《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第17章

作者 巴克禮普世版小組 2011.07.24

1, Kue3lak8 ji̍t, Iâ-so͘ līng-guā tuà Pí-tik, Ngá-kok, kap Ngá-kok ê hiaⁿ-tī Iok-hān, tshuā in peh-tsiūⁿ kuân suaⁿ;
2, tng in ê bīn-tsîng hîng-tsōng piàn-uāⁿ, I ê bīn kng iàⁿ-iàⁿ, tshin-tshiūⁿ ji̍t, I ê saⁿ pe̍h, tshin-tshiūⁿ kng.
3, Hut-jiân ū Mô͘-se, Í-lī-a tuì in hián-hiān, kap I kóng uē.
4, Pí-tik ìn Iâ-so͘ kóng, Tsú ah, lán tī tsia tsin hó; lí nā ài, guá bueh tī tsia tah saⁿ king liâu-á; tsi̍t king hō͘ lí, tsi̍t king hō͘ Mô͘-se, tsi̍t king hō͘ Í-lī-a.
5, I iáu teh kóng ē ê sî, hut-jiân ū kng-kng ê hûn tà in, koh ū siaⁿ tuì hûn-ni̍h tshut, kóng, Tsit-ê sī guá thiàⁿ ê Kiáⁿ, guá só͘ huaⁿ-hí ê; lín tio̍h thiaⁿ I.
6, Bûn-tô͘ thiaⁿ-tio̍h, tsiū phak-lo̍h-khì, tsīn-tsāi kiaⁿ.
7, Iâ-so͘ tsìn-tsîng bong in, kóng, Khí-lâi, m̄-bián kiaⁿ.
8, In kia̍h ba̍k, bô khuàⁿ-tio̍h tsi̍t lâng, tsí-ū Iâ-so͘ nā-tiāⁿ.
9, Lo̍h suaⁿ ê sî Iâ-so͘ bīng-līng in, kóng, Jîn-tsú iáu-bē tuì sí-lâng tiong koh-ua̍h, bo̍h-tit īng só͘ khuàⁿ-tio̍h ê kā lâng kóng.
10, I ê bûn-tô͘ mn̄g I kóng, Án-ne tsiū king-ha̍k-kàu-su kóng Í-lī-a tio̍h sing lâi, sī tsáiⁿ-iūⁿ?
11, I ìn kóng, Í-lī-a kó-jiân lâi, bueh hing-khí bān-hāng sū;
12, tān-sī guá kā lín kóng, Í-lī-a í-king lâi, iā in m̄ bat i; tsiàu in só͘ ài lâi khuán-thāi i; tshin-tshiūⁿ án-ne Jîn-tsú iā bueh siū in ê hām-hāi.
13, Bûn-tô͘ tsiah ē hiáu-tit I só͘ kā in kóng ê, sī tsí kiâⁿ sé-lé Iok-hān.
14, Í-king kàu tsìng lâng hia, ū tsi̍t lâng tsiū-kūn I, kuī I kóng,
15, Tsú ah, lîn-bín guá ê kiáⁿ, in-uī i iûⁿ-hîn tsin kan-khó͘; ta̍uh-ta̍uh pua̍h-lo̍h hué, ta̍uh-ta̍uh pua̍h-lo̍h tsuí.
16, Guá tshuā i tsiū-kūn lí ê bûn-tô͘, in buē-uē i-hó i.
17, Iâ-so͘ ìn kóng, Hàiⁿ ah! m̄ sìn koh puē-gi̍k ê sè-tāi ah, guá bueh kap lín tuà juā kú? guá bueh thun-lún lín juā kú? tuà i lâi tsia tsiū-kūn guá.
18, Iâ-so͘ tsik-pī kuí; kuí tsiū tuì i tshut; tuì hit tsi̍t sî gín-ná tsiū hó.
19, Hit sî bûn-tô͘ thau-thau-á tsiū-kūn Iâ-so͘ kóng, Guán tsáiⁿ-iūⁿ bē kuáⁿ i?
20, I kā in kóng, Sī uī-tio̍h lín ê sió sìn; guá si̍t-tsāi kā lín kóng, Lín nā ū sìn tshin-tshiūⁿ tsi̍t lia̍p kuà-tshài tsí, lín tsiū bueh kā tsit-ê suaⁿ kóng, Tuì tsia suá khì hia, iā bueh suá khì; koh lín teh-bueh bô tsi̍t hāng buē.
21,22, In iáu tuà Ka-lī-lī-síng ê sî, Iâ-so͘ kā bûn-tô͘ kóng, Jîn-tsú bueh siū sàng-kau tī lâng ê tshiú.
23, In bueh thâi I, tē saⁿ ji̍t koh-ua̍h. Bûn-tô͘ tsin iu-būn.
24, In kàu Ka-pik-lông, ū siu ting-sè ê tsiū-kūn Pí-tik, kóng, Lín sian-siⁿ kiám bô la̍p ting-sè mah? i kóng, Ū.
25, Í-king ji̍p tshù, Iâ-so͘ tāi-sing kā i kóng, Se-bûn ah, lí phah-sǹg tsáiⁿ-iūⁿ? Sè-tsiūⁿ tsiah-ê ông, tuì siáⁿ-lâng siu hiòng kap thiu ting-sè? sī tuì ka-kī ê kiáⁿ-jî, á-sī tuì guā-bīn lâng ah?
26, I tsi̍t-ē kóng, Tuì guā-bīn lâng. Iâ-so͘ tsiū kā i kóng, Tān-sī án-ne, tsiū kiáⁿ-jî thang m̄ bián.
27, Tān-sī bián-tì that-gāi in, lí khì hái-ni̍h pàng tiò, lia̍h tāi-sing tsiūⁿ-tiò ê hî, khui i ê tshuì, bueh tit-tio̍h gûn tsi̍t ê; the̍h-lâi, uī-tio̍h guá kap lí la̍p hō͘ in.