《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第20章

作者 巴克禮普世版小組 2011.08.14

1, In-uī Thian-kok tshin-tshiūⁿ ke-tsú thàu-tsá tshut-khì tshiàⁿ kang ji̍p i ê phû-tô-hn̂g;
2, kap tsò-kang ê lâng iok tsi̍t ji̍t tsi̍t tsîⁿ gûn; tsiū tshe in ji̍p i ê hn̂g.
3, Káu tiám ê sî tshut-khì, koh khuàⁿ-tio̍h ū îng-îng khiā tī kue-tshī-ni̍h ê, tsiū kā in kóng,
4, Lín iā khì phû-tô-hn̂g, guá bueh tsiàu kong-tō hō͘ lín; in tsiū khì.
5, Tsa̍p-jī tiám kap saⁿ tiám ê sî koh tshut-khì, iā án-ne tsò.
6, Gō͘ tiám ê sî tshut-khì, koh tú-tio̍h ū lâng khiā-teh, tsiū kā in kóng, Lín siáⁿ-sū tsuân ji̍t îng-îng khiā tī tsia ah?
7, In kā i kóng, In-uī bô lâng tshiàⁿ guán. I kā in kóng, Lín iā khì phû-tô-hn̂g.
8, Kàu ji̍t àm, hn̂g-tsú kā i ê kuán-ke kóng, Kiò tsò-kang ê, hō͘ in kang-tsîⁿ, tuì lō͘-bé lâi ê khí, kàu tāi-sing lâi ê uî-tsí.
9, Hiah-ê gō͘ tiám tsing só͘ tshiàⁿ ê kàu, ta̍k-ê niá tsi̍t tsîⁿ gûn.
10, Tāi-sing tshiàⁿ ê kàu, in phah-sǹg bueh niá khah tsuē; m̄-kú in iā ta̍k-ê niá tsi̍t tsîⁿ gûn.
11, Niá liáu, tsiū tuì ke-tsú nga̍uh-nga̍uh-liām kóng,
12, Guán tsuân ji̍t thua-buâ siū jua̍h; hiah-ê lō͘-bé tshiàⁿ ê, tsò kang tsi̍t tiám-tsing kú, kìng-jiân hō͘ in kap guán pîⁿ.
13, I tsiū tuì in tsi̍t lâng ìn kóng, Pîng-iú ah, guá m̄-sī bô kong-tō khuán-thāi lí; lí kiám m̄-sī kap guá iok tsi̍t tsîⁿ gûn mah?
14, Lí-ê lí the̍h, tsò lí khì. Guá bueh hō͘ tsit-ê lō͘-bé ê kap lí pîⁿ.
15, Īng guá ê mi̍h, kiâⁿ guá só͘ ài, kiám bē tsò-tit? Á-sī in-uī guá tsò hó, lí teh ba̍k-tshiah mah?
16, Tshin-tshiūⁿ án-ne, lō͘-bé ê bueh tsò tāi-sing, tāi-sing ê bueh tsò lō͘-bé.
17, Iâ-so͘ tsiūⁿ Iâ-lō͘-sat-líng ê sî tī lō͘-ni̍h tshuā tsa̍p-jī ê bûn-tô͘ kàu piⁿ-á, kā in kóng,
18, Taⁿ lán tsiūⁿ Iâ-lō͘-sat-líng; Jîn-tsú bueh siū ké-sàng hō͘ tsiah-ê tsè-si-thâu kap king-ha̍k-kàu-su, in bueh gí I sí-tsuē;
19, iā bueh ké-sàng I hō͘ guā-pang lâng, tì-kàu hì-lāng I, piⁿ phah I, tìng I tī si̍p-jī-kè; tē saⁿ ji̍t I bueh koh-ua̍h.
20, Hit sî Se-pí-thài ê kiáⁿ ê lāu-bú kap i ê kiáⁿ tsiū-kūn lâi pài I, kiû tsi̍t hāng sū.
21, I kā i kóng, Lí ài sím-mi̍h? Ìn kóng, Guān lí tshut bīng-līng, hō͘ guá tsit nn̄g ê kiáⁿ tī lí ê kok, tsi̍t-ê tsē lí ê tsiàⁿ-pîng, tsi̍t-ê tsē lí ê tò-pîng.
22, Iâ-so͘ ìn kóng, Lín só͘ kiû ê, lín m̄ tsai. Guá só͘ bueh lim ê pue, lín ē lim mah? Ìn kóng, Uē.
23, I kā in kóng, Guá ê pue lín kó-jiân bueh lim; tān-sī tsē guá ê tsiàⁿ-pîng tò-pîng, m̄-sī guá ē thang hō͘ lâng, tsí-ū sī guá ê Pē uī-tio̍h sím-mi̍h lâng tsún-pī ê, tsiū hō͘ in.
24, Tsa̍p ê bûn-tô͘ thiaⁿ-tio̍h, tsiū siū-khì hit nn̄g ê hiaⁿ-tī.
25, Iâ-so͘ kiò in lâi kóng, Lín tsai guā-pang ê jîn-kun tsò tsú lâi tī-lí in, in ê tāi-jîn kuán-hat in;
26, tsí-ū lín tiong-kan m̄-sī án-ne; lín tiong-kan ài tsò tuā ê, bueh tsò lín ê tshe-īng;
27, ài tsò thâu ê, bueh tsò lín ê lô͘-po̍k.
28, Tshin-tshiūⁿ Jîn-tsú lâi, m̄-sī bueh tshe-īng lâng, sī bueh hō͘ lâng tshe-īng; koh hiàn I ê sìⁿ-miā, lâi sio̍k-huê tsē-tsē lâng.
29, In tshut Iâ-lī-ko ê sî, kui tuā tīn ê lâng tè I.
30, Tú-tn̄g ū nn̄g ê tshiⁿ-mî ê tsē tī lō͘-piⁿ, thiaⁿ-tio̍h Iâ-so͘ tuì hia kè, tsiū huah kóng, Tsú, Tāi-pi̍t ê kiáⁿ-sun ah, lîn-bín guán.
31, Tsìng lâng hiâm in, kah in tsīng-tsīng; tān-sī in koh khah tuā siaⁿ kiò kóng, Tsú, Tāi-pi̍t ê kiáⁿ-sun ah, lîn-bín guán.
32, Iâ-so͘ thîng-kha, kiò in lâi kóng, Ài guá kā lín tsò sím-mi̍h?
33, In kā I kóng, Tsú ah, guán ài tit-tio̍h ba̍k-tsiu khui.
34, Iâ-so͘ khó-lîn in, bong in ê ba̍k-tsiu; in liâm-piⁿ khuàⁿ-tio̍h, tsiū tè I.