《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第四章

作者 巴克禮普世版小組 2015.08.16

1 Guá koh kóng, kè-sîng-jîn sui-jiân sī sán-gia̍p ê tsú-lâng, i tī bī-sîng-liân ê sî kah lô͘-po̍k bô sím-mi̍h tsha-pia̍t. 2 Tī lāu-pē só͘ tiāⁿ-tio̍h ê ji̍t-tsí tsìn-tsîng, tio̍h siū kàm-hō͘-jîn kah kuán-ke ê kàm-tok. 3 Lán mā tshin-tshiūⁿ án-ne, tī lîng-sìng bī-sîng-liân í-tsîng, siū ú-tiū ê lîng tsi-phuè tsò lô͘-lē. 4 M̄-koh sî-ki nā kàu, Siōng-Tsú tshe ka-kī ê Kiáⁿ, hō͘ I tuì hū-jîn-lâng lâi tshut-sì, tī lu̍t-huat ê kuán-hat tsi-hā sîng-tióng. 5 Uī-tio̍h kiù-sio̍k lu̍t-huat tsi-hā ê lâng, thang hō͘ lán tsiâⁿ-tsò Siōng-Tsú ê kiáⁿ-jî. 6 In-uī lín sī Siōng-Tsú ê kiáⁿ-jî, Siōng-Tsú ū tshe I ê Kiáⁿ ê Sìng-Sîn ji̍p lín ê sim, hō͘ lín tuā-siaⁿ huah: "Á-pa, Thiⁿ-Pē ah." 7 Án-ne, lí to̍h bô koh tsò lô͘-po̍k, sī tsò kiáⁿ-jî. Kì-jiân tsò kiáⁿ-jî, Siōng-Tsú tsiū hō͘ lí tsò kè-sîng-jîn.

Pó-lô Kuan-huâi Ka-lia̍p-thài-lâng
8 Í-tsîng lín m̄-bat Siōng-Tsú ê sî, hō͘ hiah-ê pún-tsit m̄-sī sîn ê sîn-bîng tsò lô͘-lē tsi-phuè. 9 M̄-koh tsit-má lín í-king bat Siōng-Tsú, khah hó tio̍h kóng sī hō͘ Siōng-Tsú só͘ bat, ná-ē tò-tńg khì ǹg hiah-ê nńg-tsiáⁿ koh bô lō͘-īng ê ú-tiū tsi lîng, koh-tsài tsò in ê lô͘-lē sī-bô? 10 Lín tì-ì siú ti̍k-pia̍t ê ji̍t, gue̍h, tseh kah nî. 11 Guá thè lín tam-sim, khióng-kiaⁿ guá í-tsîng tī lín tiong-kan ê lô-khó͘ kang-tsok ē piàn-tsiâⁿ bô tshái-kang. 12 Hiaⁿ-tī tsí-muē ah, guá í-king ū kā lín jīn-tông, khún-kiû lín mā tio̍h kā guá jīn-tông. Lín lóng m̄-bat khik-khui guá. 13 Lín ē-kì-tit guá thâu tsi̍t-pái khì lín hia thuân hok-im, sī in-uī guá ê sing-khu ū pēⁿ. 14 Hit sî, sui-jiân guá ê kiān-khong tsiâⁿ-tsò lín ê hū-tam, lín bô kā guá khuàⁿ-khin, mā bô kā guá kī-tsua̍t. Lín tian-tò tsiap-thāi guá tshin-tshiūⁿ teh tsiap-thāi Siōng-Tsú ê thiⁿ-sài; mā tshin-tshiūⁿ teh tsiap-thāi Ki-tok Iâ-so͘. 15 Lín tong-sî ê huaⁿ-hí kah muá-tsiok taⁿ tsáu khì tó-uī? Guá káⁿ kóng, lín hit tong-sî nā tio̍h kā ba̍k-tsiu ó͘ tshut-lâi hō͘ guá mā kam-guān. 16 Taⁿ guá tuì lín tsiàu-si̍t kóng, guá tsit-má suah tsiâⁿ-tsò lín ê tuì-ti̍k sī-bô? 17 Kî-tha hiah-ê lâng tuì lín jia̍t-tsîng m̄-sī tshut-tī hó-ì, sī ài beh keh-tn̄g lín kah guá ê kuan-hē, thang hō͘ lín kah in tshin-jia̍t. 18 Siān-sū m̄-sī kan-taⁿ guá kah lín tsò-hué ê sî tio̍h tsò, tio̍h put-sî jia̍t-sim khì tsò. 19 Guá ê sè-kiáⁿ ah, guá uī-tio̍h beh hō͘ Ki-tok ê pún-sìng ji̍p tī lín ê sim, guá koh tsi̍t-pái king-kuè sing-sán ê kan-khó͘. 20 Guá tsin ài tsit-tsūn tsiū khì lín hia, thang īng bô kāng-khuán ê kháu-khì kah lín kóng-uē. Guá si̍t-tsāi m̄-tsai tio̍h án-tsuáⁿ lâi tuì-thāi lín.

