《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第四章

作者 巴克禮普世版小組 2016.04.10

1Tī Siōng-Tsú kah teh-beh sím-phuàⁿ ua̍h-lâng kah sí-lâng ê Ki-tok Iâ-so͘ ê bīn-tsîng, koh in-uī Ki-tok beh hián-hiān tsài-lîm, guá pik-tshiat huan-hù lí: 2 tio̍h thuân hok-im, bô-lūn tio̍h-sî á-sī bô tio̍h-sî, lóng tio̍h tsuan-sim lâi tsìn-hîng, īng kok-tsióng ê khuan-iông kah kà-sī lâi khuàn-bián, kíng-kài kah kó͘-lē. 3 In-uī hit-ê sî-ji̍t beh kàu, lâng ē m̄ thiaⁿ tuan-tsiàⁿ ê kà-sī, tian-tò hīⁿ-khang tsiūⁿ koh tsiàu ka-kī ê su-io̍k, phìng-tshiáⁿ tsi̍t-ê koh tsi̍t-ê in kah-ì thiaⁿ ê lāu-su. 4 In ua̍t thâu m̄ thiaⁿ tsin-lí, tian-tò ài thiaⁿ bô-iáⁿ bô-tsiah ê thuân-suat. 5 Tsóng-sī lí bô-lūn tī sím-mi̍h khuân-kíng lóng tio̍h tsiat-tsè, jím-siū kan-khó͘, tsò thuân hok-im ê kang, lâi tsīn lí ê tsit-hūn. 6 Taⁿ guá hi-sing hiàn hō͘ Siōng-Tsú ê kî í-king kàu à, tsit tsūn sī guá lī-khui sè-kan ê sî-khik. 7 Guá í-king king-li̍k hit-ê hó ê tsing-tsiàn, í-king uân-sîng tio̍h pháu-tsáu ê lō͘-tsām, í-king kian-siú tio̍h tshî-siú ê sìn-gióng. 8 Taⁿ kong-gī ê kuan-bián í-king kā guá tsún-pī hó-sè, tsiū-sī Tsú tsò kong-gī ê sím-phuàⁿ-tsiá tī hit ji̍t beh hō͘ guá. M̄-nā hō͘ guá, mā beh hō͘ só͘-ū him-bō͘ Ki-tok tsài-lîm hián-hiān ê lâng.

Su-jîn ê Kau-tài
9 Lí tio̍h tsīn-liōng kuáⁿ-kín lâi guá tsia. 10 In-uī Tí-má tham-luân tsit-ê sè-kan, tsiū lī-khui guá khì Thiap-sat-lô-nî-ka. Kik-li̍k-sū mā khì Ka-lia̍p-thài, Thê-to mā khì That-má-thài. 11 Tsí-ū Lō͘-ka kah guá tī tsia. Lí tio̍h tshuā Má-khó kah lí tsò-hué lâi, in-uī i tuì guá ê kang-tsok tsin ū pang-tsō͘. 12 Guá í-king tshe-phài Tshui-ki-kó͘ khì Í-hut-só͘. 13 Guá tī Ti̍k-lô-a ê sî lâu tī Ka-pò͘ in tau ê guā-saⁿ, lí lâi ê sî tio̍h suà tuà lâi, mā tio̍h kā hiah-ê tsheh tuà lâi, iû-kî sī hiah-ê iûⁿ-phuê ê tsheh. 14 Phah-tâng sai-hū A-li̍k-san-tāi kā guá hāi kah tsin tshám. Tsú ē tsiàu i ê só͘-tsò lâi kā i pò-ìng. 15 Lí ka-kī mā tio̍h tî-hông, in-uī i put-tsí ki̍k-li̍k huán-tuì guán só͘ thuân ê tō-lí. 16 Guá thâu tsi̍t pái uī ka-kī piān-kái ê sî, bô-lâng tī guá ê sin-piⁿ tsi-tshî guá, tsìng-lâng lóng kā guá pàng-sak. Guān Siōng-Tsú bô kā tsit-ê tsuē kui tī in. 17 M̄-koh Tsú kah guá tông-tsāi, hō͘ guá ū khuì-la̍t thang tshiong-hun pò-iông sìn-sit, hō͘ só͘-ū ê Guā-pang-lâng lóng thiaⁿ-tio̍h. Tsuè-āu guá mā tuì sai ê tshuì pī kiù tshut-lâi. 18 Tsú ē kiù guá thuat-lī só͘-ū ê siâ-ok, mā ē an-tsuân tshuā guá tsìn-ji̍p tī I thiⁿ-tíng ê kok-tō͘. Guān îng-kng kui I ti̍t-kàu íng-uán bô tsīn. Amen!

Tsuè-āu ê Tshíng-an
19 Tshiáⁿ thè guá kā Pik-ki-lah, A-ku-lah, kah O-nî-sik-hut tsuân-ke tshíng-an. 20 Í-lah-to͘ kè-sio̍k tiàm-tī Ko-lîm-to. Tik-lô-hui-mô͘ in-uī phuà-pēⁿ, guá kā i lâu tī Bí-lī-to͘. 21 Lí tio̍h tsīn-liōng tī tang-thiⁿ í-tsîng lâi, Iú-pò͘-lô, Po͘-tiân, Lī-lô͘, Kik-ló-tia kah tsìng hiaⁿ-tī tsí-muē lóng beh kā lí tshíng-an. 22 Guān Tsú kah lí ê sim-lîng tông-tsāi! Guān Siōng-Tsú ê un-tián kah lín tông-tsāi!