《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第五章

作者 巴克禮普世版小組 2015.08.23

Ki-tok-tô͘ ê Tsū-iû
1 UĪ-tio̍h beh hō͘ lán tsū-iû, Ki-tok í-king kā lán tháu-pàng, só͘-í lín tio̍h khiā hō͘ tsāi, m̄-thang koh hō͘ lâng ap-tsè tsò lô͘-lē. 2 Guá Pó-lô kā lín kóng, lín tio̍h tsù-ì thiaⁿ. Lín nā beh siū kat-lé, Ki-tok tuì lín tsiū lóng bô lī-ik. 3 Guá koh-tsài kiông-tiāu tsi̍t-piàn, ta̍k-ê siū kat-lé ê lâng lóng tio̍h tsun-siú lu̍t-huat, ná tshin-tshiūⁿ khiàm-tsè tio̍h hîng. 4 Lín tsiah-ê siūⁿ-beh khò lu̍t-huat lâi kah Siōng-Tsú kiàn-li̍p hô-hó kuan-hē ê lâng, tsiū-sī kah Ki-tok tuān-tsua̍t kuan-hē, sit-lo̍h Siōng-Tsú ê un-tián. 5 In-uī lán uá-khò Sìng-Sîn, tuì Sìng-Sîn teh thìng-hāu lán só͘ ǹg-bāng kah Siōng-Tsú ū hô-hó ê kuan-hē. 6 In-uī lán nā kah Ki-tok Iâ-so͘ kiat-liân, ū siū kat-lé á bô siū kat-lé lóng bô iàu-kín. Iàu-kín ê sī tuì thiàⁿ-sim piáu-hiān tshut-lâi ê sìn-sim. 7 Lín í-tsîng tsò-liáu tsin hó. Sī siáⁿ-lâng kā lín tsó͘-tòng, hō͘ lín bô koh sūn-tsiông tsin-lí? 8 Hit-ê sueh-ho̍k lín án-ne tsò ê, tong-jiân m̄-sī Hit-uī ho͘-tiàu lín ê Siōng-Tsú. 9 Sio̍k-gí kóng, "Tām-po̍h-á ê kàⁿ ē hō͘ kui-sn̂g huat khí-lâi." 10 Tī Tsú ê lāi-bīn guá tshim-sìn, lín kah guá ê siūⁿ-huat bē kóng ū bô-kāng. Hiah-ê teh kiáu-jiáu lín ê, bô-lūn sī sím-mi̍h lâng, lóng ē siū Siōng-Tsú tsik-hua̍t. 11 Hiaⁿ-tī tsí-muē ah, guá nā iáu-koh teh thuân kat-lé, án-tsuáⁿ iáu-koh teh siū pik-hāi? Guá nā án-ne tsò, suan-iông Ki-tok ê si̍p-jī-kè tsiū bē siū-tio̍h tsó͘-gāi. 12 Hiah-ê teh kā lín jiáu-luān ê lâng, guá khó͘ in m̄ ka-kī iam khí-lâi. 13 Hiaⁿ-tī tsí-muē ah, Siōng-Tsú ho͘-tiàu lín sī beh hō͘ lín tit-tio̍h tsū-iû, m̄-koh m̄-thang hō͘ lín ê tsū-iû piàn-tsò hòng-tsiòng jio̍k-thé su-io̍k ê ki-huē. Tio̍h īng thiàⁿ-sim lâi hō͘-siōng ho̍k-bū. 14 In-uī tsuân-pō͘ lu̍t-huat pau-hâm tī "Thiàⁿ tshù-piⁿ tshin-tshiūⁿ ka-kī" ê kài-bīng lāi-bīn. 15 Lín tio̍h kín-sīn, lín nā kah khîm-siù kāng-khuán sio-kā sio-thun, kàu-bué it-tīng ē hō͘-siōng tsâu-bia̍t.

Sìng-Sîn Kah Lâng ê Pún-sìng
16 Guá ê ì-sù sī: lín tio̍h tsiàu Sìng-Sîn ê ín-tshuā lâi sing-ua̍h, tsua̍t-tuì m̄-thang kiû buán-tsiok ka-kī jio̍k-thé ê su-io̍k. 17 In-uī jio̍k-thé ê su-io̍k kah Sìng-Sîn hō͘-siōng tuì-khòng. pí-tshú sī tuì-ti̍k, hō͘ lín bē-tàng tsiàu ka-kī só͘ ì-ài ê khì tsò. 18 Lín nā hō͘ Sìng-Sîn ín-tshuā, tsiū bián siū lu̍t-huat ê khòng-tsè. 19 Lâng jio̍k-thé ê phín-hīng tsin bîng-hián, tsiū-sī îm-luān, ù-uè, hò͘ⁿ-sik, 20 pài ngó͘-siōng, kiâⁿ siâ-su̍t, kiat uan-siû, sio-tseⁿ, uàn-hūn, siū-khì, kiat-tóng, hun-phài, tsū-su, 21 uàn-tò͘, tsiú-tsuì, hòng-tōng, í-ki̍p kî-tha luī-sū ê pháiⁿ-phín-hīng. Guá tsîng bat kā lín kíng-kò, taⁿ koh tsi̍t-pái kā lín kíng-kò, siông-siông tsò tsit-khuán tāi-tsì ê lâng bē-tàng sîng-tsiap Siōng-Tsú ê Kok-tō͘. 22 M̄-koh Sìng-Sîn só͘ kiat ê kué-tsí sī: thiàⁿ-sim, huaⁿ-hí, hô-pîng, jím-nāi, tsû-pi, siān-liông, tiong-si̍t, 23 un-jiû kah tsún-tsat. Tsiah-ê hîng-uî it-puaⁿ ê lu̍t-huat lóng bô teh kìm-tsí. 24 Hiah-ê sio̍k Ki-tok Iâ-so͘ ê lâng, í-king tsiong jio̍k-thé kah i ê tsîng-io̍k tsò-hué tìng tī si̍p-jī-kè. 25 Kì-jiân lán khò Sìng-Sîn teh ua̍h, tio̍h tsiàu Sìng-Sîn ê ín-tshuā lâi sing-ua̍h. 26 Lán m̄-thang tui-kiû hi-îng, m̄-thang hō͘-siōng kik-khì, mā m̄-thang hō͘-siōng uàn-tò͘.