《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第一章

作者 巴克禮普世版小組 2016.03.20

1 Guá sī Pó-lô, hōng Siōng-Tsú ê tsí-ì tsò Ki-tok Iâ-so͘ ê sù-tô͘, lâi thuân Siōng-Tsú só͘ ìng-ín thong-kuè kah Ki-tok Iâ-so͘ kiat-liân tsiah ē-tàng tit-tio̍h ê ua̍h-miā. 2 Guá siá phue kià hō͘ guá só͘ thiàⁿ ê kiáⁿ Thê-mô͘-thài. Guān lí tuì Thiⁿ-Pē Siōng-Tsú kah lán ê Tsú Ki-tok Iâ-so͘ tit-tio̍h un-tián, liân-bín kah pîng-an.

Kám-siā kah Kó͘-lē
3 Guá kám-siā kah guán lia̍t-tsó͘ kāng-khuán īng sûn-kiat ê liông-sim kìng-pài ê Siōng-Tsú, guá mê-ji̍t tī kî-tó tiong put-sî lóng teh siàu-liām lí bô suah. 4 Guá ē-kì-tit lán lī-pia̍t ê sî lí teh lâu ba̍k-sái, guá tsiū tsin ài koh kah lí kìⁿ-bīn, thang hō͘ guá muá-sim huaⁿ-hí. 5 Guá ē-kì-tit lí ū sûn-tsin ê sìn-gióng, tsiū-sī lí ê guā-má Lô-í kah lí ê lāu-bú Iú-nî-ki khah-tsá to̍h ū-.ê. Guá khak-sìn lí tsit-má mā ū tsit-tsióng ê sìn-gióng. 6 In-uī án-ne, guá kā lí thê-tshéⁿ, tio̍h tsiong guá kā lí huāⁿ-tshiú ê sî Siōng-Tsú hō͘ lí ê un-sù, tshin-tshiūⁿ hō͘ hué koh tiám to̍h khí-lâi. 7 In-uī Siōng-Tsú siúⁿ-sù lán ê Sìng-lîng, m̄-sī hō͘ lán kiaⁿ-hiâⁿ, tian-tò sī hō͘ lán ū khuì-la̍t, thiàⁿ-sim kah siú-kí ê sim-lîng. 8 Só͘-í lán uī Tsú tsò kiàn-tsìng m̄-thang kám-kak kiàn-siàu, mā m̄-thang in-uī guá uī-tio̍h Tsú tsiâⁿ-tsò siû-huān lâi kám-kak kiàn-siàu, tio̍h tsiàu Siōng-Tsú só͘ sù ê kuân-lîng lâi kah guá uī-tio̍h hok-im tsò-hué siū-khó͘. 9 Siōng-Tsú tsín-kiù lán, ho͘-tiàu lán tsò I ê tsú-bîn, m̄-sī kin-kì lán ê hîng-uî, sī tsiàu I ka-kī ê tsí-ì kah un-tián. Tsit-ê un-tián sī tī bān-sè í-tsîng to̍h thong-kuè Ki-tok Iâ-so͘ siúⁿ-sù lán. 10 Tsit-ê un-tián tsit-má thong-kuè lán ê Kiù-Tsú Ki-tok Iâ-so͘ ê hián-hiān lâi si̍t-hiān. Ki-tok í-king huí-bia̍t sí-bông ê kuân-sè, koh thong-kuè hok-im tsiong bē pāi-huāi ê ua̍h-miā koh-tsài hián-bîng tshut-lâi. 11 Uī-tio̍h tsit-ê hok-im, Siōng-Tsú kā guá siat-li̍p tsò thuân-tō-tsiá, tsò sù-tô͘, tsò kàu-su. 12 Só͘-í guá tsiah teh siū-khó͘, m̄-koh guá bô kám-kak kiàn-siàu, in-uī guá bat guá só͘ sìn ê Siōng-Tsú, mā khak-sìn I ē pó-siú guá tsò I kau-thok guá tsò ê kang-tsok, ti̍t-kàu Tsú tsài-lîm ê ji̍t. 13 Tio̍h īng lí tuì guá só͘ thiaⁿ-tio̍h hiah-ê kiān-tsuân ê tō-lí tsò bô͘-huān, lâi tshî-siú lán thong-kuè kah Ki-tok Iâ-so͘ kiat-liân só͘ tit-tio̍h ê sìn-sim kah thiàⁿ-sim. 14 Tio̍h uá-khò Sìng-Sîn lâi kò͘-siú Siōng-Tsú kau-thok lán ê hó-sū. 15 Lí tsai tī A-se-a-síng ê lâng lóng puē-gi̍k guá, pau-khuat Hui-kiat-lō͘ kah Hik-mô͘-kî-nî. 16 Guān Tsú liân-bín O-nî-sik-hut tsi̍t-ke ê lâng, in-uī i siông-siông kā guá kó͘-lē, mā bô in-uī guá kuà thih-liān kám-kak kiàn-siàu. 17 Tian-tò tsi̍t-ē lâi-kàu Lô-má to̍h phah-piàⁿ tshuē guá, tshuē kàu tio̍h uî-tsí. 18 Guān Tsú hō͘ i tī Tsú tsài-lîm hit ji̍t, tuì Tsú tit-tio̍h liân-bín! Lí mā tsin tshing-tshó i tī Í-hut-só͘ hiah-ni̍h gâu ho̍k-sāi guá.