《巴克禮普世版聖經（試讀本）》

 | | | 轉寄

巴克禮普世版（試讀本） 歌羅西書第三章

作者 巴克禮普世版小組 2015.11.29

1 Kì-jiân lín í-king kah Ki-tok tâng-tsê koh-ua̍h, tsiū tio̍h kiû tī thiⁿ-tíng ê sū. Ki-tok tī hia, tsē tī Siōng-Tsú ê tuā-pîng. 2 Lín tio̍h tì-ì thiⁿ-tíng ê tāi-tsì, m̄-thang tì-ì tē-tsiūⁿ ê tāi-tsì. 3 In-uī lín í-king sí, lín ê ua̍h-miā kah Ki-tok tsò-hué ún-tsông tī Siōng-Tsú lāi-bīn. 4 Ki-tok sī lán ê ua̍h-miā. I hián-hiān ê sî, lín mā ē kah I tsò-hué hián-hiān lâi hun-hióng I ê îng-iāu.

Kū-ê Kah Sin-ê Ua̍h-miā
5 Só͘-í lín tio̍h huí-bia̍t lín tī tē-tsiūⁿ ê io̍k-bōng, tsiū-sī kan-îm, ù-uè, siâ-ok, pháiⁿ ê su-io̍k kah tham-sim. Tham-sim sī tsi̍t-tsióng ê ngó͘-siōng tsông-pài. 6 In-uī tuì tsiah-ê tāi-tsì, Siōng-Tsú ē tuì puē-gi̍k I ê lâng tuā siū-khì. 7 Lín í-tsîng tī tsiah-ê io̍k-bōng tiong teh sing-ua̍h ê sî, kiâⁿ-ta̍h mā siū hiah-ê io̍k-bōng tsi-phuè. 8 M̄-koh tsit-má lín tio̍h thiat-té khì-sak uàn-hūn, siū-khì, ok-to̍k, huí-pòng kah kóng lah-sap-uē. 9 M̄-thang kóng pe̍h-tsha̍t sio-phiàn, in-uī lín í-king hòng-khì kū-ê tsò-lâng kah hîng-uî, 10 tsiâⁿ-tsò tsi̍t-ê sin-ê lâng. Tshòng-tsō-tsú tsiàu ka-kī ê hîng-siōng kè-sio̍k teh kā tsit-ê sin-ê lâng uāⁿ-sin, lâi hō͘ i ē-tàng thiat-té jīn-bat Siōng-Tsú. 11 Án-ne tsiū bô koh hun-pia̍t Hi-lia̍p-lâng á-sī Iû-thài-lâng, siū kat-lé á-sī bô siū kat-lé, iá-bân ê lâng, bī-khai-huà ê lâng, tsò lô͘-po̍k ê á-sī tsū-iû ê, m̄-koh Ki-tok sī it-tshè, mā tī it-tshè ê lāi-bīn. 12 Lín kì-jiân sī Siōng-Tsú só͘ kíng-suán ê tsú-bîn, sī sìng-kiat koh tit-tio̍h I ê thiàⁿ ê lâng, tio̍h īng liân-bín, jîn-tsû, khiam-pi, un-jiû kah nāi-sim tsò saⁿ lâi tshīng. 13 Lín tiong-kan nā ū kiù-hun, tio̍h hō͘-siōng khuan-iông, hō͘-siōng sià-bián, tshin-tshiūⁿ Tsú ū sià-bián lín, lín mā tio̍h án-ne hō͘-siōng sià-bián. 14 Pí tsiah-ê koh-khah iàu-kín ê, tio̍h ài-ū thiàⁿ-sim, in-uī thiàⁿ-sim ē kiat-liân it-tshè, hō͘ lâng uân-tsuân hô-hó. 15 Tio̍h hō͘ Ki-tok só͘ siúⁿ-sù ê hô-pîng tī lín ê sim-lāi tsò tsú. Uī-tio̍h beh hō͘ lín ū tsit-ê hô-pîng, Siōng-Tsú suán-tiàu lín lâi tsiâⁿ-tsò tsi̍t-thé. Lín tio̍h kám-siā Siōng-Tsú. 16 Tio̍h hō͘ Ki-tok ê tō-lí tshiong-muá tī lín ê sim-lāi. Tio̍h īng ta̍k-tsióng ê tì-huī hō͘-siōng kà-sī, hō͘-siōng khuàn-bián. Tio̍h tshiùⁿ si-phian, sìng-si kah lîng-kua, tuì sim-té tshut o-ló ê siaⁿ lâi kám-siā Siōng-Tsú. 17 Lín bô-lūn kóng sím-mi̍h á-sī tsò sím-mi̍h, lóng tio̍h tsiàu Tsú Iâ-so͘ ê tsí-ì lâi tsò, thong-kuè I lâi kám-siā Thiⁿ-Pē Siōng-Tsú.

Sin Sèⁿ-miā Tiong ê Jîn-tsè Kuan-hē
18 Tsò lâng ê bó͘ tio̍h sūn-ho̍k i ê tiōng-hu. Tse sī Ki-tok-tô͘ ê pún-hūn. 19 Tsò tiōng-hu ê tio̍h thiàⁿ lí ê bó͘, m̄-thang kā i pháiⁿ khuán-thāi. 20 Tsò kiáⁿ-jî ê tio̍h ta̍k-hāng tāi-tsì sūn-ho̍k pē-bú, in-uī tse sī Tsú só͘ huaⁿ-hí-.ê. 21 Tsò lāu-pē ê lâng m̄-thang kik kiáⁿ-jî siū-khì, tsiah bē hō͘ in hue-sim sit-tsì. 22 Tsuè lô͘-po̍k ê lâng tio̍h ta̍k-hāng tāi-tsì sūn-ho̍k hiah-ê sè-tsiūⁿ ê tsú-lâng. M̄-sī uī-tio̍h beh hō͘ in huaⁿ-hí phah-piàⁿ tsò, in-uī lín sī kìng-uì Siōng-Tsú ê lâng, tio̍h sîng-sim sîng-ì lâi tsò. 23 Lín bô-lūn tsò sím-mi̍h, tio̍h tsīn-sim lâi tsò, ná tshin-tshiūⁿ teh ho̍k-sāi Tsú, m̄-sī teh ho̍k-sāi lâng. 24 Lín tio̍h ē-kì-tit, Tsú ē kā lín pò-siúⁿ, hō͘ lín tuì I tit-tio̍h sán-gia̍p. Lín sī teh ho̍k-sāi Tsú Ki-tok. 25 Tsò put-gī ê lâng ē siū put-gī ê pò-ìng, in-uī Siōng-Tsú īng kāng tsi̍t-ê phiau-tsún tuì-thāi muí tsi̍t-ê lâng.