《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦前書第三章

作者 巴克禮普世版小組 2015.12.27

1 Guán í-king tán kah tòng bē-tiâu, tsiū kuat-tīng kan-taⁿ guán tuà tī Ngá-tián, 2 tshe-phài guán ê hiaⁿ-tī Thê-mô͘-thài khì lín hia, i sī uī-tio̍h Siōng-Tsú lâi thuân Ki-tok ê hok-im tsò guán ê tâng-kang, i thang lâi kian-kò͘ lín ê sìn-sim, koh uī-tio̍h lín ê sìn-sim lâi an-uì lín, 3 hō͘ lín tiong-kan bē in-uī tú-tio̍h khó͘-lān suah sìn-sim iô-tāng. Lín ka-kī mā tsai, lán tú-tio̍h khó͘-lān sī Siōng-Tsú ê tsí-ì só͘ an-pâi. 4 Guán iáu tī lín hia ê sî ū sing kā lín kóng-khí, lán ē tú-tio̍h khó͘-lān, āu-lâi kó-jiân án-ne huat-sing. Tse sī lín só͘ tsai-.ê. 5 Só͘-í guá tán kah tòng bē-tiâu, tsiah tio̍h tshe-phài Thê-mô͘-thài khì lín hia, ài tsai lín ê sìn án-tsuáⁿ tsiah bē hō͘ hit-ê Mô͘-kuí kā lín iú-hi̍k, hō͘ guán ê lô-khó͘ lóng óng-huì khì. 6 Taⁿ Thê-mô͘-thài í-king tuì lín hia tńg-lâi, tsiong lín ê sìn-sim kah thiàⁿ-sim ê hó siau-sit pò guán tsai, koh kóng-khí lín siông-siông teh siàu-liām guán, ài beh kah guán kìⁿ-bīn, tshin-tshiūⁿ guán ài beh kah lín kìⁿ-bīn kāng-khuán. 7 Só͘-í, hiaⁿ-tī tsí-muē ah, guán tī it-tshè ê khùn-khó͘ huān-lān tiong, guán ū tuì lín ê sìn-sim tit-tio̍h an-uì. 8 Lín nā tuì Tsú ū kian-kò͘ ê sìn-sim, guán tsiū kám-kak ū tsin-tsiàⁿ teh ua̍h. 9 Guán tī lán ê Siōng-Tsú ê bīn-tsîng uī-tio̍h lín tsin huaⁿ-hí. Uī-tio̍h tse it-tshè ê huaⁿ-hí, guán tio̍h án-tsuáⁿ lâi kám-siā Siōng-Tsú tsiah ū kàu-gia̍h? 10 Guán mê-ji̍t pik-tshiat kî-tó, ài kìⁿ-tio̍h lín ê bīn, lâi pó͘-tsiok lín ê sìn-sim bô kàu-gia̍h ê só͘-tsāi. 11 Guān lán ê Thiⁿ-Pē Siōng-Tsú kah lán ê Tsú Iâ-so͘ kā guán khui-lō͘ thang khì lín hia. 12 Tshin-tshiūⁿ guán tuì lín ê thiàⁿ-sim ná ke-thiⁿ, guān Tsú hō͘ lín hō͘-siōng ê thiàⁿ-sim kah thiàⁿ tsìng-lâng ê sim mā ji̍t-ji̍t ke-thiⁿ. 13 Án-ne lín ê sìn-sim ē-tàng kian-kò͘, tī lán ê Tsú Iâ-so͘ kah I ê tsìng sìn-tô͘ koh-tsài lâi-lîm ê sî, tī lán ê Thiⁿ-Pē Siōng-Tsú ê bīn-tsîng, ē-tàng sìng-kiat bô thang hiâm.