《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第七章

作者 巴克禮普世版小組 2015.06.07

1 Tshin-ài ê hiaⁿ-tī tsí-muē ah, lán kì-jiân tit-tio̍h tsiah-ê ìng-ín, tio̍h tshing-khì ka-kī, tû-khì it-tshè jio̍k-thé kah sim-lîng ê lah-sap, kìng-uì Siōng-Tsú lâi hō͘ sing-ua̍h uân-tsuân sìng-huà.

Pó-lô ê Huaⁿ-hí
2 Tio̍h khui-khuah lín ê sim-hing lâi tsiap-la̍p guán. Guán m̄-bat khik-khui lâng, m̄-bat hāi lâng tuī-lo̍h, m̄-bat phiⁿ lâng. 3 Guá kóng án-ne m̄-sī beh kā lín tsik-pī, in-uī guá bat kóng guán tsin thiàⁿ lín, guān-ì kah lín tâng-sí tâng-ua̍h. 4 Guá tsin sìn-jīm lín, put-sî īng lín tsò khua-kháu. Tī guán it-tshè ê huān-lān tiong, guá muá-sim huaⁿ-hí koh tshiong-muá an-uì. 5 Guán lâi-kàu Má-kî-tùn í-āu, sing-khu m̄-nā lóng bô thang hioh-khùn, huán-tńg ta̍k-hāng tāi-tsì tú-tio̍h khùn-lân, guā-bīn ū hun-tsing, lāi-bīn ū kiaⁿ-hiâⁿ. 6 M̄-koh Hit-uī an-uì sit-tsì ê lâng ê Siōng-Tsú tshe Thê-to lâi kā guán an-uì. 7 M̄-nā i ū lâi, mā ū kóng-khí lín án-tsuáⁿ kā i kó͘-lē ê tāi-tsì, í-ki̍p lín án-tsuáⁿ khat-bō͘ kìⁿ guá, lín án-tsuáⁿ ai-siong, lín án-tsuáⁿ jia̍t-sim uī guá piān-hō͘, hō͘ guá koh-khah huaⁿ-hí. 8 Guá tsîng hit-tiuⁿ phue sui-jiân ū hō͘ lín kan-khó͘-sim, guá pīng-bô hiō-hué. Taⁿ guá ū sió-khuá hiō-hué, in-uī guá tsai-iáⁿ hit-tiuⁿ phue ū hō͘ lín tsi̍t-sî ê kan-khó͘-sim. 9 Taⁿ guá tsin huaⁿ-hí, m̄-sī in-uī lín kan-khó͘-sim, sī in-uī lín ê kan-khó͘-sim ū hō͘ lín hué-kái. Siōng-Tsú ū siān-iōng lín ê kan-khó͘-sim, só͘-í guán bô hō͘ lín siū-tio̍h siong-hāi. 10 In-uī Siōng-Tsú siān-iōng lín ê kan-khó͘-sim lâi hō͘ lín hué-kái thang tit-kiù, guá bô sím-mi̍h thang hiō-hué, m̄-koh sio̍k sè-kan ê kan-khó͘-sim ē hō͘ lâng tì-kàu sí-bông. 11 Lín khuàⁿ, Siōng-Tsú hiah-ni̍h gâu siān-iōng lín ê kan-khó͘-sim, tsiah hō͘ lín hiah-ni̍h jia̍t-sim lâi piān-kái lín ka-kī ê tshing-pi̍k, hiah-ni̍h hùn-khài, hiah-ni̍h kíng-síng, hiah-ni̍h khat-bō͘, hiah-ni̍h jia̍t-tsîng, hiah-ni̍h ki̍k-lia̍t khián-tsik put-hua̍t. Lín tī tsiah-ê tāi-tsì tíng-bīn í-king tsìng-bîng lín ka-kī sī tshing-khì. 12 Só͘-í guá sui-jiân ū siá hit-tiuⁿ phue hō͘ lín, m̄-koh m̄-sī uī-tio̍h kā lâng khik-khui á-sī hō͘ lâng khik-khui ê lâng siá ê, sī beh hō͘ lín tī Siōng-Tsú ê bīn-tsîng bîng-pi̍k guán tuì lín ê jia̍t-sîng ū juā tshim. 13 Guán ū in-uī án-ne tit-tio̍h an-uì. Guán m̄-nā tit-tio̍h an-uì, mā in-uī khuàⁿ-tio̍h Thê-to ê huaⁿ-hí hō͘ guán koh-khah tshiong-muá huaⁿ-hí, in-uī i ê sim ū tuì lín tāi-ke lâi tit-tio̍h huaⁿ-hí. 14 Guá bat tuì i khua-kháu lín ê tāi-tsì, lín si̍t-tsāi bô hō͘ guá làu-khuì. Guá ta̍k-hāng tāi-tsì lóng tuì lín kóng si̍t-tsāi-uē, guá tuì Thê-to khua-kháu lín ê uē mā sī tsin-si̍t. 15 Só͘-í i nā siūⁿ-khí lín lóng án-tsuáⁿ sūn-ho̍k i, koh kiong-kiong kìng-kìng kā i tsiap-thāi, i tuì lín ê thiàⁿ-sim tsiū ná tshim. 16 Taⁿ guá hui-siông huaⁿ-hí, in-uī guá ē-tàng uân-tsuân sìn-jīm lín!