《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第九章

作者 巴克禮普世版小組 2016.07.10

Tē-tsiūⁿ kah Thiⁿ-tíng ê Kìng-pài
1 Thâu tsi̍t-ê bîng-iok mā ū lé-pài ê kui-tīng kah sio̍k sè-kan ê sìng-tiān. 2 Ū tah hó-sè ê tiùⁿ-bō͘, thâu-tsîng-king kiò-tsò Sìng-só͘. Hit lāi-bīn ū ting-tâi, kí-toh kah pâi-lia̍t ê piáⁿ. 3 Tē-jī-ê tiùⁿ-lî āu-bīn koh ū huē-bō͘, kiò-tsò Tsì-sìng-só͘. 4 Hit lāi-bīn ū kim hiuⁿ-tuâⁿ kah tsuân-pō͘ pau-kim ê iok-kuī, kuī-lāi ū khǹg má-ná ê kim-ô͘, A-lûn puh-gê ê kuái-á kah nn̄g-tè bîng-iok ê tsio̍h-pán. 5 Kuī-tíng ū îng-kng ê ki-lō͘-ping, in ê siang-si̍t jia-khàm si-un-só͘. Kuan-hē tsiah-ê tāi-tsì guá tsit-má bē-tàng siông-sè kóng. 6 Tsiah-ê mi̍h-kiāⁿ án-ne an-pâi hó-sè, tsè-si ta̍k-ji̍t ji̍p-khì thâu-tsîng-king ê Sìng-só͘ kí-hîng lé-pài ê gî-sik. 7 Āu-bīn hit-king ê Tsì-sìng-só͘ tsí ū tsè-si-tiúⁿ ta̍k nî tsi̍t pái ka-kī ji̍p-khì, ta̍k-pái tio̍h tuà hueh ji̍p-khì, uī-tio̍h pún-sin kah jîn-bîn bô-ì-tiong huān-tsuē lâi hiàn-tsè. 8 Sìng-Sîn án-ne an-pâi lâi tsí-bîng, tiùⁿ-bō͘ thâu-tsîng-king nā iáu tsûn-tsāi, ji̍p-khì Tsì-sìng-só͘ ê mn̂g tsiū iáu-buē khui. 9 Tiùⁿ-bō͘ ê thâu-tsîng-king sī teh phì-jū hiān-sè. Tsiàu án-ne teh hiàn lé-mi̍h kah tsè-sū bē-tàng hō͘ lé-pài ê lâng liông-sim tshing-pi̍k. 10 Tsiah-ê lé-gî kan-taⁿ kuan-hē lim-tsia̍h kah ta̍k-tsióng ê kiat-tsīng-lé, sī sio̍k guā-piáu ê kui-lē. Tse kan-taⁿ sik-iōng kàu Siōng-Tsú uân-sîng it-tshè ê kái-kik uî-tsí. 11 M̄-koh Ki-tok í-king kàu à, tsò Tsè-si-tiúⁿ koh ū uân-sîng hiah-ê hó tāi-tsì. I king-kuè khah tuā koh khah uân-tsuân ê huē-bō͘, m̄-sī lâng ê tshiú só͘ khí-tsō sio̍k tī tsit sè-kan ê huē-bō͘. 12 I tsí-ū tsi̍t-pái tsìn-ji̍p Tsì-sìng-só͘, m̄-sī īng iûⁿ kah gû-á ê hueh, sī īng ka-kī ê hueh, tsi̍t pái tsiū uī-tio̍h lán jîn-luī uân-sîng íng-uán ê kiù-sio̍k. 13 Nā tsiong gû á-sī iûⁿ ê hueh kah gû-bú-á ê kut-hu hiù tī bô tshing-khì ê lâng ê sin-tsiūⁿ to ē hō͘ in sìng-huà tshing-khì, 14 hô-hòng Ki-tok thong-kuè íng-uán ê Sìng-Sîn hiàn I ka-kī bô khuat-tiám ê pún-sin hō͘ Siōng-Tsú. I ê hueh kám bô koh-khah hō͘ lán ê liông-sim tshing-khì, thang thuat-lī sí-bông ê hîng-uî lâi ho̍k-sāi íng-uán ua̍h-miā ê Siōng-Tsú? 15 In-uī án-ne, Ki-tok tsò sin bîng-iok ê tiong-pó, īng ka-kī ê sí lâi sio̍k-huê tī í-tsîng ê bîng-iok kî-kan só͘ huān ê tsuē, thang hō͘ hiah-ê siū Siōng-Tsú ho͘-tiàu ê lâng niá-siū I só͘ ìng-ín íng-uán ê sán-gia̍p. 16 Kuan-hē uî-tsiok, it-tīng tio̍h sing tsìng-si̍t li̍p uî-tsiok ê lâng í-king kuè-sin. 17 In-uī uî-tsiok tio̍h li̍p uî-tsiok ê lâng í-king kuè-sin tsiah ū hāu. Li̍p uî-tsiok ê lâng nā iáu ua̍h-teh, hit-ê uî-tsiok tsiū bô hāu-li̍k. 18 Só͘-í liân thâu-tsi̍t-ê bîng-iok mā tio̍h īng hueh lâi siat-li̍p. 19 Mô͘-se tsiàu lu̍t-huat tsiong só͘-ū ê kài-bīng thuân hō͘ jîn-bîn liáu-āu tsiū phâng gû-á kah iûⁿ ê hueh í-ki̍p tsuí tsham tsu-âng-sik ê mî kah gû-tshik-tsháu, lâi hiù hit pún lu̍t-huat ê tsheh koh tuì tsìng-lâng, kóng, 20 " Tse sī bîng-iok ê hueh. Siōng-Tsú só͘ bīng-līng lín tio̍h tsun-siú." ( tsù: CAK 24:8) 21 Koh tsiàu án-ne, īng hueh hiù tuà huē-bō͘ kah lé-pài sú-iōng ê khì-kū tíng-bīn. 22 Tsiàu lu̍t-huat lâi kóng, ta̍k-hāng mi̍h tsha-put-to lóng sī īng hueh hō͘ i tshing-khì, nā bô lâu-hueh, tsiū bô sià-tsuē.

