《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第15章

作者 巴克禮普世版小組 2011.07.10

1, Hit sî ū Huat-lī-sài-phài ê lâng kap king-ha̍k-kàu-su, tuì Iâ-lō͘-sat-líng lâi tsiū-kūn Iâ-so͘, kóng,
2, Lí ê bûn-tô͘ siáⁿ-sū huān-tio̍h kó͘-tsá lâng ê liû-thuân? in-uī tsia̍h ê sî in bô sué tshiú.
3, I tsiū ìn kóng, Siáⁿ-sū lín iā tuì lín ê liû-thuân lâi huān-tio̍h Siōng-tsú ê bīng-līng ah?
4, In-uī Siōng-tsú kóng, Tio̍h kìng lín ê pē, lín ê bú; koh ū kóng, Mē pē á-sī mē bú ê, tik-khak tio̍h hō͘ i sí.
5, Tān-sī lín tsiū kóng, Kìⁿ-nā lâng tuì pē á-sī bú kóng,
6, Lí pún só͘ ē thang tuì guá tit-tio̍h ê lī-ik, í-king hiàn-khì; hit lâng tsiū tsua̍t-tuì bô kìng i ê pē. Lín tsiū tuì lín ê liû-thuân í-king huè Siōng-tsú ê tō-lí.
7, Ké-hó ê lâng ah, Í-sài-a tsí lín lâi ū-giân ê tsin-tsiàⁿ tio̍h; i kóng,
8, Tsit-ê jîn-bîn īng tshuì-tûn tsun-kìng guá; Tān-sī in ê sim lī-khui guá hn̄g-hn̄g.
9, In kìng-pài guá sī khang-khang, In-uī in īng lâng só͘ bīng-līng ê tsò kà-sī lâi kà-sī lâng.
10, Tsiū kiò tsìng lâng lâi, kā in kóng, Lín tio̍h thiaⁿ lâi hiáu-ngō͘.
11, M̄-sī tuì tshuì ji̍p-ê ē hō͘ lâng ù-uè; tsiū-sī tuì tshuì tshut-ê, tsit-ê ē hō͘ lâng ù-uè.
12, Hit sî bûn-tô͘ tsiū-kūn lâi kā I kóng, Huat-lī-sài-phài ê lâng thiaⁿ-tio̍h tsit-ê uē, tsin m̄ guān, lí tsai mah?
13, I ìn kóng, Kìⁿ-nā tsai-tsìng ê mi̍h m̄-sī guá ê Thiⁿ Pē só͘ tsai-tsìng ê, bueh pui̍h i ê kun.
14, Tshut-tsāi in; in sī tshiⁿ-mî teh tshuā lō͘ ê. Tān-sī tshiⁿ-mî kā tshiⁿ-mî ê tshuā lō͘, nn̄g ê teh-bueh pua̍h-lo̍h hām-khiⁿ.
15, Pí-tik ìn I kóng, Tsit-ê phì-jū, tshiáⁿ kā guán kué-bîng.
16, I tsiū kóng, Lín iā iáu-kú bē hiáu-ngō͘ mah?
17, Kiám bē hiáu-tit, kìⁿ-nā tuì tshuì ji̍p ê, lo̍h tī pak-tó͘, lâi pàng tī tshè-tî ah?
18, Tān-sī tuì tshuì tshut ê; sī tuì sim-lāi huat-tshut; tsiah-ê hō͘ lâng ù-uè.
19, In-uī tuì sim huat-tshut pháiⁿ liām-thâu, hîng-hiong, kan-îm, su-thong, thau-the̍h, lām-sám kiàn-tsìng, pòng-to̍k;
20, tsiah-ê sī hō͘ lâng ù-uè; tān-sī bô sué tshiú lâi tsia̍h, bē hō͘ lâng ù-uè.
21, Iâ-so͘ tuì hia tshut-khì thè-khì kàu Tshui-lô Se-tùn ê kíng-kài.
