《巴克禮普世版聖經（試讀本）》

 | | | 轉寄

巴克禮普世版（試讀本） 歌羅西書第二章

作者 巴克禮普世版小組 2015.11.22

1 Guá ài lín tsai, guá uī-tio̍h lín kah Ló-tí-ka-lâng í-ki̍p hiah-ê m̄-bat kìⁿ-kuè guá ê bīn ê lâng, guá sī juā-ni̍h-á teh phah-piàⁿ. 2 Guá ê bo̍k-tik sī beh hō͘ in ê sim tit-tio̍h kó͘-lē, īng thiàⁿ-sim lâi hō͘-siōng kiat-liân, īng hong-hù ê lí-kái-li̍k sán-sing kàu-gia̍h ê sìn-sim, lâi khak-si̍t jīn-bat Siōng-Tsú ê ò-biāu, tsiū-sī Ki-tok pún-sin. 3 Tī Ki-tok ê lāi-bīn ū ún-tsông tì-huī kah tì-sik it-tshè ê pó-puè. 4 Guá án-ne kóng sī uī-tio̍h beh hō͘ lín bián siū hua-giân khá-gí ê bê-hi̍k. 5 Sui-jiân guá bô tī lín hia, sim-sîn khiok kah lín tsò-hué. Guá khuàⁿ-kìⁿ lín ê sing-ua̍h kui-kui kí-kí, koh kian-kò͘ sìn-khò Ki-tok, kám-kak hui-siông huaⁿ-hí.

Kah Ki-tok Kiat-liân Lâi Tit-tio̍h Uân-tsíng ê Ua̍h-miā
6 Lín kì-jiân tsiap-la̍p Tsú Ki-tok Iâ-so͘, tsiū tio̍h kah I kiat-liân lâi kiâⁿ-ta̍h. 7 Tsiàu lín só͘ siū ê kà-sī, tìng kun tī Ki-tok ê lāi-bīn, put-tuān sing-tióng, hō͘ sìn-sim ē ná kian-kò͘, muá-sim kám-siā. 8 Tio̍h kín-sīn tsiah bē hō͘ lâng īng khang-hi ê tiat-ha̍k kā lín bê-hi̍k, in-uī hiah-ê lūn-suat sī tsiàu lâng ê thuân-suat kah ú-tiū khòng-tsè lâng ê siâ-lîng, m̄-sī tsiàu Ki-tok. 9 In-uī Siōng-Tsú uân-tsíng ê sîn-sìng lóng kū-thé tiàm-tī Ki-tok lāi-bīn. 10 Lín kah I kiat-liân tsiū tit-tio̍h hong-sīng ê ua̍h-miā. I sī tsóng-thâu, tshiau-ua̍t lîng-kài ê tsip-tsìng-tsiá kah tsiáng-kuân-tsiá. 11 Lín mā í-king tsiap-siū kah Ki-tok kiat-liân ê kat-lé, m̄-sī īng lâng ê tshiú lâi kiâⁿ ê kat-lé, sī thong-kuè Ki-tok ê kat-lé hō͘ lín thuat-lī jio̍k-thé ê tsuē-sìng. 12 In-uī lin2nia2-siū sé-lé ê sî, lín ū kah Ki-tok tâng-tsê bâi-tsòng, koh tuì sé-lé, thong-kuè lín sìn Siōng-Tsú hō͘ Ki-tok tuì sí-lâng tiong koh-ua̍h ê tuā kuân-lîng, hō͘ lín mā kah Ki-tok tâng-tsê ua̍h khí-lâi. 13 Tsîng in-uī huān-tsuē kah jio̍k-thé bô siū kat-lé hit-ê lín í-king sí-khì, taⁿ Siōng-Tsú hō͘ lín kah Ki-tok tsò-hué koh-ua̍h. Siōng-Tsú í-king sià-bián lán lóng-tsóng ê tsuē-kuà, 14 tshat-siau tuì lán put-lī koh tī lu̍t-hua̍t siōng sok-pa̍k lán ê tsuē-tsè kì-lo̍k, kā i tìng tī si̍p-jī-kè-tíng, lâi kā i huì-tû tiāu. 15 Tī si̍p-jī-kè-tíng, Ki-tok tshin-tsū kái-tû hiah-ê lîng-kài ê tsip-tsìng-tsiá kah tsiáng-kuân-tsiá, tī Ki-tok khái-suân ê hâng-lia̍t tiong, hō͘ in tsò tsiàn-huān lâi kong-khai sī-tsiòng. 16 Só͘-í, m̄-thang tī lim-tsia̍h, siú tseh-kî, tshe-it, á-sī An-hioh-ji̍t ê būn-tê hō͘ lâng phue-phîng. 17 Tsiah-ê lóng sī tsiong-lâi ê tāi-tsì ê iáⁿ, si̍t-thé sī Ki-tok. 18 M̄-thang siū hiah-ê thiau-kang khiam-pi lâi kìng-pài thiⁿ-sài ê lâng íng-hióng suah hō͘ lín sit-khì ing-kai tit-tio̍h ê pò-siúⁿ. Hiah-ê lâng uá-khò huàn-sióng, tsiàu in jio̍k-thé ê sim-su, kan-taⁿ teh phòng-hong, 19 bô kè-sio̍k kah tsò-thâu ê Ki-tok kiat-liân. Tsuân sing-khu tuì tsit-ê Thâu tit-tio̍h îng-ióng, tsiah-ê tsat kah kin kiat-liân khí-lâi, tsiàu Siōng-Tsú ê tsí-ì lâi tióng-sîng.

Kah Ki-tok Tâng-sí Tâng-ua̍h
20 Lín kì-jiân kah Ki-tok tâng-tsê sí, thuat-lī tsi-phuè ú-tiū ê siâ-lîng, ná-ē iáu-koh tshin-tshiūⁿ sio̍k tsit sè-kan ê lâng teh sing-ua̍h? Lín ná-ē teh siú tsiah-ê kui-lē? 21 tshin-tshiūⁿ kóng, "M̄-thang the̍h tsit-ê", "M̄-thang tsia̍h hit-ê", "M̄-thang bong hit-ê". 22 Tsiah-ê tsí-put-kò sī lâng tsō tshut-lâi ê kàu-kui kah kà-sī, īng-liáu tsiū bô lō͘-īng. 23 Piáu-bīn khuàⁿ khí-lâi, pài thiⁿ-sài, ké khiam-pi, gi̍k-thāi ka-kī ê sing-khu, kah-ná sī ū tì-huī, kî-si̍t tuì khòng-tsè jio̍k-thé ê tsîng-io̍k lóng bô lō͘-īng.