《巴克禮普世版聖經（試讀本）》

 | | | 轉寄

巴克禮普世版（試讀本） 哥林多前書第十五章

作者 巴克禮普世版小組 2015.04.12

Ki-tok ê Koh-ua̍h
1 Hiaⁿ-tī tsí-muē ah, guá beh kā lín thê-tshéⁿ, guá tsîng thuân hō͘ lín ê hok-im, lín ū niá-siū, mā ū uá-khò tse lâi tsò sìn-gióng ê ki-tshó͘. 2 Lín nā kian-siú guá thuân hō͘ lín hok-im ê tō-lí, lín ê sìn-gióng koh m̄-sī khang-khang, só͘-í ē khò tsit-ê hok-im lâi tit-kiù. 3 Guá í-king kā guá só͘ niá-siū siōng tiōng-iàu ê sìn-sit thuân hō͘ lín, tsiū-sī tsiàu Sìng-king só͘ kì-tsài: Ki-tok uī-tio̍h lán ê tsuē sí, 4 bâi-tsòng, koh tsiàu Sìng-king só͘ kì-tsài, tē-saⁿ ji̍t koh-ua̍h, 5 I ū tuì Pí-tik hián-hiān, koh tuì tsa̍p-jī-ê sù-tô͘ hián-hiān. 6 Āu-lâi koh tsi̍t pái tuì gō͘-pah-guā-ê hiaⁿ-tī tsí-muē hián-hiān. Hiah-ê lâng ū-ê í-king sí-khì, m̄-koh tuā-pō͘-hūn ê lâng iáu ua̍h-teh. 7 Āu-lâi tuì Ngá-kok hián-hiān, iū-koh tsi̍t pái tuì só͘-ū ê sù-tô͘ hián-hiān. 8 Tsuè-āu mā tuì guá tsit-ê kah-ná iáu-buē kàu-gue̍h ê lâng hián-hiān. 9 Guá sī sù-tô͘ tiong-kan siōng bî-sè ê, bē-kham-tit kiò-tsò sù-tô͘, in-uī guá bat pik-hāi Siōng-Tsú ê kàu-huē. 10 M̄-koh ū Siōng-Tsú ê un-tián tsiah ū kin-á-ji̍t ê guá, I siúⁿ-sù hō͘ guá ê un-tián pīng bô óng-huì. Guá tian-tò pí kî-tha ê sù-tô͘ koh-khah phah-piàⁿ. Tse kî-si̍t m̄-sī guá ê pún-líng, sī ū Siōng-Tsú ê un-tián kah guá tông-tsāi. 11 Bô-lūn sī guá á-sī kî-tha ê sù-tô͘, guán án-ne teh thuân, lín mā án-ne teh sìn.

