《巴克禮普世版聖經（試讀本）》

 | | | 轉寄

巴克禮普世版（試讀本） 歌羅西書第一章

作者 巴克禮普世版小組 2015.11.15

1 Guá Pó-lô hōng Siōng-Tsú ê tsí-ì tsò Ki-tok Iâ-so͘ ê sù-tô͘, kah Thê-mô͘-thài hiaⁿ-tī, 2 siá phue hō͘ tuà tī Ko-lô-se ê sìn-tô͘, tsiū-sī kah Ki-tok kiat-liân ê tiong-si̍t ê hiaⁿ-tī tsí-muē: Guān lán ê Thiⁿ-Pē Siōng-Tsú siúⁿ-sù lín un-tián kah pîng-an.

Kám-un ê Kî-tó
3 Guán thè lín kî-tó ê sî, siông-siông kám-siā Siōng-Tsú, tsiū-sī lán ê Tsú Iâ-so͘ Ki-tok ê Thiⁿ-Pē, 4 In-uī guán ū thiaⁿ-tio̍h lín tuì Ki-tok Iâ-so͘ ū sìn-sim, koh tuì só͘-ū ê sìn-tô͘ ū thiàⁿ-sim. 5 Khí-tsho͘ hok-im tsin-tō thuân hō͘ lín ê sî, lín thiaⁿ tsit-ê hok-im ū tuà-lâi khǹg tī thiⁿ-tíng ê ǹg-bāng. 6 Tsit-ê hok-im thuân kàu lín hia, lín koh tsin-tsiàⁿ jīn-bat Siōng-Tsú tsin-si̍t ê un-tián. Kah hit ji̍t khí ê tsîng-hîng kāng-khuán, tsit-ê hok-im tsit-má mā thuân kàu tsuân sè-kài, tng teh kiat kué-tsí, mā ná tuā tsâng. 7 Lín tuì Í-pa-hut só͘ ha̍k-si̍p ê hok-im, i sī kah guán pêⁿ-pêⁿ tsò lô͘-po̍k ê, mā uī-tio̍h guán teh tsò Ki-tok tiong-si̍t ê tshe-īng, 8 i mā tuì guán kóng-khí Sìng-Sîn hō͘ lín ū thiàⁿ-sim ê tāi-tsì. 9 Só͘-í, guán thiaⁿ-tio̍h lín ê siau-sit liáu-āu, tsiū kè-sio̍k uī-tio̍h lín kî-tó, put-sî khún-kiû Siōng-Tsú hō͘ lín ē-tàng tuì Sìng-Sîn tit-tio̍h ta̍k-tsióng ê tì-huī kah lí-kái, tshiong-hun bîng-pi̍k I ê tsí-ì. 10 Koh hō͘ lín ê kiâⁿ-ta̍h tsiàu Tsú só͘ ài, ta̍k-hāng tāi-tsì lóng hō͘ I huaⁿ-hí, tī ta̍k-hāng hó-sū tíng-bīn kiat hó kué-tsí, koh jīn-bat Siōng-Tsú ná kú ná tsìn-pō͘. 11 Guān lín tuì I îng-iāu ê tāi-lîng lâi tit-tio̍h khuì-la̍t, kian-kiông khí-lâi, hō͘ lín ū nāi-sim lâi jím-siū it-tshè. 12 Koh tio̍h kám-siā Thiⁿ-Pē, in-uī I hō͘ lán ū tsu-keh thang hun-hióng I uī sìn-tô͘ tī kng-bîng ê kok-tō͘ só͘ pó-liû ê hok-khì. 13 I kiù lán thuat-lī o͘-àm ê kuân-sè, kā lán puaⁿ-suá ji̍p-khì I só͘ thiàⁿ ê Kiáⁿ ê kok-tō͘. 14 Lán tuì I ê Kiáⁿ tit-tio̍h kiù-sio̍k, tsuē tit-tio̍h sià-bián.