22, Tú-tn̄g ū Ka-lâm ê hū-jîn-lâng tshut in ê kau-kài, âu-kiò kóng, Tsú ah, Tāi-pi̍t ê kiáⁿ-sun, lîn-bín guá; guá ê tsa-bó͘-kiáⁿ huān-tio̍h kuí, tsin kan-khó͘.
23, Iâ-so͘ bô ìn i tsi̍t kù. I ê bûn-tô͘ lâi, kiû I kóng, Tio̍h kah i khì, in-uī i tī lán ê āu-bīn teh âu-kiò.
24, I tsiū ìn kóng, Guá hōng tshe, bô m̄-sī tsiū-kūn Í-sik-lia̍t ke sit-lo̍h ê iûⁿ nā-tiāⁿ.
25, Hū-jîn-lâng lâi pài I kóng, Tsú ah, pang-tsō͘ guá.
26, Tān-sī I kóng, The̍h kiáⁿ-jî ê piáⁿ, hiat hō͘ káu-á, sī m̄ ha̍p.
27, Hū-jîn-lâng kóng, Tsú ah, tio̍h; in-uī liân káu-á iā ē tit tsia̍h in ê tsú-lâng toh-kha ka-la̍uh ê piáⁿ-iù.
28, Tuì án-ne Iâ-so͘ ìn kóng, Hū-jîn-lâng ah, lí ê sìn tuā à; tsiàu lí só͘ ài ê, kā lí tsò tsiâⁿ. Tuì hit sî i ê tsa-bó͘-kiáⁿ í-king hó.
29, Iâ-so͘ lī-khui hia, kàu Ka-lī-lī-síng hái-piⁿ; tsiūⁿ suaⁿ teh tsē.
30, Ū tsē-tsē tīn ê lâng tsiū-kūn I, suà tuà pái-kha ê, tshiⁿ-mî ê, é-káu ê, phuà-siùⁿ ê, kap tsē-tsē pa̍t khuán ê lâi, hē tī I ê kha-tsîng; tsiū i-hó in.
31, Tì-kàu tsìng lâng gông-ngia̍h; in-uī khuàⁿ-tio̍h é-káu ê kóng uē, phuà-siùⁿ ê lóng hó, pái-kha ê kiâⁿ, tshiⁿ-mî ê khuàⁿ-tio̍h; tsiū kui îng-kng Í-sik-lia̍t ê Siōng-tsú.
32, Iâ-so͘ kiò I ê bûn-tô͘ lâi, kóng, Guá lîn-bín tsiah-ê lâng, in-uī in í-king kap guá tuà saⁿ ji̍t; iā bô mi̍h thang tsia̍h; guá m̄ kam hō͘ in iau-iau khì, kiaⁿ-liáu in lō͘-ni̍h ià-siān.
33, Bûn-tô͘ kā I kóng, Guán tī khòng-iá, tuì tó-uī ū hiah tsuē piáⁿ thang hō͘ tsiah tsuē lâng tsia̍h pá?
34, Iâ-so͘ kā in kóng, Lín ū juā tsuē piáⁿ? ìn kóng, Tshit ê, kap tām-po̍h suè bé hî.
35, Tsiū huan-hù tsìng lâng tsē tī tē-ni̍h;
36, The̍h hí tshit ê piáⁿ kap hî, tsiok-siā peh, kau hō͘ bûn-tô͘, bûn-tô͘ tsiū hō͘ tsìng lâng.
37, Lóng tsia̍h kàu pá; khioh só͘ tshun ê sut-á, té-muá tshit nâ.
38, Tsia̍h ê, hū-jîn-lâng gín-ná í-guā, kiōng sì-tshing lâng.
39, Kì-jiân hō͘ tsìng lâng sì-suàⁿ, tsiū tsiūⁿ tsûn, kàu Má-ka-tàn ê kau-kài.