《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第19章

作者 巴克禮普世版小組 2011.08.07

1, Iâ-so͘ kóng tsiah-ê ē suah, tsiū lī-khui Ka-lī-lī-síng, kàu Iû-thài ê kíng-lāi, Iok-tàn-hô guā;
2, ū kui tuā tīn ê lâng tè I, tsiū tī hia i-hó in.
3, Ū Huat-lī-sài-phài ê lâng lâi tshì I, kóng, Lâng put-lūn sím-mi̍h iân-kò͘ thang lî i ê bó͘ mah?
4, Tsiū ìn kóng, Lín kiám bô tha̍k-tio̍h tshòng-tsō ê Tsú guân khí-thâu tshòng-tsō in ū lâm ū lú?
5, suà kóng, In-uī án-ne lâng bueh lī-khui pē-bú, kiat-liân i ê bó͘, nn̄g-ê bueh tsiâⁿ-tsò tsi̍t thé;
6, tshin-tshiūⁿ án-ne bô koh tsò nn̄g-ê, sī tsò tsi̍t thé. Só͘-í Siōng-tsú só͘ phuè-ha̍p ê, lâng m̄-thang pun-khui i.
7, In kā I kóng, Tān-sī án-ne, Mô͘-se tsáiⁿ-iūⁿ huan-hù īng lî-tsu hō͘ i, lâi lî i ah?
8, I kā in kóng, Mô͘-se in-uī lín ê sim ngī, tsún lín lî bó͘; tān-sī tuì khí-thâu m̄-sī án-ne.
9, Koh guá kā lín kóng, Kìⁿ-nā lâng, m̄-sī uī-tio̍h kan-îm ê iân-kò͘, lî i ê bó͘ lâi tshuā pa̍t-ê, tsiū-sī kiâⁿ îm; tshuā lâng só͘ lî-tshut ê iā sī kiâⁿ îm.
10, Bûn-tô͘ kā I kóng, Lâng kap i ê bó͘ ê sū kì-jiân sī án-ne, lîng-khó͘ bô tshuā.
11, I tsiū kā in kóng, Tsit tsióng ē m̄-sī tsìng lâng só͘ ē sîng-siū ê; tsí ū tit-tio̍h siúⁿ-sù ê tsiah uē.
12, In-uī ū iam ê, tuì bú-thai tshut-sì tsiū án-ne; iā ū hō͘ lâng iam ê; iā ū uī-tio̍h Thian-kok ka-kī iam ê. Uē sîng-siū ê tio̍h sîng-siū i.
13, Hit sî ū lâng tshuā suè-kiáⁿ tsiū-kūn I, ài I īng tshiú huāⁿ in, lâi kî-tó; bûn-tô͘ tsik-pī in.
14, Tān-sī Iâ-so͘ kóng, Iông-ún suè-kiáⁿ tsiū-kūn guá, bo̍h-tit kìm i; in-uī Thian-kok sī sio̍k tī tsit tsióng ê.
15, Tsiū īng tshiú huāⁿ in; lī-khui hia khì.
16, Tú-tn̄g ū tsi̍t lâng tsiū-kūn I, kóng, Sian-siⁿ, guá tio̍h kiâⁿ sím-mi̍h hó thang tit-tio̍h íng-ua̍h?
17, I kā i kóng, Lí tsáiⁿ-iūⁿ thê-khí hó, lâi mn̄g guá? Hó-ê sī tsi̍t-ê. Tān-sī lí nā ài ji̍p tī ua̍h, tio̍h siú tsiah-ê kài-bīng.
18, I kā I kóng, Sī sím-mi̍h ê? Iâ-so͘ kóng, Bo̍h-tit thâi-sí lâng, Bo̍h-tit kiâⁿ îm, Bo̍h-tit thau-the̍h, Bo̍h-tit lām-sám tsò kiàn-tsìng,
19, Kìng lí ê pē-bú, Tio̍h thiàⁿ lí ê tshù-piⁿ tshin-tshiūⁿ ka-kī.
20, Siàu-liân lâng kā I kóng, Tsiah-ê guá lóng ū siú i; iáu-kú khiàm sím-mi̍h?
21, Iâ-so͘ kā i kóng, Lí nā ài tsò uân-tsuân, tio̍h khì bē lí só͘ ū ê lâi hō͘ sàn-tshiah lâng, tsiū ū tsâi-pó tī thiⁿ-tíng; koh lâi tuè guá.
22, Siàu-liân lâng thiaⁿ-tio̍h tse uē, iu-būn tsiū khì; in-uī i sán-gia̍p tsin tsuē.
23, Iâ-so͘ tsiū kā I ê bûn-tô͘ kóng, Guá si̍t-tsāi kā lín kóng, Pù lâng ji̍p Thian-kok oh--ah!
24, Guá koh kā lín kóng, Lo̍k-tô tshng-kue3tsiam-phīⁿ, pí pù lâng ji̍p Siōng-tsú ê kok, khah khuài.
25, Bûn-tô͘ thiaⁿ-tio̍h tuā gông-ngia̍h, kóng, Tān-sī án-ne, tsiū siáⁿ-lâng ē tit-tio̍h kiù ah?
26, Iâ-so͘ khuàⁿ in kóng, Tsāi-tī lâng sī buē-uē, tsāi-tī Siōng-tsú, bān sū lóng uē.
27, Hit sî Pí-tik ìn I kóng, Guán bat pàng-sak it-tshè lâi tuè lí, guán bueh tit-tio̍h sím-mi̍h ah?
28, Iâ-so͘ kā in kóng, Guá si̍t-tsāi kā lín kóng, lín tsiah-ê tè guá, kàu koh hing-khí ê sî, Jîn-tsú tsē I îng-kng ê tsō-uī, lín iā bueh tsē tsa̍p-jī ê tsō-uī, lâi sím-phuàⁿ Í-sik-lia̍t tsa̍p-jī ê tsi-phài.
29, Kìⁿ-nā uī-tio̍h guá ê miâ pàng-sak tshù-the̍h, á-sī hiaⁿ-tī, tsí-bē, lāu-pē, lāu-bú, kiáⁿ-jî, á-sī tshân-hn̂g, bueh tit-tio̍h pah-pē, lâi sîng-tsiap íng-ua̍h.
30, Tān-sī tāi-sing ê tsē-tsē bueh tsò lō͘-bé; lō͘-bé ê bueh tsò tāi-sing.