Ki-tok ê Kang-tsok
15 Ki-tok sī khuàⁿ bē-tio̍h ê Siōng-Tsú ê hîng-siōng: I sī tuā-kiáⁿ, pí it-tshè siū-tsō-bu̍t khah tsá tsûn-tsāi. 16 In-uī Siōng-Tsú thong-kuè I lâi tshòng-tsō bān-bu̍t, tsiū-sī tī thiⁿ-tíng kah tī tē-tsiūⁿ ê, khuàⁿ ē-tio̍h kah khuàⁿ bē-tio̍h-.ê, lîng-kài tsē ông-uī ê kah thóng-tī-tsiá, tsip-tsìng-tsiá kah tsiáng-kuân-tsiá. Siōng-Tsú thong-kuè I, mā sī uī-tio̍h I tshòng-tsō bān-bu̍t. 17 Iáu-buē ū bān-bu̍t í-tsîng I to̍h tsûn-tsāi, bān-bu̍t kah I kiat-liân kah tsin hó-sè. 18 Kàu-huē sī I ê sing-khu, I sī kàu-huē ê thâu. I sī guân-khí-thâu, I sī tuā-kiáⁿ. Siōng-Tsú hō͘ I thâu-tsi̍t-ê tuì sí-lâng tiong koh-ua̍h, hō͘ I tī bān-bu̍t tiong tsiâⁿ-tsò tē-it. 19 In-uī Siōng-Tsú tsiàu ka-kī ê tsí-ì, hō͘ Kiáⁿ tshiong-muá I hong-sīng ê ti̍k-tsit. 20 Siōng-Tsú thong-kuè I ê Kiáⁿ tī si̍p-jī-kè ê hueh lâi tshiok-sîng hô-pîng, hō͘ bān-bu̍t kah I pún-sin koh-tsài hô-hó. Bô-lūn sī tē-tsiūⁿ ê á-sī tī thiⁿ-tíng ê lóng kui-sio̍k I. 21 Lín ū tsi̍t-sî kah Siōng-Tsú keh-tn̄g kuan-hē, sim-lāi kah I tuì-ti̍k, tsò pháiⁿ tāi-tsì. 22 M̄-koh tsit-má Siōng-Tsú thong-kuè I ê Kiáⁿ jio̍k-thé ê sí, í-king hō͘ lín koh-tsài kah I hô-hó, tsiâⁿ-tsò sìng-kiat, bô khuat-tiám koh bô thang hiâm ê tsè-mi̍h hiàn tī I ê bīn-tsîng. 23 Lín tio̍h kian-tshî sìn-sim, kian-kò͘ khiā tsāi, hō͘ lín thiaⁿ-tio̍h hok-im só͘ tit-tio̍h ê ǹg-bāng bô iô-tāng. Tsit-ê hok-im í-king thuân hō͘ thiⁿ-ē muí tsi̍t-ê lâng. Guá Pó-lô mā sī uī-tio̍h tsit-ê hok-im lâi teh tsò lô͘-po̍k.

Pó-lô Sū-hōng Kàu-huē
24 Taⁿ guá uī-tio̍h lín siū tsiah-ê kan-khó͘, kám-kak tsin huaⁿ-hí. Guá jio̍k-thé siū-khó͘ sī uī-tio̍h Ki-tok ê sing-khu, tsiū-sī kàu-huē, teh siū iáu-buē tsīn ê khó͘-lān. 25 Guá siū siat-li̍p tsò kàu-huē ê lô͘-po̍k, tsiàu Siōng-Tsú uī-tio̍h lín só͘ kau-tài guá ê tsit-hūn, lâi tsiong Siōng-Tsú ê sìn-sit thuân-khui. 26 Tsit-ê sìn-sit sī bān-sè-tāi í-lâi tuì jîn-luī ún-ba̍t ê ò-biāu, taⁿ í-king tuì I ê sìn-tô͘ hián-bîng. 27 Siōng-Tsú ài beh hō͘ in tsai, uī-tio̍h Guā-pang-lâng tsún-pī tsit-ê ò-biāu ū juā-ni̍h hong-sīng koh îng-iāu, tsiū-sī Ki-tok tiàm-tī lín lāi-bīn, tsò lín hióng-siū Siōng-Tsú îng-iāu ê ǹg-bāng. 28 Só͘-í, guán tuì só͘-ū ê lâng suan-iông Ki-tok, īng ta̍k-tsióng ê tì-huī lâi khó͘-khǹg ta̍k-lâng, kà-sī ta̍k-lâng, sī beh hō͘ in kah Ki-tok kiat-liân lâi tsiâⁿ-tsò tsi̍t-ê uân-tsuân ê lâng, thang ín-tshuā in khì-kàu Siōng-Tsú ê bīn-tsîng. 29 Uī-tio̍h tsit-ê bo̍k-tik, guá khò Ki-tok tī guá lāi-bīn ūn-hîng ê tuā lîng-li̍k, tsīn-la̍t teh phah-piàⁿ.