Hā-kah Kah Sat-la̍h ê Lē
21 Lín tsiah-ê ài siū lu̍t-huat kuán-hat ê lâng, tio̍h kā guá kóng, lín kám bô beh thiaⁿ lu̍t-huat ê tsheh án-tsuáⁿ siá? 22 In-uī lu̍t-huat ê tsheh ū kì-tsài kóng, "A-pik-la̍h-hán ū nn̄g-ê kiáⁿ, tsi̍t-ê sī lí-pī seⁿ ê, tsi̍t-ê sī tsū-iû ê tsa-bó͘-lâng seⁿ-.ê. 23 M̄-koh hit-ê tuì lí-pī seⁿ ê sī tsiàu sio̍k-sè lâi seⁿ, hit-ê tuì tsū-iû ê tsa-bó͘-lâng seⁿ ê sī tuì Siōng-Tsú ê ìng-ín lâi seⁿ. 24 Tse sī tsi̍t-tsióng ê phì-jū: hit nn̄g-ê tsa-bó͘-lâng sī tāi-piáu nn̄g-tsióng khè-iok, tsi̍t-ê sī Hā-kah, tāi-piáu Se-nái-suaⁿ ê iok, só͘ seⁿ ê kiáⁿ tsò lô͘-lē. 25 Hā-kah sī tsí A-lah-pik ê Se-nái-suaⁿ, sī teh tsí hiān-kim ê Iâ-lō͘-sat-líng-siâⁿ, in-uī i kah i ê kiáⁿ-sun lóng tsò lô͘-lē. 26 M̄-koh tī thiⁿ-tíng ê Iâ-lō͘-sat-líng sī tsū-iû ê, sī lán ê lāu-bú. 27 In-uī Sìng-king ū kì-tsài: Bē huâi-īn, bē seⁿ kiáⁿ ê tsa-bó͘-lâng, tio̍h huaⁿ-hí. M̄-bat king-kuè sing-sán thòng-khó͘ ê tsa-bó͘-lâng ah, tio̍h tuā-siaⁿ huaⁿ-hí tshiùⁿ-kua, in-uī to̍k-sin ê tsa-bó͘-lâng pí ū tiōng-hu ê khah-tsē kiáⁿ-jî.( tsù: ISA 54:1) 28 Hiaⁿ-tī tsí-muē ah, lín tshin-tshiūⁿ Í-sat, sī Siōng-Tsú ìng-ín ê kiáⁿ-jî. 29 Tong-sî tsiàu sio̍k-sè lâi seⁿ ê pik-hāi tuì Siōng-Tsú ê Sìng-Sîn só͘ seⁿ-.ê. Tsit-má mā sī án-ne. 30 M̄-koh Sìng-king án-tsuáⁿ kóng? Sìng-king kóng, "Tio̍h kā lí-pī kah i ê kiáⁿ kuáⁿ tshut-khì, in-uī lí-pī ê kiáⁿ tsua̍t-tuì bē-tàng kah tsū-iû ê lâng ê kiáⁿ tâng-tsê kè-sîng sán-gia̍p." 31 Hiaⁿ-tī tsí-muē ah, án-ne lán m̄-sī lí-pī ê kiáⁿ, lán sī tsū-iû ê tsa-bó͘-lâng ê kiáⁿ.