《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第18章

作者 巴克禮普世版小組 2011.07.31

1, Hit tong-sî, bûn-tô͘ tsiū-kūn Iâ-so͘ kóng, Tī Thian-kok sím-mi̍h lâng tsò tuā?
2, Iâ-so͘ tsiū kiò tsi̍t ê suè-hàn gín-ná, hō͘ i khiā tī in tiong-kan;
3, kóng, Guá si̍t-tsāi kā lín kóng, Lín nā bô ua̍t-tńg lâi tsiâⁿ-tsò tshin-tshiūⁿ suè-hàn gín-ná ê, tsua̍t-tuì bē ji̍p Thian-kok.
4, Só͘-í kìⁿ-nā ka-kī khiam-pi tshin-tshiūⁿ tsit-ê suè-hàn gín-ná ê, i tī Thian-kok tsiū-sī tsò tuā.
5, Kìⁿ-nā tī guá ê miâ tsiap-la̍p tsit tsióng suè-hàn gín-ná ê tsi̍t ê, tsiū-sī tsiap-la̍p guá.
6, Kìⁿ-nā hō͘ tsiah-ê sìn guá ê bî-suè ê tsi̍t ê siū that-gāi, hit lâng lîng-khó͘ ū tuā tsio̍h-bō tiàu i ê ām-kún, thiām tī tshim hái.
7, Tsit sè-kan ū tsai-ē ah, tuì ū that-gāi lâng ê sū; in-uī that-gāi ê sū, bē bián-tit ū; tān-sī that-gāi ê sū tuì siáⁿ-lâng lâi, hit lâng ū tsai-ē.
8, Siat-sú lí tsi̍t tshiú tsi̍t kha that-gāi lí, tsiū tio̍h tsām hiat-ka̍k; lí phuà-siùⁿ á-sī pái-kha ji̍p tī ua̍h sī hó, khah-tit nn̄g tshiú nn̄g kha hiat-lo̍h íng-uán ê hué.
9, Siat-sú lí tsi̍t ba̍k that-gāi lí, tsiū tio̍h iah hiat-ka̍k; lí tsi̍t ba̍k ji̍p tī ua̍h sī hó, khah-tit nn̄g ba̍k hiat-lo̍h tē-gi̍k ê hué.
10, Lín tio̍h kín-sīn, bo̍h-tit khuàⁿ-khin tsiah-ê bî-suè tiong ê tsi̍t-ê; in-uī guá kā lín kóng, In ê thiⁿ-sài tī thiⁿ-tíng, siông-siông kìⁿ guá tī thiⁿ-tíng ê Pē ê bīn.
11,12, Lín phah-sǹg tsáiⁿ-iūⁿ? Lâng nā ū tsi̍t pah tsiah iûⁿ, lâi phah-m̄-kìⁿ tsi̍t tsiah, kiám bô tshiáⁿ pàng-hē hit káu-tsa̍p-káu tsiah, khì suaⁿ-ni̍h tshuē hit tsiah phah-m̄-kìⁿ ê mah?
13, Nā kó-jiân tshuē-tio̍h, guá si̍t-tsāi kā lín kóng, i uī-tio̍h hit tsiah huaⁿ-hí, iâⁿ-kue3kau2-tsa̍p-káu tsiah bô phah-m̄-kìⁿ ê.
14, Án-ne tsiah-ê bî-suè tiong ê tsi̍t-ê tîm-lûn, iā m̄-sī lín tī thiⁿ-tíng ê Pē ê tsí-ì.
15, Siat-sú lí ê hiaⁿ-tī tik-tsuē lí , tsiū tio̍h khì, kan-ta lí kap i tī-teh ê sî, tsí-bîng i ê m̄-tio̍h; i nā thiaⁿ lí, tsiū tit-tio̍h lí ê hiaⁿ-tī.
16, I nā m̄ thiaⁿ, tsiū tio̍h tshuā tsi̍t nn̄g lâng saⁿ-kap khì, īng nn̄g saⁿ lâng ê tshuì tsò kiàn-tsìng, ta̍k kù ē thang tsò pîn-tsún.
