《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第一章

作者 巴克禮普世版小組 2015.12.13

1 Pó-lô, Se-lah kah Thê-mô͘-thài siá phue hō͘ Thiap-sat-lô-nî-ka-lâng sio̍k Thiⁿ-Pē Siōng-Tsú kah Tsú Iâ-so͘ Ki-tok ê kàu-huē. Guān lín tit-tio̍h un-tián kah pîng-an!

Thiap-sat-lô-nî-ka-lâng ê Sing-ua̍h Kah Sìn-sim
2 Guán siông-siông uī-tio̍h lín tāi-ke kám-siā Siōng-Tsú, tī kî-tó tiong put-sî to siàu-liām lín. 3 Guán tī lán ê Thiⁿ-Pē Siōng-Tsú ê bīn-tsîng siàu-liām lín uá-khò sìn-sim só͘ tsò ê kang, tshut-tī thiàⁿ-sim só͘ hù-tshut ê lô-khó͘, koh ū nāi-sim lâi gióng-bōng Tsú Iâ-so͘ Ki-tok. 4 Hiaⁿ-tī tsí-muē ah, guán tsai lín sī Siōng-Tsú só͘ thiàⁿ koh siū kíng-suán ê kiáⁿ-jî. 5 In-uī guán thuân hok-im khì-kàu lín hia, m̄-sī kan-taⁿ uá-khò giân-gí, mā khò Siōng-Tsú ê tuā kuân-lîng kah Sìng-Sîn, í-ki̍p tuì hok-im ê khak-sìn. Lín lóng tsai guán tī lín hia ê sî án-tsuáⁿ. He lóng sī uī-tio̍h lín ê lī-ik. 6 Lín ū o̍h guán mā o̍h Tsú, sui-jiân tú-tio̍h tsin-tsē khó͘-lān, iáu-koh īng Sìng-Sîn só͘ siúⁿ-sù ê huaⁿ-hí, lâi niá-siū sìn-sit. 7 Tsiū án-ne, lín tsiâⁿ-tsò Má-kî-tùn kah A-kai-a só͘-ū sìn-tô͘ ê bô͘-huān. 8 In-uī Tsú ê sìn-sit sī tuì lín thuân-tshut, m̄-nā tī Má-kî-tùn kah A-kai-a, lín ǹg Siōng-Tsú ê sìn-gióng í-king thuân khì-kàu ta̍k só͘-tsāi, só͘-í m̄-bián guán koh kóng sím-mi̍h. 9 In-uī hia ê lâng lóng teh thuân kóng, guán khì lín hia ê sî án-tsuáⁿ siū lín ê hó khuán-thāi, koh lín án-tsuáⁿ lī-khui ngó͘-siōng, kui-hiòng Siōng-Tsú, lâi ho̍k-sāi ua̍h koh tsin ê Siōng-Tsú. 10 Koh thìng-hāu I ê Kiáⁿ tuì thiⁿ kàng-lîm. Siōng-Tsú hō͘ I ê Kiáⁿ Iâ-so͘ tuì sí-lâng tiong koh-ua̍h, lâi tsín-kiù lán thuat-lī tsiong-lâi ê sím-phuàⁿ.