《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第八章

作者 巴克禮普世版小組 2015.06.14

Ki-tok-tô͘ ê Hōng-hiàn
1 Hiaⁿ-tī tsí-muē ah, guá ài lín tsai Siōng-Tsú sù hō͘ Má-kî-tùn kok kàu-huē ê un-huī. 2 In tuì huān-lān king-li̍k tsin-tsē khó-giām iáu-koh muá-sim huaⁿ-hí. In sui-jiân tsin sàn-tshiah, iáu-koh hui-siông khong-khài hōng-hiàn. 3 Guá ē-tàng kā lín tsìng-bîng, in kam-guān tsīn-la̍t hōng-hiàn, sīm-tsì tshiau-kuè in ê li̍k-liōng. 4 In jia̍t-sim khún-kiû guán tio̍h hō͘ in ū ki-huē tsham-ú kiù-tsè Iû-thài sìn-tô͘ ê kang-tsok. 5 In án-ne tsò m̄-nā tshiau-kuè guán ê kî-thāi, sīm-tsì sūn-ho̍k Siōng-Tsú ê tsí-ì tāi-sing tsiong ka-kī hiàn hō͘ Tsú, jiân-āu koh hiàn hō͘ guán. 6 Só͘-í guán khǹg Thê-to kè-sio̍k hia̍p-tsō͘ lín lâi uân-sîng i thê-tshiòng ê tsû-siān kang-tsok. 7 Lín ê sìn-sim, kháu-tsâi, tì-sik, pang-tsō͘ lâng ê jia̍t-sim, í-ki̍p lín tuì guán ê thiàⁿ-sim lóng hiah-ni̍h hong-hù. Guán ài lín tuì tsit-ê tsû-siān kang-tsok mā tio̍h hiah-ni̍h khong-khài. 8 Guá án-ne kóng m̄-sī teh bīng-līng lín, sī ài lín tsai pa̍t-lâng jia̍t-sim teh pang-tsō͘ lâng lâi khó-giām lín ê thiàⁿ-sim sī-m̄-sī si̍t-tsāi. 9 Lín tsai lán ê Tsú Iâ-so͘ Ki-tok ê un-tián. I sui-jiân pún-lâi tsin hù-jū, m̄-koh uī-tio̍h lín tsiâⁿ-tsò sàn-tshiah, sī beh hō͘ lín tuì I ê sàn-tshiah lâi tsiâⁿ-tsò hù-jū. 10 Kuan-hē tsit-hāng tāi-tsì, guá kiàn-gī lín tio̍h khì uân-sîng kū-nî khai-sí ê bō͘-khuán, lín m̄-nā tāi-sing hîng-tōng, mā sī tāi-sing kam-guān án-ne tsò. 11 Taⁿ lín tio̍h uân-sîng tsit-ê kang-tsok, īng khí-thâu ê jia̍t-sim, tsīn-la̍t lâi kā i uân-sîng. 12 Lín nā ū hōng-hiàn ê jia̍t-sim, Siōng-Tsú ē huaⁿ-hí tsiap-la̍p lín só͘ ū-ê, bē iau-kiû lín só͘ bô-ê. 13 Guá m̄-sī ài lín khiām-tn̂g neh-tō͘ lâi hō͘ pa̍t-lâng khah liōng-siōng, sī ài lín ū ki-huē hō͘-siōng pang-tsō͘. 14 Kì-jiân lín tsit-má hù-jū, tio̍h tsín-tsè sàn-tshiah-lâng, án-ne lín sàn-tshiah in hù-jū ê sî, mā thang kā lín tsín-tsè, án-nesiang-hong lóng ū ki-huē hō͘-siōng pang-tsō͘. 15 Tú tsiàu Sìng-king só͘ kì-tsài: khioh tsē ê bô tshun, khioh tsió ê bô khiàm.( tsù CAK 16:18)

Thê-to kah I ê Tâng-kang
16 Kám-siā Siōng-Tsú hō͘ Thê-to ê sim tshin-tshiūⁿ guán hiah-ni̍h jia̍t-sim pang-tsō͘ lín. 17 I m̄-nā huaⁿ-hí tsiap-siū guán ê khún-kiû, koh jia̍t-sim tsū-guān pang-tsō͘ lín, kuat-tīng beh khì lín hia. 18 Guán līng-guā tshe-phài tsi̍t-ê hiaⁿ-tī kah i tsò-hué khì. Tsit-ê hiaⁿ-tī tī thuân hok-im ê kang-tsok-siōng ū siū kok kàu-huē ê o-ló. 19 M̄-nā án-ne, i siū tsìng kàu-huē suán-phài lâi tsò guán lí-hîng ê tâng-phuāⁿ, tsham-ú guán tsit-hāng tsû-siān kang-tsok. Tsit-ê kang-tsok sī beh kui îng-kng hō͘ Tsú, mā piáu-sī guán huaⁿ-hí kam-guān án-ne tsò. 20 Guán tsin kín-sīn lâi tshú-lí lâng khong-khài hōng-hiàn ê tsîⁿ-hāng, tsiah bián ín-khí lâng ê phue-phîng. 21 In-uī guán kong-bîng tsìng-tāi teh tsò siān-sū, m̄-nā tī Tsú ê bīn-tsîng, tī lâng ê bīn-tsîng mā sī án-ne. 22 Só͘-í guán koh tshe-phài tsi̍t-ê hiaⁿ-tī kah in tsò-hué khì. Tsi̍t-ê hiaⁿ-tī king-kuè guán tsin-tsē khó-giām, guán tsai i jia̍t-sim pang-tsō͘ lâng. Taⁿ i hui-siông sìn-jīm lín, tsiū koh-khah khat-bōng khì pang-tsō͘ lín. 23 Kóng-kàu Thê-to, i sī guá ê tâng-phuāⁿ, tsò guá ê tâng-kang lâi pang-tsō͘ lín. Kah i tsò-hué khì hiah-ê hiaⁿ-tī sī kok kàu-huē tshe-phài ê, sī Ki-tok ê îng-kng. 24 Só͘-í lín tio̍h tī kàu-huē kong-khai tsìng-si̍t lín tuì in ê thiàⁿ-sim, mā tio̍h tsìng-si̍t guán tuì lín ê khua-kháu.