《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第三章

作者 巴克禮普世版小組 2016.04.03

Sè-kài ê Bua̍t-ji̍t
1 Lí tio̍h tsai, tī sè-kài ê bua̍t-ji̍t ū tsióng-tsióng ê khó͘-lān. 2 Hit sî, lâng ē tsū-su, tham-tsâi, khua-kháu, kiau-ngō͘, huí-pòng, puē-gi̍k pē-bú, bōng-un, bô sìng-kiat, 3 bô tsîng-gī, puē-iok, tiòng-siong, hîng-gi̍k, tsân-jím, uàn-hūn hó-sū, 4 kan-kuí, tsip-phiah, phòng-hong, ài hióng-lo̍k khah kuè-thâu tī thiàⁿ Siōng-Tsú, 5 ū kìng-khiân ê guā-māu, m̄-koh bô kìng-khiân ê si̍t-tsit. Lí tio̍h siám-phiah tsit-tsióng lâng. 6 In tiong-kan ū-lâng thau-thau-á ji̍p-khì lâng ê tshù, bê-hi̍k gōng-gōng ê hū-lí, tsiū-sī hiah-ê siū tsuē-ok kah tsîng-io̍k tsi-phuè ê hū-lí. 7 Tsiah-ê hū-lí put-sî to teh ha̍k-si̍p, m̄-koh lóng bô-huat-tō͘ bîng-pi̍k tsin-lí. 8 Tshin-tshiūⁿ tsá-tsîng ê Ngá-nî í-ki̍p Iông-pì kah Mô͘-se tuì-ti̍k, tsit-má tsiah-ê lâng mā án-ne kah tsin-lí tuì-ti̍k, in ê sim-tsì í-king pāi-huāi, tī sìn-gióng-siōng bô-huat-tō͘ koh siū khó-giām. 9 M̄-koh tsiah-ê lâng bē-tàng koh huat-hui sím-mi̍h tsok-iōng, in-uī in ê gû-gōng ē tshin-tshiūⁿ tíng-bīn hit nn̄g-lâng, tī tsìng-lâng ê bīn-tsîng lō͘-hiān.

Tsuè-āu ê Kà-sī
10 Lí ū sūn-ho̍k guá ê kà-sī, koh o̍h-tio̍h guá ê phín-hīng, tsì-hiòng, sìn-khò, khuan-iông, thiàⁿ-sim, thun-lún, í-ki̍p só͘ siū ê pik-hāi kah khó͘-lān. 11 Lí mā tsai guá tī An-thê-o, Í-ko-liām, Lō͘-su-tik só͘ tú-tio̍h ê pik-hāi kah jím-siū, m̄-koh Tsú lóng kiù guá thuat-lī tsiah-ê khó͘-lān. 12 Só͘-ū ài-beh kah Ki-tok Iâ-so͘ kiat-liân lâi kuè kìng-khiân sing-ua̍h ê lâng lóng ē siū pik-hāi. 13 Pháiⁿ-lâng kah phiàn lâng ê ông-lo̍k-á-sian ē ná lâi ná pháiⁿ, in khi-phiàn lâng, ka-kī mā siū khi-phiàn. 14 M̄-koh lí tio̍h tshî-siú só͘ ha̍k-si̍p kah só͘ khak-sìn ê tō-lí, in-uī lí tsai tsiah-ê tō-lí sī tuì siáⁿ-lâng o̍h-.ê. 15 Lí mā tsai lí tuì sè-hàn to̍h bat hiah-ê Sìng-king. Tsit-ê Sìng-king ē-tàng hō͘ lí ū tì-huī thang thong-kuè sìn Ki-tok Iâ-so͘ lâi tit-kiù. 16 Só͘-ū siū Siōng-Tsú bi̍k-sī lâi siá ê Sìng-king, tuì kà-sī kah tok-tsik, í-ki̍p hō͘ lâng kui-tsìng koh ín-tshuā lâng o̍h gī-lí, lóng ū lī-ik. 17 Án-ne ho̍k-sāi Siōng-Tsú ê lâng tit-tio̍h tshiong-hun ê tsong-pī, thang tsò ta̍k-tsióng ê hó-sū.