《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第三章

作者 巴克禮普世版小組 2015.08.09

Lu̍t-huat Á-sī Sìn-sim
1 Lín tsiah-ê gōng Ka-lia̍p-thài-lâng ah, Iâ-so͘ Ki-tok tìng si̍p-jī-kè í-king tuì lín hián-bîng tī lín ê ba̍k-tsiu tsîng kám m̄-sī? Taⁿ lín sī khì hō͘ siáⁿ-lâng bê-khì? 2 Guá kan-taⁿ mn̄g lín tsi̍t-hāng tāi-tsì, lín tsîng niá-siū Sìng-Sîn sī tuì siú lu̍t-huat lâi kiâⁿ, á-sī tuì sìn só͘ thiaⁿ-tio̍h ê hok-im? 3 Lín ná-ē hiah gōng? Lín kì-jiân tuì khò Sìng-Sîn khai-sí, tsit-má beh khò jio̍k-thé lâi uân-sîng sī-bô? 4 Lín siū hiah-tsē kan-khó͘ kám lóng bô tshái-kang? It-tīng ū lō͘-īng tsiah tio̍h. 5 Siōng-Tsú sù lín Sìng-Sîn, koh tī lín tiong-kan kiâⁿ sîn-jiah, sī in-uī lín siú lu̍t-huat, á-sī in-uī lín sìn só͘ thiaⁿ-tio̍h ê hok-im? 6 Sìng-king án-ne kóng, "A-pik-la̍h-hán sìn Siōng-Tsú, Siōng-Tsú tsiū kā i khuàⁿ-tsò gī-lâng."（tsù: CSK 15:16) 7 Só͘-í lín tio̍h tsai, ū sìn ê lâng tsiah sī A-pik-la̍h-hán ê kiáⁿ-sun. 8 Sìng-king tāi-sing to̍h tsai, Siōng-Tsú beh hō͘ Guā-pang-lâng tuì sìn lâi kah Siōng-Tsú ū hô-hó ê kuan-hē, só͘-í tsiong tsit-ê hó siau-sit sing thuân hō͘ A-pik-la̍h-hán kóng, "Bān-bîn ē in-uī lí lâi siū Siōng-Tsú ê tsiok-hok!"( tsù: CSK 12:3) 9 Án-ne só͘-ū sìn ê lâng ē kah ū sìn ê A-pik-la̍h-hán tsò-hué siū tsiok-hok! 10 Hiah-ê uá-khò tsun-siú lu̍t-huat ê lâng lóng ua̍h tī tsiù-tsó͘ ē-bīn, in-uī Sìng-king kì-tsài: Bô tsun-siú kì tī lu̍t-huat-su só͘ kui-tīng lâi kiâⁿ ê lâng, lóng tio̍h siū Siōng-Tsú tsiù-tsó͘.( tsù: SBK 27:26) 11 Án-ne bô-lâng ē-tàng uá-khò lu̍t-huat lâi kah Siōng-Tsú kiàn-li̍p hô-hó ê kuan-hē, in-uī Sìng-king ū kóng, "Tuì sìn lâi kah Siōng-Tsú ū hô-hó kuan-hē ê lâng ē tit-tio̍h ua̍h-miā."( tsù: HPK 2:4) 12 M̄-koh lu̍t-huat m̄-sī īng sìn tsò kin-kì, Sìng-king kóng, "Tsun-siú lu̍t-huat ê lâng ē khò hiah-ê lu̍t-huat lâi ua̍h."( tsù: LBK 18:5) 13 Ki-tok í-king siū tsiù-tsó͘ lâi kiù-sio̍k lán thuat-lī lu̍t-huat ê tsiù-tsó͘, in-uī Sìng-king kì-tsài: Só͘-ū tiàu tī tshâ-thâu-tíng ê lâng lóng tio̍h siū Siōng-Tsú ê tsiù-tsó͘.( tsù: SBK 21:23) 14 Ki-tok án-ne tsò sī beh tsiong A-pik-la̍h-hán ê hok-khì, thong-kuè Ki-tok Iâ-so͘ lâi sù hō͘ Guā-pang-lâng, mā beh hō͘ lán tuì sìn lâi niá-siū Siōng-Tsú só͘ ìng-ín ê Sìng-Sîn.

