê lîng-gí ì-sù nā bô tshing-tshó, lâng ná-ē tsai lín teh kóng sím-mi̍h? Án-ne lín bē-su teh tuì khong-khì kóng-uē. 10 Sè-kan ū tsin-tsē tsióng ê im-gí, ta̍k-ê lóng ū ì-sù. 11 Guá nā m̄-bat hit-tsióng im-gí, kóng ê lâng ē kā guá tòng-tsò sī guā-kok-lâng. Guá mā ē kā i tòng-tsò sī guā-kok-lâng. 12 Án-ne lín kì-jiân jia̍t-sim teh tui-kiû lîng-sìng ê un-sù, tio̍h koh-khah tshut-la̍t tui-kiû ē-tàng tsō-tsiū kàu-huē ê un-sù. 13 Só͘-í kóng lîng-gí ê lâng tio̍h kî-kiû ē-tàng kái-sueh ê lîng-li̍k. 14 Guá nā īng lîng-gí kî-tó, he sī guá ê lîng teh kî-tó, m̄-koh guá ê lí-tì bô huat-sing tsok-iōng. 15 Án-ne guá tio̍h án-tsuáⁿ tsò? Guá beh īng sim-lîng kî-tó, mā beh īng lí-tì kî-tó. Guá beh īng sim-lîng gîm-si, mā beh īng lí-tì gîm-si. 16 Lín nā kan-taⁿ īng sim-lîng kám-siā, hiah-ê huē-tsiòng m̄-tsai lí teh kóng sím-mi̍h, i ná-ē tuì lí ê kám-siā lâi kóng, "Amen"? 17 Lí ê kám-siā sī hó, m̄-koh bô hō͘ lâng tit-tio̍h tsō-tsiū. 18 Guá kám-siā Siōng-Tsú ê sî kóng lîng-gí pí lín tāi-ke khah tsē. 19 M̄-koh tī kàu-huē tiong, guá lîng-khó kóng gō͘-kù hō͘ lâng thiaⁿ ū thang kà-sī lâng ê uē, imā bô ài kóng tsi̍t-bān-kù ê lîng-gí. 20 Hiaⁿ-tī tsí-muē ah, lín siūⁿ tāi-tsì m̄-thang tshin-tshiūⁿ gín-á. Tsò pháiⁿ tāi-tsì tio̍h tshin-tshiūⁿ eⁿ-á, siūⁿ tāi-tsì tio̍h tshin-tshiūⁿ tuā-lâng. 21 Lu̍t-huat ū kì-tsài: Tsú kóng, Guá beh īng kóng guā-kok-uē ê lâng, īng īⁿ-pang-lâng ê tshuì-tûn, tuì Guá ê tsú-bîn kóng-uē, m̄-koh in iû-guân m̄-thiaⁿ.( tsù: ISA 28:11-12) 22 Án-ne kóng lîng-gí ê un-sù m̄-sī beh hō͘ sìn-tô͘, sī beh hō͘ bô sìn ê lâng tsò kì-hō, m̄-koh thuân hok-im ê un-sù m̄-sī beh hō͘ bô sìn ê lâng, sī beh hō͘ sìn-tô͘ tsò kì-hō. 23 Tsuân kàu-huē tsū-huē ê sî nā lóng kóng lîng-gí, bô liáu-kái lîng-gí ê lâng á-sī bô sìn ê lâng ji̍p-lâi, kám bē kóng lín sī teh khí-siáu? 24 Tāi-ke nā lóng teh thuân hok-im, ū bô sìn á-sī bô liáu-kái lîng-gí ê lâng ji̍p-lâi, thiaⁿ-tio̍h hiah-ê uē tsiū ē hiáu-ngō͘ ka-kī ê tsuē, 25 sim-lāi ê pì-bi̍t tsiū ē hián-lō͘ tshut-lâi, ē phak lo̍h-khì kìng-pài Siōng-Tsú, kóng, "Siōng-Tsú tsin-tsiàⁿ tī lín tiong-kan!"

Kàu-huē ê Tia̍t-sū
26 Hiaⁿ-tī tsí-muē ah, án-ne tio̍h án-tsuáⁿ? Lín tsū-huē ê sî, ū-lâng tshiùⁿ sìng-si, ū-lâng kà-sī, ū-lâng suan-káng Siōng-Tsú ê khé-sī, ū-lâng kóng lîng-gí, ū-lâng tsò huan-i̍k. Ta̍k-hāng tāi-tsì lóng tio̍h uī-tio̍h tsō-tsiū kàu-huē lâi tsò. 27 Nā ū-lâng beh kóng lîng-gí, tio̍h hān-tiāⁿ nn̄g-ê, siōng-tsē saⁿ-ê, mā tio̍h tsiàu tshù-sū lûn-liû kóng, koh tio̍h ū-lâng lâi huan-i̍k. 28 Nā bô-lâng thang huan-i̍k, in tio̍h tiām-tiām, kan-taⁿ tuì ka-kī kah tuì Siōng-Tsú kóng to̍h hó. 29 Tio̍h hō͘ nn̄g-ê á-sī saⁿ-ê lâi thuân-káng Siōng-Tsú ê sìn-sit, kî-tha ê lâng tio̍h síng-tshat hiah-ê sìn-sit. 30 Nā tsāi-tsō ū-lâng tit-tio̍h Siōng-Tsú ê khé-sī, hit-ê teh kóng ê lâng tio̍h thîng-tsí kóng-uē. 31 In-uī lín ta̍k-lâng lóng thang lûn-liû thuân-káng Siōng-Tsú ê sìn-sit, thang saⁿ-kap ha̍k-si̍p, hō͘-siōng bián-lē. 32 Suan-káng Siōng-Tsú sìn-sit ê lâng tio̍h ài ē-hiáu iok-sok ka-kī ê un-sù, 33 in-uī Siōng-Tsú m̄-sī bô tia̍t-sū ê Siōng-Tsú, sī ài lán hô-hâi ê Siōng-Tsú. Kah só͘-ū Siōng-Tsú tsú-bîn ê kàu-huē kāng-khuán, 34 tsa-bó͘-lâng tī kàu-huē tiong tio̍h tiām-tiām, m̄-thang huat-giân. Iû-thài-lâng ê lu̍t-huat mā kui-tīng in tio̍h sūn-ho̍k. 35 In nā ài beh ha̍k-si̍p sím-mi̍h, tio̍h tī ke-lāi mn̄g ka-kī ê tiōng-hu, in-uī tsa-bó͘-lâng tī kàu-huē tiong kóng-uē tsin bô sik-ha̍p. 36 Siōng-Tsú ê tō-lí kám sī tuì lín lâi-.ê? á-sī kan-taⁿ thuân hō͘ lín? 37 Nā ū-lâng siūⁿ-kóng ka-kī sī thuân-káng Siōng-Tsú sìn-sit ê lâng, á-sī lîng-sìng ê lâng, ing-kai tio̍h tsai guá teh siá hō͘ lín ê sī Tsú ê bīng-līng. 38 Nā ū-lâng bô kā tsit-ê tāi-tsì khuàⁿ-tsò iàu-kín, lín mā m̄-bián kā tsit-ê lâng khuàⁿ-tsò iàu-kín. 39 Só͘-í guá ê hiaⁿ-tī tsí-muē ah, tio̍h pik-tshiat tui-kiû thuân-káng Siōng-Tsú sìn-sit ê un-sù, mā m̄-thang kìm-tsí lâng kóng lîng-gí. 40 Ta̍k-hāng tāi-tsì tio̍h tsiàu tia̍t-sū kui-kui kí-kí lâi tsò.