《巴克禮普世版聖經（試讀本）》

 | | | 轉寄

巴克禮普世版（試讀本） 歌羅西書第四章

作者 巴克禮普世版小組 2015.12.06

1 Tsò tsú-lâng ê, tio̍h īng tsìng-gī kah kong-pîng tuì-thāi lín ê lô͘-po̍k, tio̍h ē-kì-tit lín tī thiⁿ-tíng mā ū tsi̍t-ê Tsú.

Khuàn-bián
2 Tio̍h put-tuān tsuan-sim kî-tó, kî-tó ê sî tio̍h kíng-síng, tio̍h kám-siā Siōng-Tsú. 3 Mā tio̍h uī guán kî-tó, kî-kiû Siōng-Tsú koh hō͘ guán ū thuân tō-lí ê ki-huē, thang suan-iông Ki-tok ê ò-biāu. Guá uī-tio̍h tsit-ê tāi-tsì tsiah teh tsē-kaⁿ. 4 Tshiáⁿ uī guá kî-tó, hō͘ guá ē-tàng tsiong ing-kai kóng ê ò-biāu lóng kóng tshing-tshó. 5 Tio̍h pá-ak ki-huē, tuì-thāi bī-sìn-tsiá tio̍h ū tì-huī. 6 Kóng-uē tio̍h un-hô, tshin-tshiūⁿ īng iâm tiâu-bī, tio̍h liáu-kái án-tsuáⁿ lâi ìn-tap muí tsi̍t-ê lâng.

Tsuè-āu ê Tshíng-an
7 Guá tī tsia ê tāi-tsì, guá só͘ thiàⁿ ê hiaⁿ-tī Tshui-ki-kó͘ ē kā lín kóng, i kah guá tī Tsú ê kang-tsok tsò-hué tiong-si̍t kang-tsok, lóng sī Tsú ê lô͘-po̍k. 8 In-uī án-ne, guá thiau-kang tshe-phài i khì lín hia, hō͘ lín tsai guán tī tsia ê tsîng-hîng, thang hō͘ lín ê sim tit-tio̍h kó͘-lē. 9 O-nî-se-bó͘ ē kah i tsò-hué khì, i sī tiong-si̍t thang thiàⁿ ê hiaⁿ-tī, mā sī lín hia ê lâng. In ē tsiong guá tī tsia ê tāi-tsì lóng kā lín pò-kò. 10 Kah guá tsò-hué tsē-kaⁿ ê A-lí-ta̍t-kó͘ kah Pa-ná-pa ê piáu-sió-tī Má-khó, beh kā lín tshíng-an. Kuan-hē Má-khó, guá í-king kā lín huan-hù kuè. I nā lâi-kàu lín hia, tshiáⁿ lín tio̍h kā i tsiap-la̍p. 11 Hit-ê kiò-tsò Iû-su-to͘ ê Iâ-so͘ mā kā lín tshíng-an. Tī Iû-thài-lâng ê sìn-tô͘ tiong-kan, kan-taⁿ tíng-bīn tsit saⁿ-uī uī-tio̍h Siōng-Tsú ê Kok-tō͘ kah guá tâng-kang, in hō͘ guá tit-tio̍h tsin-tuā ê an-uì. 12 Tuì lín hia lâi, Ki-tok Iâ-so͘ ê lô͘-po̍k Í-pa-hut beh kā lín tshíng-an, i siông-siông uī lín pik-tshiat kî-tó, kiû Siōng-Tsú hō͘ lín khiā-tsāi, tshiong-muá khak-sìn, uân-tsuân sūn-ho̍k Siōng-Tsú ê tsí-ì. 13 Guá thang tsìng-bîng, i khak-si̍t uī-tio̍h lín kah tī Ló-tí-ka í-ki̍p Hi-lah-pho-li̍p ê lâng lô-khó͘ tsò-kang. 14 Guá tshin-ài ê Lō͘-ka i-sing kah Tí-má beh kā lín tshíng-an. 15 Tshiáⁿ thè guá kā tī Ló-tí-ka hiah-ê hiaⁿ-tī tsí-muē kah Lîng-huat, í-ki̍p tī in tau teh tsū-huē ê sìn-tô͘ tshíng-an. 16 Tsit-ê phue tha̍k-liáu, tio̍h siat-huat tsuán hō͘ Ló-tí-ka-lâng ê kàu-huē tha̍k. Lín mā tio̍h tha̍k tuì Ló-tí-ka tsuán-lâi ê phue. 17 Tio̍h kā A-ki-pò͘ kóng, "Tio̍h kín-sīn lâi tsīn lí tuì Tsú só͘ niá-siū ê tsit-hūn." 18 Guá Pó-lô tshin-pit siá-phue kā lín tshíng-an. Lín tio̍h siàu-liām guá tsit-má teh tsē-kaⁿ. Guān Siōng-Tsú ê un-tián kah lín tông-tsāi!