《巴克禮普世版聖經（試讀本）》

 | | | 轉寄

巴克禮普世版（試讀本） 提多書第一章

作者 巴克禮普世版小組 2016.04.17

1 Guá sī Pó-lô, tsò Siōng-Tsú ê lô͘-po̍k kah Iâ-so͘ Ki-tok ê sù-tô͘, siū suán-tiàu lâi pang-tsō͘ Siōng-Tsú ê suán-bîn ê sìn-gióng, ín-tshuā in bat lán sìn-gióng só͘ kà-sī ê tsin-lí. 2 Tsit-ê sìn-gióng hō͘ lán tuì íng-uán ê ua̍h-miā ū ǹg-bāng, tsiū-sī bē kóng pe̍h-tsha̍t ê Siōng-Tsú tī bān-sè í-tsîng to̍h ìng-ín beh hō͘ lán. 3 Sî-kî nā kàu, tsiū thong-kuè sìn-sit ê thuân-káng tsiong tsit-ê ìng-ín hián-bîng tshut-lâi. Guá ū siū-thok hōng lán ê Kiù-Tsú Siōng-Tsú ê bīng-līng lâi suan-káng tsit-ê hok-im. 4 Guá siá phue kià hō͘ lí Thê-to, tī lán kiōng-tông ê sìn-gióng tiong, lí sī guá tsin ê kiáⁿ. Guān Thiⁿ-Pē Siōng-Tsú kah lán ê Kiù-Tsú Ki-tok Iâ-so͘ sù lí un-tián kah pîng-an.

Thê-to Tī Kik-lí-tí ê Kang-tsok
5 Guá lâu lí tī Kik-lí-tí sī ài lí tshù-lí hiah-ê pān iáu-buē tshing-tshó ê tāi-tsì, koh tsiàu guá kā lí huan-hù ê, tī ta̍k-ê siâⁿ-tshī siat-li̍p tiúⁿ-ló. 6 Tsò tiúⁿ-ló tio̍h hîng-uî tuan-tsiàⁿ, kan-taⁿ tsi̍t-ê bó͘, kiáⁿ-jî lóng sī sìn-tô͘, bô-lâng khòng-kò in hòng-tōng á-sī bô siú huat-tō͘. 7 Kàu-huē ê líng-tō-tsiá ná tshin-tshiūⁿ Siōng-Tsú ê kuán-ke, bô kiau-ngō͘, bô khuài siū-khì, bô in-uī tsiú-tsuì lâi jiá-sū, bô hiong-pō, bô tham put-gī ê tsîⁿ-tsâi. 8 Mā tio̍h hó khuán-thāi tshut-guā lâng, gâu tsò hó-sū, siú-kí, kong-gī, sìng-kiat, tsiat-tsè. 9 I it-tīng tio̍h kian-siú hit-ê tsin-si̍t koh hû-ha̍p kàu-gī ê sìn-sit, tsiah ē-tàng īng tuan-tsiàⁿ ê kà-sī lâi khuàn-bián lâng, mā ē-tàng huán-pok hiah-ê huán-tuì ê lâng. 10 In-uī ū tsin-tsē m̄ sūn-ho̍k ê lâng, tsiū-sī hiah-ê kóng siáu-uē lâi khi-phiàn lâng ê, iû-kî-sī tsú-tiuⁿ tio̍h siū kat-lé ê Iû-thài Ki-tok-tô͘. 11 Lí tio̍h kā tsit tsióng lâng ê tshuì that khí-lâi, in uī-tio̍h tham put-gī ê tsîⁿ-tsâi, īng bô ing-kai kà-sī ê uē lâi phò-huāi tsi̍t-kuá lâng ê ka-tîng. 12 In Kik-lí-tí-lâng ê tsi̍t-ê sian-ti bat án-ne kóng, "Kik-lí-tí-lâng put-sî kóng pe̍h-tsha̍t, tshin-tshiūⁿ hiong-ok ê iá-siù, tham-tsia̍h koh pîn-tuāⁿ." 13 I án-ne kóng sī sū-si̍t, só͘-í lí tio̍h giâm-keh kā in tsik-pī, thang hō͘ in ū kiān-tsuân ê sìn-gióng, 14 bô koh thiaⁿ Iû-thài-lâng bô-iáⁿ bô-tsiah ê thuân-suat kah hiah-ê puē-gi̍k tsin-lí ê kài-bīng. 15 Tuì tshing-khì ê lâng lâi kóng, bān-bu̍t lóng sī tshing-khì; tuì hiah-ê ù-uè kah bô sìn ê lâng lâi kóng, bô tsi̍t hāng mi̍h sī tshing-khì, liân in ê sim-su kah liông-sim mā lóng ù-uè. 16 In ka-kī tshuì kóng bat Siōng-Tsú, m̄-koh in īng hîng-uî lâi hó͘ⁿ-jīn. In khó-ò͘ⁿ, puē-gi̍k, tsò bē-tshut sím-mi̍h hó tāi-tsì.