Sìn-tô͘ ê Koh-ua̍h
12 Guán thuân ê sìn-sit sī Ki-tok tuì sí-lâng tiong koh-ua̍h, lín tiong-kan ná-ē ū-lâng kóng sí-lâng bô koh-ua̍h ê tāi-tsì? 13 Nā bô sí-lâng koh-ua̍h, án-ne Ki-tok tsiū bô koh-ua̍h. 14 Ki-tok nā bô koh-ua̍h, guán só͘ thuân ê sī khang-hi bô si̍t, lín ê sìn mā sī khang-khang. 15 Nā-sī án-ne, guán tsiū-sī teh uī Siōng-Tsú tsò ké-kiàn-tsìng, in-uī guán kiàn-tsìng Siōng-Tsú í-king hō͘ Ki-tok koh-ua̍h. Tsin-tsiàⁿ nā bô sí-lâng koh-ua̍h ê tāi-tsì, Siōng-Tsú tsiū bô hō͘ Ki-tok koh-ua̍h. 16 Sí-lâng nā bô koh-ua̍h, Ki-tok tsiū bô koh-ua̍h. 17 Ki-tok nā bô koh-ua̍h, lín ê sìn-gióng tsiū bô lō͘-īng, lín tsiū iáu-koh tī tsuē-ok tiong. 18 Án-ne hiah-ê í-king sí-khì ê Ki-tok-tô͘ mā lóng sǹg-sī bia̍t-bông. 19 Lán tsò Ki-tok-tô͘ ê ǹg-bāng nā kan-taⁿ tī hiān-sè, lán tsiū-sī sè-kan-lâng tiong-kan siōng khó-liân-.ê. 20 M̄-koh taⁿ Siōng-Tsú í-king hō͘ Ki-tok tuì sí-lâng tiong koh-ua̍h. Tse sī beh tsò í-king sí-khì ê lâng koh-ua̍h ê pó-tsìng. 21 In-uī sí-lâng koh-ua̍h thong-kuè tsi̍t-ê lâng, sí-lâng ê koh-ua̍h mā thong-kuè tsi̍t-ê lâng. 22 Tú tshin-tshiūⁿ jîn-luī uī-tio̍h A-tong ê huān-tsuē lóng tio̍h sí, mā in-uī Ki-tok lóng ē koh-ua̍h. 23 M̄-koh ta̍k-lâng lóng tio̍h tsiàu ka-kī ê sūn-sī koh-ua̍h: thâu-tsi̍t-ê sī Ki-tok, suà lo̍h-lâi sī Ki-tok tsài-lîm ê sî kui-sio̍k I ê lâng. 24 Jiân-āu bua̍t-ji̍t tsiah kàu, hit sî Ki-tok ē siau-bia̍t tsuân-pō͘ ê tsip-tsìng-tsiá, tsiáng-kuân-tsiá kah kuân-lîng-tsiá, tsiong thóng-tī-kuân kau hō͘ Thiⁿ-Pē Siōng-Tsú. 25 In-uī Ki-tok it-tīng tio̍h thóng-tī, ti̍t-kàu Siōng-Tsú só͘-ū ê tuì-ti̍k khut-ho̍k tī I ê kha-ē.( tsù: SPh 110:1) 26 Tsuè-āu tio̍h huí-bia̍t ê tuì-ti̍k tsiū-sī Sí-bông. 27 In-uī Sìng-king kóng, "I hō͘ bān-bu̍t lóng khut-ho̍k tī I ê kha-ē. Tsin bîng-hián, tsia só͘ kóng ê "bān-bu̍t" pīng bô pau-hâm hō͘ bān-bu̍t khut-ho̍k tī Ki-tok kha-ē ê Siōng-Tsú. 28 M̄-koh kàu bān-bu̍t khut-ho̍k Ki-tok ê sî, Kiáⁿ mā ē khut-ho̍k tī hō͘ bān-bu̍t lóng khut-ho̍k Siōng-Tsú, thang hō͘ Siōng-Tsú uân-tsuân kuán-hat bān-bu̍t. 29 Nā m̄-sī án-ne, lâng kā sí-lâng sé-lé beh tshòng-siáⁿ? Nā bô sí-lâng koh-ua̍h ê tāi-tsì, lâng ná-tio̍h kā sí-lâng sé-lé? 30 Koh-tsài kóng, guán ná-tio̍h sî-sî khik-khik lâi mō͘-hiám? 31 Hiaⁿ-tī tsí-muē ah, guá ta̍k-ji̍t teh piàⁿ-miā, in-uī lán pêⁿ-pêⁿ sī kah Tsú Ki-tok Iâ-so͘ kiat-liân, guá uī-tio̍h lín kám-kak tsin îng-kng, só͘-í guá káⁿ án-ne kóng. 32 Guá tī Í-hut-só͘ kah hiah-ê ná tshin-tshiūⁿ iá-siù ê lâng tàu-tsing, nā tshut-tī lâng ê tōng-ki, tuì guá ū sím-mi̍h lī-ik? Sí-lâng nā bô koh-ua̍h, tshin-tshiūⁿ lâng teh kóng, "Lán bîn-á-tsài to̍h beh sí à, tsò lán lim! tsò lán tsia̍h!"( tsù: ISA 22:13) 33 M̄-thang hō͘ lâng bê-hi̍k khì. Lām-sám kau-puê pîng-iú ē pāi-huāi phín-tik. 34 Tio̍h kak-tshéⁿ, siūⁿ hō͘ tshing-tshó, m̄-thang koh huān-tsuē, in-uī iáu ū-lâng m̄-bat Siōng-Tsú. Guá án-ne kóng sī beh hō͘ lín tsai thang kiàn-siàu.

