《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第十四章

作者 巴克禮普世版小組 2011.07.03

1, Hit tong-sî, hun-hong ê jîn-kun Hi-lu̍t thiaⁿ-tio̍h Iâ-so͘ ê miâ-siaⁿ;
2, tsiū kā i ê tshe-īng kóng, Tsit-ê tsiū-sī si-sé-tsiá Iok-hān, i sī tuì sí-lâng tiong koh-ua̍h; só͘-í ū tsiah-ê kuân-lîng tuì i hián-tshut.
3, In-uī tsîng Hi-lu̍t uī-tio̍h i ê hiaⁿ-tī Hui-li̍k ê bó͘ Hi-lô-tí ê iân-kò͘, ū lia̍h Iok-hān pa̍k i, kuaiⁿ lo̍h kaⁿ.
4, In-uī Iok-hān bat kā i kóng, Lí tsiap-la̍p tsit-ê hū-jîn-lâng sī put-huat.
5, Hi-lu̍t ài thâi i, tsí-ū kiaⁿ jîn-bîn; in-uī in lia̍h Iok-hān tsò sian-ti.
6, Tú-tio̍h Hi-lu̍t tsò siⁿ-ji̍t, Hi-lô-tí ê tsa-bó͘-kiáⁿ thiàu-bú tī in tiong-kan, lâi hō͘ Hi-lu̍t huaⁿ-hí.
7, Tuì án-ne tsiù-tsuā, ún bueh tsiàu i só͘ ài kiû ê lóng hō͘ i.
8, I hō͘ in lāu-bú sái-sō, tsiū kóng, Tsiong kiâⁿ sé-lé Iok-hān ê thâu-khak té tī puâⁿ-ni̍h, tsiū tsia hō͘ guá.
9, Ông tsin iu-būn; tān-sī uī-tio̍h só͘ tsiù ê tsuā, koh ū tâng toh ê lâng tī-teh, tsiū bīng-līng hō͘ i;
10, tshe lâng khì kaⁿ-ni̍h thâi Iok-hān.
11, Tsiong i ê thâu-khak té tī puâⁿ-ni̍h, lâi hō͘ tsa-bó͘ gín-ná; i tsiū phâng-khì hō͘ i ê lāu-bú.
12, I ê bûn-tô͘ lâi siu i ê sin-si, khì bâi-tsòng; tsiū khì kā Iâ-so͘ kóng.
13, Iâ-so͘ thiaⁿ-tio̍h tsiū tsiūⁿ tsûn, tuì hia thè-khì khòng-iá, ka-kī tuà; tsìng lâng thiaⁿ-tio̍h, tsiū tuì tsiah-ê siâⁿ pō͘-kiâⁿ tè I.
14, I tshut-khì, khuàⁿ-tio̍h kui tuā tīn ê lâng, tsiū lîn-bín in, i-hó in tiong-kan ū pēⁿ ê.
15, Ji̍t mńg-po͘, bûn-tô͘ tsiū- kūn I kóng, Tsia sī khòng-iá, koh sî í-king kè; tio̍h hō͘ tsìng lâng sì-suàⁿ, thang khì hiuⁿ-siā bué tsia̍h.
16, Iâ-so͘ kā in kóng, In m̄ bián khì, lín hō͘ in tsia̍h.
17, In kā I kóng, Guán tī tsia tsí ū gō͘ ê piáⁿ, nn̄g bé hî.
18, I kóng, The̍h lâi hō͘ guá.
19, Tsiū huan-hù tsìng lâng tsē tī tsháu-po͘, tsiū the̍h hit gō͘ ê piáⁿ, nn̄g bé hî, ǹg thiⁿ lâi tsiok-siā, peh piáⁿ hō͘ bûn-tô͘, bûn-tô͘ hō͘ tsìng lâng.
20, Lóng tsia̍h kàu pá; khioh só͘ tshun ê sut-á, muá tsa̍p-jī khing.
21, Tsia̍h ê lâng, hū-jîn-lâng gín-ná í-guā, iok-lio̍k gō͘ tshing.
22, I suî-sî pik bûn-tô͘ tsiūⁿ tsûn, tāi-sing kè-khì hit pîng, thìng-hāu I sì-suàⁿ tsìng lâng.
23, Sì-suàⁿ tsìng lâng liáu-āu, tsiū ka-kī tsiūⁿ suaⁿ kî-tó; í-king àm, tsí ū I ka-kī tī hia.
24, Hit sî tsûn tī hái-tiong, hō͘ íng iô-tsuah; in-uī sī tuì-thâu hong.
25, Mî-sî sì kiⁿ, Iâ-so͘ tuì hái-bīn kiâⁿ, tsiū-kūn in.
26, Bûn-tô͘ khuàⁿ-tio̍h I kiâⁿ tī hái-bīn, tsiū tshiⁿ-kiaⁿ, kóng, Sī kuài mi̍h; in-uī kiaⁿ tsiū âu-kiò.
27, Iâ-so͘ liâm-piⁿ kap in kóng uē, kóng, An lín ê sim; sī guá; m̄ bián kiaⁿ.
28, Pí-tik ìn I kóng, Tsú ah, kó-jiân sī lí, tsiū bīng-līng guá kiâⁿ tsuí-bīn tsiū-kūn lí.
29, I kóng, Lâi. Pí-tik tsiū tuì tsûn-ni̍h lo̍h-khì, kiâⁿ tsuí-bīn, bueh tsiū-kūn Iâ-so͘.
30, Tān-sī khuàⁿ-tio̍h hong, tsiū kiaⁿ; teh-bueh tîm-lo̍h-khì, tsiū âu-kiò kóng, Tsú ah, kiù guá.
31, Iâ-so͘ suî-sî tshun tshiú khan i, kóng, Sió-sìn ê lâng, siáⁿ-sū giâu-gî?
32, In tsiūⁿ tsûn, hong tsiū tiāⁿ.
33, Tsûn-ni̍h ê lâng pài I kóng, Lí tsin-tsiàⁿ sī Siōng-tsú ê Kiáⁿ.
34, Í-king kè-khì, tsiū kàu Kik-nî-sat-li̍k tē.
35, Hit uī ê lâng bat I, tshe lâng khì sì-hng, tshuā it-tshè ū pēⁿ ê lâi tsiū-kūn I;
36, kiû I nā sái hō͘ in bong I ê saⁿ-á-ku ê tshiu; kìⁿ-nā bong ê lâng tsiâu-tsn̂g hó.