17, Nā m̄ khíng thiaⁿ in, tsiū kā kàu-huē kóng; nā koh m̄ khíng thiaⁿ kàu-huē, tsiū tio̍h khuàⁿ i tshin-tshiūⁿ guā-pang lâng, kap thiu-suè ê tsi̍t iūⁿ.
18, Guá si̍t-tsāi kā lín kóng, Huān-nā lín tī tē-ni̍h pa̍k ê, tī thiⁿ-tíng iā bueh pa̍k in; huān-nā lín tī tē-ni̍h tháu ê, tī thiⁿ-tíng iā bueh tháu in.
19, Guá koh kā lín kóng, siat-sú lín tiong-kan nn̄g lâng tī tē-ni̍h bô lūn kiû sím-mi̍h, nā sī tâng-sim, tsiū guá tī thiⁿ-tíng ê Pē bueh kā in tsò tsiâⁿ.
20, In-uī put-lūn sím-mi̍h só͘-tsāi ū nn̄g saⁿ lâng tī guá ê miâ tsū-tsi̍p, guá iā tī in tiong-kan.
21, Hit sî Pí-tik uá-lâi kā I kóng, Tsú ah, guá ê hiaⁿ-tī tik-tsuē guá, guá sià-bián i tio̍h kuí pái? Tio̍h tshit pái mah?
22, Iâ-so͘ kā i kóng, Guá bô kā lí kóng tio̍h kàu tshit pái, tsiū-sī kàu tshit-tsa̍p ê tshit pái.
23, Só͘-í Thian-kok pí-phīng jîn-kun ài bueh kap i ê lô͘-po̍k sǹg-siàu.
24, Khí-thâu sǹg ê sî, ū tshuā tsi̍t-ê khiàm i tshing-bān gûn ê lâi.
25, Kì-jiân bô thang hîng, i ê tsú-lâng bīng-līng tio̍h bē i pún-sin, kap i ê bó͘-kiáⁿ, liân i it-tshè só͘ ū ê, lâi hîng.
26, Hit ê lô͘-po̍k tsiū phak-teh, pài i, kóng, Tsú ah, tio̍h khuan-iông guá, guá bueh lóng-tsóng hîng.
27, Lô͘-po̍k ê tsú-lâng tsiū lîn-bín lâi pàng i, koh sià-bián i ê tsè.
28, Hit ê lô͘-po̍k tshut-khì, tú-tio̍h i tsi̍t-ê tâng tsò lô͘-po̍k ê, khiàm i tsi̍t pah ê gûn-á, tsiū lia̍h i, tshe i ê ām-kún, kóng, Lí só͘ khiàm ê tio̍h hîng.
29, Tâng tsò lô͘-po̍k ê phak-teh, kiû i kóng, Tio̍h khuan-iông guá, guá bueh hîng lí.
30, Tān-sī i m̄ khíng, tsiū khì kā i kuaiⁿ-lo̍h kaⁿ, lâi thìng-hāu i hîng só͘ khiàm ê.
31, Tsiah-ê tâng tsò lô͘-po̍k ê khuàⁿ-tio̍h tsit-ê tāi-tsì, tsin iu-būn, tsiong lóng-tsóng ê sū tuì tsú-lâng kóng bîng.
32, Tuì án-ne i ê tsú-lâng tiàu i lâi, kā i kóng, Pháiⁿ ê lô͘-po̍k ah, in-uī lí tuì guá kiû, guá tsiū tsiong lí só͘ khiàm ê lóng sià-bián.
33, Lí kiám m̄ tio̍h lîn-bín lí tâng tsò lô͘-po̍k ê, tshin-tshiūⁿ guá lîn-bín lí?
34, I ê tsú-lâng siū-khì, tsiong i kau-tāi hîng-tiōng, thìng-hāu i tsuân-pō͘ hîng só͘ khiàm ê.
35, Án-ne lín ta̍k lâng bô īng sim sià-bián lín ê hiaⁿ-tī, tsiū guá ê Thiⁿ Pē iā bueh án-ne khuán-thāi lín.