《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第八章

作者 巴克禮普世版小組 2016.07.03

Lán ê Tuā-tsè-si Iâ-so͘
1 Guá só͘ kóng ê iàu-tiám tsiū-sī: lán ū tsit-khuán ê tsè-si-tiúⁿ, I tsē tī thiⁿ-tíng tsì-tuā Siōng-Tsú pó-tsō ê tsiàⁿ-pîng. 2 I tī Sìng-só͘ kah tsin ê huē-bō͘ teh sū-hōng, tsit-ê huē-bō͘ sī Tsú só͘ siat-li̍p ê, m̄-sī lâng só͘ tsō-.ê. 3 Muí tsi̍t-ê tsè-si-tiúⁿ ê siat-li̍p lóng sī uī-tio̍h hiàn lé-mi̍h kah tsè-sū, só͘-í tsit-ê tsè-si-tiúⁿ mā it-tīng tio̍h ū sím-mi̍h thang hiàn. 4 Iâ-so͘ nā lâu tī tē-tsiūⁿ tsiū bô tsò tsè-si, in-uī í-king ū tsè-si tsiàu lu̍t-huat teh hiàn lé-mi̍h. 5 Tsiàu lu̍t-huat ê tsè-si só͘ tsò ê ho̍k-sāi tsí put-kò sī thiⁿ-tíng tiùⁿ-bō͘ ê hù-pún kah iáⁿ-siōng. Tú tshin-tshiūⁿ Mô͘-se beh tsō huē-bō͘ ê sî, Siōng-Tsú ū kā i tsí-sī, kóng, "Lí tio̍h kín-sīn, it-tshè tio̍h tsiàu tī suaⁿ-tíng Guá kā lí tsí-sī ê khuán-sit lâi tsō."( tsù: CAK 25:40) 6 M̄-koh tsit-má Iâ-so͘ í-king tit-tio̍h koh-khah tsun-kuì ê sū-hōng, I tsò koh-khah hó ê bîng-iok ê tiong-pó. Tsit-ê bîng-iok sī īng koh-khah hó ê ìng-ín lâi siat-li̍p-.ê. 7 Thâu tsi̍t-ê bîng-iok nā bô sím-mi̍h khuat-tiám, tsiū bô su-iàu li̍p tē-jī ê bîng-iok. 8 M̄-koh Siōng-Tsú kā in tsí-tsik, kóng, "Tsú kóng, Lí khuàⁿ, ji̍t-tsí teh-beh kàu, Guá beh kah Í-sik-lia̍t-lâng í-ki̍p Iû-tāi-lâng li̍p sin ê bîng-iok. 9 Tsit-ê bîng-iok bô tshin-tshiūⁿ tsîng Guá kah in ê tsó͘-sian só͘ li̍p ê, tsiū-sī khan in ê tshiú, tshuā in tshut Ai-ki̍p ê sî só͘ li̍p ê, in-uī in bô kè-sio̍k siú Guá ê bîng-iok, Guá mā bô beh khuàⁿ-kò͘ in." 10 Tsú koh kóng, "Tsiah-ê ji̍t í-āu, Guá kah Í-sik-lia̍t-lâng beh li̍p ê iok sī án-ne: Guá beh tsiong Guá ê lu̍t-huat khǹg tī in ê thâu-náu, Khik tī in ê sim. Guá beh tsò in ê Siōng-Tsú, in beh tsò Guá ê tsú-bîn. 11 In lóng bē koh kà-sī in ê tông-pau á-sī in ê hiaⁿ-tī tsí-muē, kóng, ' Lí tio̍h bat Tsú, in-uī tuì siōng-sè kàu siōng-tuā, in lóng ē bat Guá.' 12 Guá ē sià-bián in ê put-gī, bô koh kì-tit in ê tsuē-ok."( tsù: ILB 31:31-34) 13 Siōng-Tsú kì-jiân kóng-khí sin ê bîng-iok, tsiū hō͘ thâu tsi̍t-ê bîng-iok piàn-tsò kū-.ê. Hit-ê tsiām-tsiām kū-khì koh sue-thè ê tsiū liâm-piⁿ siau-sit.