《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第二章

作者 巴克禮普世版小組 2016.03.27

Ki-tok ê Tsing-ping
1 Só͘-í, guá ê kiáⁿ ah, lí tio̍h uá-khò Ki-tok Iâ-so͘ ê un-tián kian-kiông khí-lâi. 2 Lí tī tsin-tsē kiàn-tsìng-jîn ê bīn-tsîng tuì guá thiaⁿ-tio̍h tsiah-ê tāi-tsì, tio̍h kau-thok hō͘ hiah-ê tiong-sìn koh ē-kham-tit kà-sī pa̍t-lâng ê lâng. 3 Lí tio̍h tsò Ki-tok Iâ-so͘ ê tsing-ping lâi kah guá tsò-hué siū-khó͘. 4 Tshut-tsing ê ping nā beh hō͘ kuaⁿ-tiúⁿ huaⁿ-hí, tsiū m̄-thang hō͘ sè-sū tîⁿ-kha pa̍k-tshiú. 5 Tsáu-pio pí-sài ê lâng nā bô tsun-tsiàu pí-sài kui-tsik tsiū bē-tàng tit-tio̍h tsióng. 6 Kut-la̍t ê tsoh-sit-lâng tong-jiân ē-tàng sing tit-tio̍h siu-sîng. 7 Guá só͘ kóng ê uē lí tio̍h hó-hó-á siūⁿ, in-uī Tsú ē hō͘ lí hiáu-ngō͘ ta̍k-hāng tāi-tsì. 8 Lí tio̍h ē-kì-tit guá só͘ thuân ê hok-im: Iâ-so͘ Ki-tok sī Tāi-pi̍t ê kiáⁿ-sun, Siōng-Tsú hō͘ I tuì sí-lâng tiong koh-ua̍h. 9 Guá uī-tio̍h tsit-ê hok-im siū-khó͘, sīm-tsì tshin-tshiūⁿ huān-lâng hō͘ lâng kuà kha-khàu, m̄-koh Siōng-Tsú ê tō-lí bô siū khún-pa̍k. 10 Só͘-í guá uī-tio̍h Siōng-Tsú kíng-suán ê tsú-bîn jím-siū it-tshè, hō͘ in mā ē tit-tio̍h Ki-tok Iâ-so͘ ê tsín-kiù kah íng-uán ê îng-kng. 11 Ē-bīn tsit-kù uē thang siong-sìn: Lán nā kah I tâng sí, mā ē kah I tâng ua̍h. 12 Lán nā thun-lún kàu-té, mā ē kah Iâ-so͘ Ki-tok tsò-hué tsiáng-kuân. Lán nā m̄ sîng-jīn I, I mā ē m̄ sîng-jīn lán. 13 Lán nā bô tiong-si̍t, Iâ-so͘ Ki-tok iû-guân sī sìn-si̍t, in-uī I bē uî-puē ka-kī.

Tsú só͘ Kah-ì ê Kang-lâng
14 Lí tio̍h thê-tshéⁿ in ē-kì-tit tsiah-ê tāi-tsì, tī Tsú ê bīn-tsîng bīng-līng in m̄-thang uī-tio̍h giân-sû sio-tsèⁿ, in-uī án-ne tsò bô lī-ik, koh ē kà-pháiⁿ teh thiaⁿ ê lâng. 15 Lí tio̍h tsīn-la̍t tsò thang hō͘ Siōng-Tsú kā lí khuàⁿ tsò khó-tshú, tsò tsi̍t-ê bô-thang-hiâm ê kang-lâng, tsìng-khak káng-kái tsin-lí ê sìn-sit. 16 Tio̍h siám-phiah tsho͘-sio̍k bô-lō͘-īng ê uē, in-uī án-ne ē hō͘ lâng ná uán-lī Siōng-Tsú. 17 Tsit-khuán ê uē ē tshin-tshiūⁿ tshng-to̍k seⁿ-thuàⁿ, Hú-bí-nái kah Hui-lí-tô͘ to̍h sī tsit-khuán lâng. 18 In í-king lī-khui tsin-lí, in kóng koh-ua̍h ê tāi-tsì í-king kuè-khì, tì-sú tsi̍t-kuá lâng ê sìn-gióng pāi-huāi. 19 M̄-koh Siōng-Tsú ê tē-ki kian-kò͘ bē iô-tāng, tíng-bīn ū khik-jī kóng, "Tsú bat I ka-kī ê tsú-bîn." Koh kóng, "Kiû-kiò Tsú ê miâ ê lâng tio̍h lī-khui put-gī." 20 Tī tuā-king tshù ê lāi-bīn m̄-nā ū kim kah gîn ê khì-kū, mā ū tshâ ê kah huî ê, ū-ê tsò kuì-khì ê lō͘-īng, ū-ê tsò khah tsho͘-sio̍k ê lō͘-īng. 21 Só͘-í lâng nā tshing-khì ka-kī lī-khui tsiah-ê tsho͘-sio̍k ê tāi-tsì, tsiū ē tsiâⁿ-tsò kuì-khì ê khì-kū, sìng-huà hō͘ tsú-lâng īng, thang tsún-pī piān-piān lâi tsò ta̍k-hāng hó-sū. 22 Tio̍h siám-phiah siàu-liân-lâng ê tsîng-io̍k, lâi kah hiah-ê īng tshing-khì ê sim-lîng kiû-kiò Tsú ê lâng tsò-hué tui-kiû kong-gī, sìn-sim, thiàⁿ-sim kah hô-pîng. 23 M̄-thang tsò gû-gōng bû-ti ê piān-lūn. Lí tsai tsiah-ê tāi-tsì ē ín-khí uan-ke. 24 Tsú ê lô͘-po̍k m̄-thang uan-ke, tio̍h un-jiû khuán-thāi tsìng-lâng, gâu kà-sī, gâu thun-lún, 25 īng un-jiû kíng-kài hiah-ê huán-tuì-tsiá, kiám-tshái Siōng-Tsú ē hō͘ in hué-kái, thang lâi bat tsin-lí. 26 Án-ne in sui-jiân í-king tī Mô͘-kuí ê tsiáng-tiong, mā ē hō͘ Tsú ê lô͘-po̍k bán-huê lâi uân-sîng Siōng-Tsú ê tsí-ì.