《巴克禮普世版聖經（試讀本）》

 | | | 轉寄

巴克禮普世版（試讀本） 提多書第二章

作者 巴克禮普世版小組 2016.04.24

Kiān-tsuân ê Kàu-gī
1 Tsóng-sī lí ê kà-sī tio̍h hû-ha̍p kiān-tsuân ê kàu-gī. 2 Tio̍h khǹg lāu-lâng m̄-thang ài lîm-tsiú, tio̍h tuan-tsong siú-kí, koh ū sûn-tsuân ê sìn-gióng, thiàⁿ-sim kah nāi-sim. 3 Mā tio̍h án-ne khǹg lāu hū-jîn-lâng, giân-hîng kú-tsí tio̍h ha̍h tī kìng-khiân ê sìn-gióng, m̄-thang huí-pòng, mā m̄-thang tsò tsiú-kuí, tio̍h tsò hó bô͘-huān lâi kà-sī lâng, 4 tsiah ē-tàng kà-sī siàu-liân ê hū-jîn-lâng thiàⁿ in ê tiōng-hu, thiàⁿ in ê kiáⁿ-jî, 5 koh tio̍h siú-kí, tsing-kiat, liāu-lí ka-sū, siān-liông, sūn-ho̍k ka-kī ê tiōng-hu, bián-tit Siōng-Tsú ê tō-lí siū huí-pòng. 6 Lí mā tio̍h án-ne khǹg siàu-liân ê tsa-po͘-lâng siú-kí. 7 Lí ta̍k-hāng tāi-tsì tio̍h ka-kī tsò hó bô͘-huān, kà-sī lâng ê sî tio̍h sîng-khún tuan-tsong, 8 giân-sû tio̍h tuan-tsiàⁿ bô thang hō͘ lâng tsí-tsik, hō͘ huán-tuì ê lâng bô teh thang kóng lán ê pháiⁿ-uē suah ka-kī kám-kak kiàn-siàu. 9 Tio̍h khǹg lô͘-po̍k tio̍h sūn-ho̍k tsú-lâng, ta̍k-hāng tāi-tsì hō͘ in huaⁿ-hí, bô ìn-tshuì ìn-tsi̍h, 10 m̄-thang thau-the̍h, tio̍h piáu-hiān tsa̍p-hun ê tiong-sìn, thang hō͘ lán ê Kiù-Tsú Siōng-Tsú ê kà-sī tī ta̍k hong-bīn koh-khah kong-tshái. 11 In-uī Siōng-Tsú tsín-kiù tsuân jîn-luī ê un-tián í-king hián-bîng tshut-lâi. 12 Tsit-ê un-tián kíng-kài lán tio̍h khì-sak bô kìng-khiân ê sing-ua̍h kah sio̍k-sè ê su-io̍k, tī tsit-ê sè-kan kuè siú-kí, kong-gī kah kìng-khiân ê sing-ua̍h. 13 Án-ne lâi thìng-hāu hit-ê tshiong-muá hok-khì ê ǹg-bāng, tsiū-sī lán tsì-tsun ê Siōng-Tsú kah Kiù-Tsú Iâ-so͘ Ki-tok îng-kng ê hián-hiān. 14 Ki-tok uī-tio̍h lán hiàn ka-kī ê sèⁿ-miā sī beh kiù-sio̍k lán thuat-lī it-tshè ê tsuē-ok, hō͘ lán tsiâⁿ-tsò I sûn-kiat ê tsú-bîn, thang jia̍t-sim tsò hó-sū. 15 Tsiah-ê tāi-tsì lí tio̍h kóng, tio̍h khó͘-khǹg, tshiong-hun ūn-iōng lí ê tsit-kuân lâi tsik-pī lâng. M̄-thang hō͘ lâng kā lí khuàⁿ-khin.