《巴克禮普世版聖經（試讀本）》

 | | | 轉寄

巴克禮普世版（試讀本） 加拉太書第六章

作者 巴克禮普世版小組 2015.08.30

Hun-tam Pa̍t-lâng ê Tāng-tàⁿ
1 Hiaⁿ-tī tsí-muē ah, nā ū-lâng bô tiuⁿ-tî hām-lo̍h kuè-sit, lín sio̍k-lîng ê lâng tio̍h īng un-jiû ê sim kā i kiù-tsìng, ka-kī mā tio̍h sió-sim, tsiah bē siū ín-iú. 2 Lín tio̍h hō͘-siōng hun-tam tāng-tàⁿ, án-ne tsò tsiah sī teh si̍t-hiān Ki-tok ê kà-sī. 3 Bô siáⁿ tsâi-lîng koh siūⁿ-kóng ka-kī tsin gâu ê lâng sī teh khi-phiàn ka-kī. 4 Ta̍k-lâng lóng tio̍h síng-tshat ka-kī ê hîng-uî, nā ū hó hîng-uî, kan-taⁿ thang tuì ka-kī khua-kháu, bô su-iàu kah pa̍t-lâng pí-phīng. 5 In-uī ta̍k-lâng ê tàⁿ tio̍h ka-kī taⁿ. 6 Ha̍k-si̍p tō-lí ê lâng tio̍h tsiong ta̍k-hāng hó-mi̍h kah kà-sī i ê lâng tsò-hué hun-hióng. 7 M̄-thang khi-phiàn ka-kī, Siōng-Tsú sī bē-tàng bú-jio̍k-.ê. Lâng beh tsiàu só͘ iā-tsíng ê lâi siu-sîng. 8 Uī-tio̍h buán-tsiok ka-kī ê jio̍k-thé lâi iā-tsíng ê lâng, i ê siu-sîng tsiū-sī jio̍k-thé ê pāi-huāi. Uī-tio̍h hō͘ Sìng-Sîn huaⁿ-hí lâi iā-tsíng ê lâng, tsiū ē tuì Sìng-Sîn lâi siu-sîng íng-uán ê ua̍h-miā. 9 Tsò hó-sū m̄-thang sit-tsì, in-uī nā bô tiong-kan tn̄g-tsām, sî kàu tsiū ē ū siu-sîng. 10 Só͘-í lán tio̍h pá-ak ki-huē lâi tuì tsìng-lâng tsò hó-sū, iû-kî-sī tuì sìn tsiâⁿ-tsò tsi̍t-ke ê lâng, koh-khah tio̍h tì-ì.

Tsuè-āu ê Tshíng-an
11 Lín khuàⁿ, guá tshin-pit īng tsiah tuā ê jī siá phue hō͘ lín! 12 Hiah-ê tī guā-piáu tsng thé-bīn ê lâng, in siūⁿ-beh bián-kióng lín tsiap-siū kat-lé, in án-ne tsò kan-taⁿ bô ài uī-tio̍h Ki-tok ê si̍p-jī-kè lâi siū pik-hāi. 13 Kî-si̍t liân hiah-ê siū kat-lé ê lâng mā bô lóng siú lu̍t-huat. In ài lín tsiap-siū kat-lé, tsiah ē-tàng khua-kháu kóng lín ū tsun-siú guā-piáu ê lé-gî. 14 Nā-sī guá, guá it-tīng kan-taⁿ beh khua-kháu lán ê Tsú Iâ-so͘ Ki-tok ê si̍p-jī-kè, in-uī si̍p-jī-kè tuì guá lâi kóng, sè-kan í-king tìng-sí si̍p-jī-kè; tuì sè-kan lâi kóng, guá mā tìng-sí tī si̍p-jī-kè. 15 Ū siū kat-lé kah bô siū kat-lé lóng bô iàu-kín, iàu-kín ê sī lán tio̍h tsiâⁿ-tsò sin tshòng-tsō ê lâng. 16 Tsiàu tsit-ê tsún-tsik lâi sing-ua̍h ê lâng tsiū-sī Siōng-Tsú Í-sik-lia̍t ê tsú-bîn, guān pîng-an í-ki̍p liân-bín kah lín tông-tsāi! 17 Tuì taⁿ í-āu, bô-lūn sím-mi̍h-lâng lóng m̄-thang kā guá kiáu-jiáu, in-uī guá ê sing-khu ū tài Iâ-so͘ ê siong-jiah, tsìng-bîng guá sī I ê lô͘-po̍k. 18 Hiaⁿ-tī tsí-muē ah, guān lán ê Tsú Iâ-so͘ Ki-tok ê un-tián kah lín tông-tsāi! Amen.