《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第九章

作者 巴克禮普世版小組 2015.06.21

Pang-tsō͘ Tâng Sìn ê Hiaⁿ-tī
1 Kuan-hē tsín-tsè Iû-thài sìn-tô͘ ê tāi-tsì, guá m̄-bián koh siá phue hō͘ lín. 2 Guá tsai lín jia̍t-sim pang-tsō͘ lâng, guá bat tsiong tsit-hāng tāi-tsì tuì Má-kî-tùn-lâng khua-kháu, kóng, "A-kai-a ê sìn-tô͘ tī kū-nî to̍h tsún-pī piān." Lín ê jia̍t-sim ū kám-kik tsin-tsē lâng. 3 Guá tshe-phài tsiah-ê hiaⁿ-tī khì lín hia, ǹg-bāng lín tsiàu guá kóng ê sing tsún-pī piān, tsiah bián guá tī tsit-hāng tāi-tsì só͘ khua-kháu ê piàn-tsiâⁿ khang-tshuì teh pō͘-tsi̍h. 4 Nā bô, bān-it ū Má-kî-tùn-lâng kah guá tsò-hué khì, khuàⁿ-tio̍h lín bô tsún-pī piān, guán ē in-uī siuⁿ-kuè siong-sìn lín suah tsin làu-khuì. Lín kám bē kám-kak koh-khah làu-khuì? 5 Só͘-í guá siūⁿ tio̍h khǹg hiah-ê hiaⁿ-tī liōng-tsá khì lín hia, kiò lín tsîng só͘ tap-ìng ê hōng-hiàn sing tsún-pī piān, án-ne guá kàu-uī ê sî lín lóng tsún-pī piān, thang piáu-sī lín ê hōng-hiàn m̄-sī bián-kióng, sī kam-sim lo̍k-ì. 6 Lín tio̍h ē-kì-tit, tsíng-tsí iā tsió ê lâng, siu-sîng to̍h tsió; tsíng-tsí iā tsē ê lâng, siu-sîng to̍h tsē 7 Só͘-í ta̍k-lâng tio̍h tsiàu ka-kī só͘ kuat-tīng ê lâi hōng-hiàn, m̄-thang m̄-kam, m̄-thang bián-kióng, in-uī Siōng-Tsú thiàⁿ huaⁿ-hí hōng-hiàn ê lâng. 8 Siōng-Tsú ē tsiong ta̍k-hāng un-tián tshiong-muá tī lín tiong-kan, m̄-nā hō͘ lín sî-siông tshiong-tsiok, koh ē-tàng tsò ta̍k-hāng hó-sū. 9 Tú tsiàu Sìng-king só͘ kì-tsài: I khóng-khài tsín-tsè sàn-tshiah-lâng, I ê jîn-tsû íng-uán tsûn-tsāi.( tsù: SPh 112:9) 10 Hit-uī siúⁿ-sù tsíng-tsí hō͘ iā-tsíng ê, mā siúⁿ-sù bí-niû hō͘ lâng tsia̍h ê Siōng-Tsú, I ē siúⁿ-sù lín su-iàu ê tsíng-tsí, mā ē ke-thiⁿ lín jîn-tsû só͘ kiat ê kué-tsí. 11 Siōng-Tsú ē sî-siông hō͘ lín hù-tsiok, thang suî-sî tsín-tsè su-iàu ê lâng, hō͘ tsin-tsē lâng thong-kuè guán tsiap-tio̍h lín ê hōng-hiàn lâi kám-siā Siōng-Tsú. 12 In-uī lín tsit-ê ho̍k-sāi ê kang-tsok m̄-nā kái-kuat sìn-tô͘ ê su-iàu, mā hō͘ tsin-tsē lâng ke-thiⁿ in tuì Siōng-Tsú ê kám-siā. 13 Thong-kuè lín só͘ tsò tsit-hāng tsû-siān ê kang-tsok, tsìng-si̍t lín ū sūn-ho̍k lín só͘ sîng-jīn Ki-tok ê hok-im, iū-koh khóng-khài tsín-tsè sàn-tshiah-lâng,thang kui îng-kng hō͘ Siōng-Tsú. 14 Siōng-Tsú siúⁿ-sù lín ti̍k-pia̍t ê un-tián, hō͘ hiah-ê lâng koh-khah kìng-ài lín, koh uī lín kî-tó. 15 Tio̍h kám-siā Siōng-Tsú, I siúⁿ-sù lán bē-tàng kó͘-kè ê un-tián.