《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第16章

作者 巴克禮普世版小組 2011.07.17

1, Huat-lī-sài kap Sat-thó͘-kai-phài ê lâng lâi tshì Iâ-so͘, Tshiáⁿ I īng tuì thiⁿ ê sîn-jiah hō͘ in khuàⁿ.
2, Tān-sī I ìn kóng, Ê-hng sî lín kóng, Uē hó thiⁿ à, in-uī thiⁿ-sik âng.
3, Ia̍h tsá-khí sî lín kóng, Kin-á-ji̍t ū hong-hō͘, in-uī thiⁿ-sik o͘-áu. Lín ē hiáu hun-piat thiⁿ-sik, tsí-ū bē hun-piat tsiah-ê sî ê sîn-jiah.
4, Ok-to̍k kan-îm ê sè-tāi kiû sîn-jiah; tsí-ū Iok-ná ê sîn-jiah í-guā, bô bueh sîn-jiah hō͘ i. Tsiū lī-pia̍t in khì.
5, Bûn-tô͘ kè-khì hit pîng, bē kì-tit tuà piáⁿ.
6, Iâ-so͘ kā in kóng, Tio̍h kín-sīn tî-hông Huat-lī-sài kap Sat-thó͘-kai-phài ê lâng ê kàⁿ.
7, Bûn-tô͘ saⁿ-kap gī-lūn kóng, Sī lán bô tuà piáⁿ o͘h.
8, Iâ-so͘ tsai, tsiū kóng, Sió-sìn ê lâng ah, siáⁿ-sū in-uī bô piáⁿ saⁿ-kap gī-lūn ah?
9, Lín iáu-kú bē hiáu-tit, iā bē kì-tit gō͘-tshing lâng tsia̍h gō͘ ê piáⁿ, lín khioh kuí khing ah?
10, Ia̍h sì-tshing lâng tsia̍h tshit ê piáⁿ, lín khioh kuí nâ ah?
11, Lín tsáiⁿ-iūⁿ bē hiáu-tit guá só͘ kā lín kóng ê, m̄-sī tsí piáⁿ, tsí-ū tio̍h tî-hông Huat-lī-sài kap Sat-thó͘-kai-phài ê lâng ê kàⁿ.
12, In tsiah ē hiáu-tit I só͘ kóng ê m̄-sī tî-hông piáⁿ ê kàⁿ, tsiū-sī Huat-lī-sài kap Sat-thó͘-kai-phài ê lâng ê kàu.
13, Iâ-so͘ í-king kàu Kai-sat-lī-a Hui-li̍p-pí ê kíng-kài, mn̄g I ê bûn-tô͘ kóng, Lâng teh kóng Jîn-tsú sī siáⁿ-lâng?
14, In kóng, Ū-ê kóng sī si-sé-tsiá Iok-hān; ū-ê kóng sī Í-lī-a; koh ū-ê kóng sī Iâ-lī-bí, á-sī sian-ti lâng ê tsi̍t-ê.
15, I tsiū kā in kóng, Tān-sī lín kóng guá sī siáⁿ-lâng?
16, Se-bûn Pí-tik ìn kóng, Lí sī Ki-tok, tsin-ua̍h Siōng-tsú ê Kiáⁿ.
17, Iâ-so͘ ìn i kóng, Se-bûn, Pa-Iok-ná, lí ū hok-khì ah; in-uī hiat-khì jio̍k-thé ê bô tsí-sī lí, tsiū-sī guá tī thiⁿ-tíng ê Pē tsí-sī lí.
18, Guá koh kā lí kóng, Lí tsiū-sī Pí-tik, tī tsit-ê tsio̍h-puâⁿ tíng guá bueh khí-tsō guá ê kàu-huē, im-hú ê kuan-ài iā bē iâⁿ i.
19, Guá bueh īng Thian-kok ê só-sî hō͘ lí; kìⁿ-nā lí tī tē-ni̍h pa̍k ê, tī thiⁿ-tíng iā bueh pa̍k i; kìⁿ-nā lí tī tē-ni̍h pàng ê, tī thiⁿ-tíng iā bueh pàng i.
20, Hit sî tsiū kìm-kài bûn-tô͘, bo̍h-tit kā lâng kóng I sī Ki-tok.
21, Tuì hit tia̍p khí, Iâ-so͘ tsiah tsí-sī I ê bûn-tô͘ tsai I tio̍h khì Iâ-lō͘-sat-líng, tuì tsiah-ê tiúⁿ-ló, tsè-si-thâu, king-ha̍k-kàu-su siū-tio̍h tsē-tsē khó͘-tshó͘; koh siū hāi-sí, tē saⁿ ji̍t koh-ua̍h.
22, Pí-tik khan I, tsik-pī I kóng, Tsú ah, tshian-bān m̄-thang, tsit-ê tsua̍t-tuì bô bueh kàu tī lí.
23, Iâ-so͘ ua̍t-tńg-sin, kā Pí-tik kóng, Sat-tàn, thè-khì guá ê āu-bīn; lí sī guá ê that-gāi; in-uī lí só͘ siūⁿ m̄-sī Siōng-tsú ê sū, sī lâng ê sū.
24, Hit sî Iâ-so͘ kā I ê bûn-tô͘ kóng, Lâng nā ài tè guá tio̍h khuàⁿ-bô ka-kī, giâ i ê si̍p-jī-kè, lâi tuè guá.
25, In-uī kìⁿ-nā ài kiù i ê sìⁿ-miā ê, bueh sit-lo̍h i; kìⁿ-nā uī-tio̍h guá lâi sit-lo̍h i ê sìⁿ-miā ê, bueh tit-tio̍h i.
26, Lâng nā tit-tio̍h tsuân sè-kài, lâi sòng-sit i ê sìⁿ-miā, ū sím-mi̍h lī-ik? á-sī lâng bueh tshut sím-mi̍h lâi tuì-uāⁿ i ê sìⁿ-miā.
27, In-uī Jîn-tsú īng I ê Pē ê îng-kng, kap I ê thiⁿ-sài bueh lâi, hit sî bueh tsiàu ta̍k lâng ê só͘ kiâⁿ lâi pò-ìng.
28 Guá si̍t-tsāi kā lín kóng, Khiā tī tsia ê, ū lâng iáu-bē sí, ē khuàⁿ-tio̍h Jîn-tsú tī I ê kok lâi.