《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第二章

作者 巴克禮普世版小組 2015.12.20

Pó-lô Tī Thiap-sat-lô-nî-ka ê Kang-tsok
1 Hiaⁿ-tī tsí-muē ah, lín ka-kī tsai, guán tsîng khì lín hia hóng-būn m̄-sī bô hāu-kó. 2 Lín mā lóng tsai, guán khì lín hia tsìn-tsîng tī Hui-li̍p-pí sui-jiân tú-tio̍h pik-hāi kah bú-jio̍k, iáu-koh uá-khò lán ê Siōng-Tsú, hó-táⁿ bīn-tuì thiau-tsiàn, kā Siōng-Tsú ê hok-im thuân hō͘ lín. 3 Guán ê khuàn-bián m̄-sī tshut-tī tshò-gō͘ á-sī put-liông ê tōng-ki, mā m̄-sī kan-tsà teh beh phiàn-lâng. 4 Si̍t-tsè-siōng, Siōng-Tsú khuàⁿ guán ē-kham-tit, tsiah tsiong hok-im kau-thok guán, guán tsiū tsiàu án-ne lâi thuân. M̄-sī beh hō͘ lâng huaⁿ-hí, sī beh hō͘ kàm-tshat lán lāi-sim ê Siōng-Tsú huaⁿ-hí. 5 In-uī lín tsai, guán lóng m̄-bat tuì lín kóng phô͘-tháⁿ ê uē, mā m̄-bat ū tham-sim ê liām-thâu. Tse Siōng-Tsú ē-tàng kā guán tsò-tsìng. 6 Guán tsò Ki-tok ê sù-tô͘, sui-jiân ē-tàng iau-kiû lâng tsun-kìng guán, m̄-koh guán m̄-bat tuì lín á-sī pa̍t-lâng iau-kiû kui îng-kng hō͘ guán. 7 M̄-koh guán tī lín tiong-kan ê sî un-jiû tuì-thāi lín, tshin-tshiūⁿ lāu-bú teh ióng-tshī ka-kī ê kiáⁿ-jî. 8 Guán án-ne thiàⁿ-sioh lín, m̄-nā kah lín hun-hióng Siōng-Tsú ê hok-im, liân ka-kī ê sèⁿ-miā mā huaⁿ-hí hō͘ lín, in-uī lín sī guán só͘ thiàⁿ-.ê. 9 Hiaⁿ-tī tsí-muē ah, lín tio̍h ē-kì-tit guán ê lô-khó͘ kang-tsok. Guán thuân Siōng-Tsú ê hok-im hō͘ lín ê sî, uī-tio̍h bô ài ke-thiⁿ lín jīm-hô lâng ê hū-tam, guán mê-ji̍t tsò-kang lâi î-tshî guán ê sing-ua̍h huì-iōng. 10 Lín kah Siōng-Tsú ē-tàng uī guán tsò-tsìng, tuì lín tsiah-ê sìn-tô͘, guán ê tsò-lâng sī juā-ni̍h-á sìng-kiat, kong-gī, bô thang hiâm. 11 Lín tsai guán tuì-thāi lín ta̍k-lâng tshin-tshiūⁿ lāu-pē teh tuì-thāi ka-kī ê kiáⁿ-jî. 12 Guán kó͘-lē lín, an-uì lín, sī ài beh hō͘ lín ê kiâⁿ-ta̍h ē-tàng hû-ha̍p Siōng-Tsú ê tsí-ì. I ū ho͘-tiàu lín tsìn-ji̍p I ê kok-tō͘ kah îng-iāu. 13 Guán mā uī-tio̍h tsit-ê iân-kò͘ kám-siā Siōng-Tsú bô suah, in-uī lín tuì guán niá-siū Siōng-Tsú ê sìn-sit ê sî, lín bô kā i siūⁿ-tsò sī lâng ê uē, tian-tò tòng-tsò khak-si̍t sī Siōng-Tsú ê sìn-sit. Tsit-ê sìn-sit tī lín sìn-tô͘ tiong-kan teh khí tsok-iōng. 14 Hiaⁿ-tī tsí-muē ah, Iû-thài tē-khu sio̍k Ki-tok Iâ-so͘ ê Siōng-Tsú ê kàu-huē ū siū tông-pau ê pik-hāi. Lín siū-tio̍h ka-kī tông-pau ê pik-hāi, tú tshin-tshiūⁿ in ū siū-tio̍h Iû-thài-lâng ê pik-hāi. 15 Hiah-ê Iû-thài-lâng hāi-sí Tsú Iâ-so͘ kah tsìng sian-ti, mā kā guán khu-tio̍k tshut-kíng. In hō͘ Siōng-Tsú bô huaⁿ-hí, koh kah tsìng-lâng tsò tuì-ti̍k. 16 In sīm-tsí tsó͘-tòng guán thuân tit-kiù ê hok-im hō͘ Guā-pang-lâng. In án-ne kè-sio̍k huān-tsuē, tsuē-ok sî-sî teh kuàn-muá. Siōng-Tsú ê siū-khì tsuè-āu lîm kàu in ê sin-tsiūⁿ.

Pó-lô Ǹg-bāng Koh Khì Hóng-būn In
17 Hiaⁿ-tī tsí-muē ah, guán tsiām-sî kah lín hun-lī, m̄-koh he sī sing-khu ê hun-lī, guán ê sim pīng bô lī-khui lín. Guán juā-ni̍h-á pik-tshiat siūⁿ beh koh kah lín kìⁿ-bīn. 18 Guán tsin ài khì lín hia, guá Pó-lô tsi̍t pái koh tsi̍t pái siūⁿ beh khì, m̄-koh Sat-tàn kā guán tsó͘-tòng. 19 Lán ê Tsú Iâ-so͘ tsài-lîm ê sî, guán ê ǹg-bāng kah huaⁿ-hí, í-ki̍p siōng thang khua-kháu ê sī sím-mi̍h? Kám m̄-sī lín? 20 Lín si̍t-tsāi sī guán ê kong-îng kah huaⁿ-hí.