Ki-tok ê Hi-sing Tshat-siau Jîn-luī ê Tsuē
23 Tsiàu thiⁿ-tíng ê khuán-sit só͘ hóng-tsō ê mi̍h it-tīng tio̍h án-ne lâi hō͘ i tshing-khì, m̄-koh tī thiⁿ-tíng ê guân-mi̍h, tio̍h īng pí tse koh-khah hó ê tsè-mi̍h lâi hō͘ i tshing-khì. 24 In-uī Ki-tok m̄-sī ji̍p-khì lâng ê tshiú bô͘-hóng tsin sìng-só͘ só͘ tsō ê sìng-só͘. I sī ji̍p-khì thiⁿ-tíng ê tsin Sìng-só͘, taⁿ uī-tio̍h lán tshut-hiān tī Siōng-Tsú ê bīn-tsîng. 25 Iû-thài-lâng hiah-ê tsè-si-tiúⁿ, ta̍k nî tio̍h īng gû kah iûⁿ ê hueh ji̍p-khì Tsì-sìng-só͘, m̄-koh Ki-tok m̄-bián tsi̍t-piàn koh tsi̍t-piàn hiàn ka-kī pún-sin. 26 Nā tio̍h tsi̍t-piàn koh tsi̍t-piàn hiàn, Ki-tok tuì tshòng-tsō sè-kan í-lâi, tio̍h tsi̍t-piàn koh tsi̍t-piàn siū-khó͘, m̄-koh tsit-má tī tsit sè-tāi ê lō͘-bué, Ki-tok kan-taⁿ tshut-hiān tsi̍t pái, tsiong pún-sin hiàn tsò tsè, lâi siau-tû jîn-luī ê tsuē. 27 Tsiàu só͘ tsù-tiāⁿ, lâng lóng tio̍h sí tsi̍t pái, sí-āu ū Siōng-Tsú ê sím-phuàⁿ. 28 Tshin-tshiūⁿ án-ne, Ki-tok í-king ū tsi̍t pái hiàn ka-kī ê sèⁿ-miā lâi tam-tng tsìng-lâng ê tsuē. I ē tē-jī pái tshut-hiān, m̄-sī beh tuì-hù tsuē, sī beh tsín-kiù hiah-ê pik-tshiat teh thìng-hāu I tsài-lîm ê lâng.