Jio̍k-thé ê Koh-ua̍h
35 Kiám-tshái ū-lâng ē mn̄g, "Sí-lâng án-tsuáⁿ koh-ua̍h? In ē ū sím-mi̍h khuán ê sin-thé?" 36 Gōng lâng ah, lín iā lo̍h-khì ê tsíng-tsí nā bô sí-khì, kám ē ua̍h khí-lâi? 37 Koh-tsài kóng, lín só͘ iā ê, bô-lūn sī be̍h-á á-sī pa̍t-tsióng ê ngó͘-kok, put-kò sī tsi̍t lia̍p tsíng-tsí, m̄-sī āu-lâi sîng-tióng ê hîng-thé. 38 Siōng-Tsú tsiàu I ê tsí-ì hō͘ tsíng-tsí ū hîng-thé, ta̍k-khuán tsíng-tsí ū i ka-kī ê hîng-thé. 39 Ta̍k-khuán ê jio̍k-thé mā lóng bô kāng-khuán. Jîn-luī ê jio̍k-thé tsi̍t khuán, siù-luī ê jio̍k-thé tsi̍t khuán, tsiáu-luī ê jio̍k-thé tsi̍t khuán, hî-luī ê jio̍k-thé koh tsi̍t khuán. 40 Ū thiⁿ-tíng ê thé, mā ū tē-tsiūⁿ ê thé, m̄-koh thian-thé ê kng kah tē-tsiūⁿ ê thé ê kng bô kāng-khuán. 41 Ji̍t-thâu ū ji̍t-thâu ê kng, gue̍h ū gue̍h ê kng, tsheⁿ ū tsheⁿ ê kng, sīm-tsì muí-lia̍p tsheⁿ ê kng to lóng bô kāng-khuán. 42 Sí-lâng koh-ua̍h mā sī án-ne. Bâi-tsòng lo̍h-thô͘ ê jio̍k-thé ē hiú-nuā, koh-ua̍h liáu-āu tsiū tsiâⁿ-tsò bē hiú-nuā. 43 Tâi lo̍h-khì ê sī pi-tsiān ê, koh-ua̍h ê sī îng-kng ê; tâi lo̍h-khì ê sī nńg-tsiáⁿ ê, koh-ua̍h ê sī ióng-tsòng-.ê. 44 Tâi lo̍h-khì ê sī hiat-khì ê jio̍k-thé, koh-ua̍h ê sī lîng-sìng ê thé. Kì-jiân ū hiat-khì ê jio̍k-thé, mā ū lîng-sìng ê thé. 45 Só͘-í Sìng-king kì-tsài: Thâu-tsi̍t-ê lâng A-tong tsiâⁿ-tsò ū hiat-khì ê lâng.( tsù: CAK 2:7) M̄-koh A-tong lō͘-bué tsiâⁿ-tsò siúⁿ-sù ua̍h-miā ê sîn. 46 Tāi-sing ū ê m̄-sī lîng-sìng ê thé, sī hiat-khì ê jio̍k-thé. Jiân-āu tsiah ū lîng-sìng ê thé. 47 Thâu-tsi̍t-ê lâng sī tuì tē-tsiūⁿ tshut, sī thô͘ tsō ê; tē-jī ê lâng sī tuì thiⁿ-tíng lâi-.ê. 48 Só͘-ū tē-tsiūⁿ ê lâng lóng kah hit-ê thâu-tsi̍t-ê īng thô͘ tsō ê lâng kāng-khuán; só͘-ū sio̍k-thiⁿ ê lâng mā kah lō͘-bué lâi Hit-uī sio̍k-thiⁿ ê kāng-khuán. 49 Tú tshin-tshiūⁿ lán ū hit-ê thâu-tsi̍t-ê īng thô͘ tsō ê lâng ê hîng-siōng, mā ē ū lō͘-bué lâi Hit-uī sio̍k-thiⁿ ê ê hîng-siōng. 50 Hiaⁿ-tī tsí-muē ah, guá kā lín kóng, hiat-khì ê jio̍k-thé bē-tàng sîng-siū Siōng-Tsú ê Kok-tō͘. Tsiū-sī kóng, ē hiú-nuā ê bē-tàng sîng-siū bē hiú-nuā-.ê. 51 Taⁿ guá kā lín kóng tsi̍t-ê ò-biāu ê tāi-tsì: lán m̄-sī lóng ē sí. 52 Bua̍t-ji̍t ê sàu-kak tsi̍t-ē tân, tsi̍t sî-á kú, ba̍k nih tsi̍t-ē, lán lóng ē kái-piàn. Tsuè-āu ê sàu-kak tân ê sî, sí-lâng tsiū ē koh-ua̍h, piàn-tsò bē hiú-nuā ê, lán lóng ē kái-piàn. 53 In-uī tsit-ê ē hiú-nuā ê tik-khak tio̍h piàn-tsò bē hiú-nuā ê, tsit-ê ē-sí ê piàn-tsò bē-sí-.ê. 54 Tng tsit-ê ē hiú-nuā ê piàn-tsò bē hiú-nuā ê, ē-sí ê piàn-tsò bē-sí ê sî, Sìng-king só͘ kì-tsài ê "Sí-bông ē hō͘ tik-sìng thun-tsia̍h lo̍h-khì."( tsù: ISA 25:8) tsit-kù tsiū ē ìng-giām. 55 Sí-bông ah, lí ê sìng-lī tī tó-uī? Sí-bông ah, lí ê to̍k-tshì tī tó-uī?( tsù: HSA 13:14) 56 Sí-bông ê to̍k-tshì sī tsuē, tsuē ê kuân-sè sī lu̍t-huat. 57 Kám-siā Siōng-Tsú thong-kuè lán ê Tsú Iâ-so͘ Ki-tok hō͘ lán tik-sìng. 58 Só͘-í, tshin-ài ê hiaⁿ-tī tsí-muē ah, lín tio̍h khiā hō͘ tsāi, m̄-thang iô-tāng, tio̍h siông-siông tsīn-la̍t uī Tsú tsò-kang, in-uī lín tsai uī Tsú sin-khó͘ tsò-kang it-tīng bē liáu-jiân.