Lu̍t-huat Kah Ìng-ún
15 Hiaⁿ-tī tsí-muē ah, guá īng lán ji̍t-siông sing-ua̍h tsi̍t-ê lē lâi suat-bîng. Khè-iok it-tàn sîng-li̍p, tsiū bē-īng-tit kā i huì-tû á-sī ke-thiⁿ. 16 Siōng-Tsú ū tuì A-pik-la̍h-hán í-ki̍p i ê kiáⁿ-sun li̍p-iok. Sìng-king pīng bô tsí tsin-tsē lâng kóng, "kiáⁿ-kiáⁿ sun-sun". Sī kóng, "lí ê kiáⁿ-sun." Tse sī teh tsí tsi̍t-ê lâng, tsiū-sī Ki-tok. 17 Guá ê ì-sù sī kóng, Siōng-Tsú ū kah A-pik-la̍h-hán li̍p-iok, koh tah-ìng beh siú iok. Sì-pah saⁿ-tsa̍p nî āu tsiah tshut-hiān ê lu̍t-huat bē-tàng huì-tû hit-ê iok lâi hō͘ Siōng-Tsú ê ìng-ín kui tī khang-khang. 18 In-uī sîng-tsiap Siōng-Tsú só͘ sù ê sán-gia̍p nā sī kin-kì lu̍t-huat, tsiū bô koh khò ìng-ín, m̄-koh Siōng-Tsú sù sán-gia̍p hō͘ A-pik-la̍h-hán sī tsiàu ìng-ín. 19 Án-ne lu̍t-huat ū siáⁿ lō͘-īng? Lu̍t-huat sī uī-tio̍h beh hō͘ lâng tsai sím-mi̍h sī kuè-sit, iû thiⁿ-sài thong-kuè tsi̍t-ê tiong-kan-lâng só͘ siat-li̍p-.ê. Ti̍t-kàu hit-ê tit-tio̍h ìng-ín ê kiáⁿ-sun lâi-lîm ê sî tsiū kiat-sok. 20 M̄-koh sio̍k tan-hong ê tāi-tsì bô su-iàu tiong-kan-lâng, Siōng-Tsú sī tan-hong teh tsò tsit-hāng tāi-tsì.

Lu̍t-huat ê Bo̍k-tik
21 Án-ne kóng khí-lâi, lu̍t-huat kah Siōng-Tsú ê ìng-ín kám ū tshiong-tu̍t? Tsua̍t-tuì bô! In-uī nā-sī lu̍t-huat ē hō͘ lâng tit-tio̍h ua̍h-miā, lâng tsiū ē-tàng khò lu̍t-huat lâi kah Siōng-Tsú kiàn-li̍p hô-hó ê kuan-hē. 22 M̄-koh Sìng-king kóng bān-bîn lóng uî tī tsuē-ok lāi, Siōng-Tsú tsí-ū thong-kuè sìn Iâ-so͘ Ki-tok lâi tsò niá-siū ìng-ín ê kin-kì. Tsiah-ê ìng-ín sī beh siúⁿ-sù hō͘ hiah-ê sìn ê lâng. 23 M̄-koh tsit-ê "sìn" ê sî-tāi lâi-lîm í-tsîng, lán siū lu̍t-huat kò͘-siú tiâu-teh, ti̍t-kàu "sìn" ê sî-tāi tsiah hián-bîng tshut-lâi. 24 Án-ne, tī Ki-tok lâi-lîm í-tsîng, lu̍t-huat tsò lán ê kàm-hō͘-jîn, tshuā lán lâi kui Ki-tok, hō͘ lán tuì "sìn" lâi kah Siōng-Tsú hô-hó. 25 Tsit-má "sìn" ê sî-tāi í-king lâi-lîm, lu̍t-huat to̍h bô koh tsò lán ê kàm-hō͘-jîn. 26 Lín tāi-ke tuì sìn lâi kah Ki-tok Iâ-so͘ kiat-liân, lóng tsiâⁿ-tsò Siōng-Tsú ê kiáⁿ-jî. 27 Lín só͘-ū niá-siū sé-lé lâi kah Ki-tok kiat-liân ê lâng, lóng ji̍p tī Ki-tok, ū I ê ua̍h-miā. 28 Án-ne bô hun Iû-thài-lâng á-sī Guā-pang-lâng, lô͘-lē á-sī tsū-iû ê lâng, tsa-po͘-lâng á-sī tsa-bó͘-lâng, tī Ki-tok Iâ-so͘ lāi-bīn lóng tsiâⁿ-tsò tsi̍t-thé. 29 Lín kì-jiân sio̍k Ki-tok, tsiū-sī A-pik-la̍h-hán ê kiáⁿ-sun, tsiū ē-tàng sîng-siū Siōng-Tsú tuì A-pik-la̍h-hán ê ìng-ín.